କୋରାପୁଟରେ ଅଳେଇଚ ଚାଷକୁ ନେଇ ନୂଆ ସମ୍ଭାବନା, ଲାଭବାନ ହେବେ ଚାଷୀ

କଫି ବଗିଚାରେ ସମନ୍ବିତ ଚାଷ । ଗୋଟିଏ ଜାଗାରେ କଫି ସାଙ୍ଗକୁ ଗୋଲମରିଚ, ଅଳେଇଚ, କମଳା ଏବଂ ହଳଦୀ ଚାଷ ହୋଇଛି। ଅଧିକ ପଢନ୍ତୁ

କୋରାପୁଟ: ବ୍ରାଉନ ଭ୍ୟାଲି କଫି ବଗିଚାରେ ଅଳେଇଚ ଚାଷ । କଫି ବଗିଚାରେ ସବୁଜ ଚାଦରରେ ବିଛେଇ ହୋଇ ପଡିଛି ଅଳେଇଚ । କଫି ବଗିଚାର ଛାଇ ଜାଗାରେ ଅଳେଇଚ ଚାଷ କରି ଲାଭବାନ ହୋଇପାରିଛନ୍ତି ବ୍ରାଉନ ଭ୍ୟାଲିର ଉଦ୍ୟୋଗୀ ଚାଷୀ ସୁଜୟ ପ୍ରଧାନ । ଏହି ଚାଷ କରି କୋରାପୁଟର ଚାଷୀ ମଧ୍ୟ ଲାଭବାନ ହୋଇପାରିବେ ବୋଲି ସେ ମତ ରଖିଛନ୍ତି । କୋରାପୁଟର ଏଗ୍ରୋ କ୍ଳାଇମେଟିକ ସ୍ଥିତି ଅଳେଇଚ ଚାଷ ପାଇଁ ବେଶ ଉପଯୋଗୀ । ଏହି ଗୋଟିଏ ସ୍ଥାନରେ କଫି ସାଙ୍ଗକୁ ଗୋଲମରିଚ, ଅଳେଇଚ, ବତେଇ, ସପୁରୀ, କମଳା ଏବଂ ହଳଦୀ ଚାଷ ହୋଇଛି ।

ଦଶ ବର୍ଷ ପୂର୍ବେ ସୁଜୟ ପ୍ରଧାନ ଅଳେଇଚର କିଛି ଚାରା ଆଣି ଏହାକୁ କଫି ବଗିଚାରେ ରୋପଣ କରିଥିଲେ । କିନ୍ତୁ କଫି ଓ ଗୋଲମରିଚ ଚାଷରେ ନିଜକୁ ବ୍ୟସ୍ତ ରଖୁଥିବା ଯୋଗୁଁ ଅଳେଇଚ ଗଛ ଗୁଡିକ ପ୍ରତି ଅଧିକ ଦୃଷ୍ଟି ଦେବା ସମ୍ଭବ ହେଉନଥିଲା । ଗତ ଚାରି ବର୍ଷ ଧରି ଉପଯୁକ୍ତ ଯତ୍ନ ନେବା ପରେ ଗଛରେ ଅଳେଇଚ ଫଳିଥିବା ସେ ଦେଖିବାକୁ ପାଇଥିଲେ । ଯଦି କୋରାପୁଟରେ ଚାଷୀ ଏହି ଚାଷ କରନ୍ତି ତେବେ ବେଶ ଲାଭବାନ ହୋଇପାରିବେ ବୋଲି ସୁଜୟ କହିଛନ୍ତି । ପ୍ରତି ଗଛ ପିଛା 300 ଗ୍ରାମରୁ 1 କିଲୋ ପର୍ଯ୍ୟନ୍ତ ଅଳେଇଚ ଫଳିବାର ସମ୍ଭାବନା ରହିଛି । ଏହି ଚାଷରେ ଚାରା ରୋପଣର ତିନିରୁ ଚାରି ବର୍ଷ ମଧ୍ୟରେ ଚାଷୀ ଅଳେଇଚ ଉତ୍ପାଦନ କରିପାରିବେ ।