କୋରାପୁଟ: ଶାବର ଶ୍ରୀକ୍ଷେତ୍ରରେ ଦିବ୍ୟାଙ୍ଗ ଓ ବୟସ୍କଙ୍କ ଦର୍ଶନ ପାଇଁ ସ୍ବତନ୍ତ୍ର ବ୍ୟବସ୍ଥା । ହ୍ବିଲ ଚେୟାରରେ ଯାଇ ମହାପ୍ରଭୁଙ୍କ ଦର୍ଶନ କରିବେ ଦିବ୍ୟାଙ୍ଗ ଓ ବୟସ୍କ । ଶାବର ଶ୍ରୀକ୍ଷେତ୍ର କୋରାପୁଟରେ ଥିବା ଜଗନ୍ନାଥ ମନ୍ଦିରକୁ ଯିବା ସମୟରେ ଏମାନଙ୍କୁ ସାଧାରଣତଃ କଷ୍ଟ ହୋଇଥାଏ । ବାଇଶି ପାହାଚ ଚଢି ତିନି ଠାକୁରଙ୍କ ଦର୍ଶନ କରିବା ପାଇଁ ସେମାନେ ବ୍ୟାକୁଳ ହୋଇଉଠନ୍ତି ।
ତେବେ ବର୍ତ୍ତମାନ ସେମାନଙ୍କ ପାଇଁ ଦେବ ଦର୍ଶନ ସହଜ କରିବା ଉଦ୍ଦେଶ୍ୟରେ ମନ୍ଦିର ପରିଚାଳନା କମିଟି ମନ୍ଦିର ପଛପଟୁ ଏକ ରାମ୍ପ ନିର୍ମାଣ କରାଯାଇଛି । ଏହି ରାମ୍ପ ଦେଇ ମନ୍ଦିର ବେଢ଼ା ମଧ୍ୟକୁ ଯିବା ସହଜ ହୋଇପାରିବ । ମନ୍ଦିର ପରିଚାଳନା କମିଟିର ଏପରି ଏକ ଉନ୍ନତ ମାନର ଚିନ୍ତାଧାରାକୁ ଦେଖି ସହରର ଜଣେ ଅବସରପ୍ରାପ୍ତ ବ୍ୟାଙ୍କ ଅଧିକାରୀ ତାରିଣୀ ଚରଣ ପାତ୍ର ସହଯୋଗ କରିଛନ୍ତି । ଗତ କିଛିଦିନ ପୂର୍ବେ ତଥା ସୋମବାର ଦିନ ଗୋପବନ୍ଧୁ ସେବା ସମିତି ଦ୍ବାରା ଦୁଇଟି ହ୍ବିଲ ଚେୟାର ମନ୍ଦିରକୁ ଯୋଗାଇ ଦେଇଛନ୍ତି । ଗୋପବନ୍ଧୁ ସେବା ସମିତି ଆଉ ଏକ ହ୍ବିଲ ଚେୟାର ଦେବା ପାଇଁ ନିଷ୍ପତ୍ତି ନେଇଥିବା ସମିତିର ସଭାପତି ଭବାନୀ ଶଙ୍କର ମିଶ୍ର କହିଛନ୍ତି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
