କୋରାପୁଟ: ଆଜି କୋଲାବ ନଗରର ଉଲ୍ଲିବାୟାଣୀ ମନ୍ଦିର ନଦୀ ଘାଟରେ ଲୋକଙ୍କ ଯାତାୟତ ପାଇଁ କୋରାପୁଟ ଜିଲ୍ଲା ପ୍ରଶାସନ ତରଫରୁ ଏକ ମୋଟର ବୋଟ ହସ୍ତାନ୍ତର କରାଯାଇଛି । ବଡ଼କେରେଙ୍ଗା ପଞ୍ଚାୟତର ବିଭିନ୍ନ ଗାଁ ଗୁଡିକର ଯାତାୟତ ସୁବିଧା ପାଇଁ ଏହି ବୋଟ ଦିଆଯାଇଛି । ଏହି ଅବସରରେ କୋରାପୁଟ ବିଧାୟକ ରଘୁରାମ ପାଡାଲ ଉପସ୍ଥିତି ଥିଲେ ।
କେନ୍ଦ୍ରୀୟ ଅନୁଦାନରେ ଜିଲ୍ଲାର ବିଭିନ୍ନ ନଦୀ ଓ ଜଳାଶୟ ଘାଟରେ ଲୋକଙ୍କ ସୁରକ୍ଷିତ ଯାତ୍ରା ପାଇଁ ୧୫ଟି ମୋଟର ବୋଟ ଯୋଗାଇ ଦେବା ପାଇଁ ନିଷ୍ପତ୍ତି ନିଆଯାଇଥିବା ଜିଲ୍ଲା ଜରୁରୀକାଳୀନ ଅଧିକାରୀ ସିଦ୍ଧାନ୍ତ ପଟ୍ଟନାୟକ ଜଣାଇଛନ୍ତି । କୋରାପୁଟ ଜିଲ୍ଳା କେନ୍ଦ୍ର ସରକାରଙ୍କ ଦ୍ବାରା ମନୋନୀତ ଏସ୍ପିରେସନାଲ ଜିଲ୍ଲା । ବିକାଶ ଦିଗରେ ଖର୍ଚ୍ଚ ହେବା ପାଇଁ ଆସିଥିବା ସ୍ବତନ୍ତ୍ର ପାଣ୍ଠିରୁ ଏହି ବୋଟ ପ୍ରଦାନ କରାଯାଇଛି ।
ଜଳଭଣ୍ଡାରରେ ଜଳବୃଦ୍ଧି ଯୋଗୁଁ ବଡ଼କେରେଙ୍ଗା ପଞ୍ଚାୟତର ଭାଲିଆଗୁଡା, ଚମିଆଗୁଡା, ତେନ୍ତୁଳିଗୁଡା, ପୁଟକେରେଙ୍ଗା ଗ୍ରାମ ଗୁଡିକ ପଞ୍ଚାୟତ ଠାରୁ ସଡକ ସଂଯୋଗ ବିଚ୍ଛିନ୍ନ ହୋଇଥିଲା । ଏହି ବୋଟ ଦ୍ବାରା ଏହି ଗ୍ରାମ ଗୁଡିକ ଉପକୃତ ହେବେ ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
