କୋରାପୁଟ: ଆନ୍ଧ୍ରପ୍ରଦେଶ ବିଭିନ୍ନ ପ୍ରଲୋଭନ ଦେଖାଇ ନିଜ ଆଡ଼କୁ ଟାଣିବାର ପ୍ରୟାସ ଫେଲ ମାରିଛି । କୋଟିଆ ଭଳି ସୀମାନ୍ତବର୍ତ୍ତି ଅଞ୍ଚଳରେ କୁଇ ଭାଷା ପ୍ରଚଳିତ ହେଉଥିବାବେଳେ ଆମ କୋଟିଆ ସଂଗଠନ ତରଫରୁ ଛୋଟ ପିଲାଙ୍କୁ ପୁସ୍ତକ ଏବଂ ଓଡ଼ିଆ ଅକ୍ଷରର ଖେଳଣା ବଣ୍ଟାଯାଇଛି । ପ୍ରଥମ ପର୍ଯ୍ୟାୟରେ ନୂଆଗାଁ ପଞ୍ଚାୟତର ଗଲିଗବ୍ଦର, ନୂଆଗାଁ ସମେତ କୋଟିଆ ପଞ୍ଚାୟତର ଗଞ୍ଜେଇପଦର, କୋଟିଆ , ମାଡକାର , ଡଲିଆମ୍ବ , ଫଗୁଣସିନେରୀ, ଫାଟୁସିନେରି ଓ ହରମାଣ୍ଡିଙ୍ଗି ଗ୍ରାମରେ ବିଶିଷ୍ଟ ଗବେଷକ ଗୋବର୍ଦ୍ଧନ ପଣ୍ଡାଙ୍କ ରଚିତ ପୁସ୍ତକ ସହ ପ୍ଲାଷ୍ଟିକର ଓଡ଼ିଆ ଅକ୍ଷରମାଳା ବଣ୍ଟା ଯାଇଛି ।
କୋଟିଆ ପଞ୍ଚାୟତରେ ଓଡ଼ିଆ ଭାଷା ସାହିତ୍ୟର ସୁରକ୍ଷା ନିମନ୍ତେ ଓଡ଼ିଶା ସରକାରଙ୍କ ତରଫରୁ ବିଭିନ୍ନ ସ୍ତରରେ ବିଦ୍ୟାଳୟ ସ୍ଥାପନା କରାଯାଇଛି। ଅନେକ ସଂସ୍ଥା ଦ୍ୱାରା ଓଡ଼ିଆ ସାହିତ୍ୟ ସଭା, କବିତା ପାଠ କାର୍ଯ୍ୟକ୍ରମ ମଧ୍ୟ ହେଉଛି । ବର୍ତ୍ତମାନ ଆମ କୋଟିଆ ସଂଗଠନ ତରଫରୁ ବଣ୍ଟନ କରାଯାଉଥିବା କୁଇ- ଓଡ଼ିଆ ପ୍ରାଇମର ପୁସ୍ତିକା ଏହି ସମସ୍ତ ପ୍ରାୟାସକୁ ଆଗକୁ ନେବାରେ ସହାୟକ ହେବ ବୋଲି ବୁଦ୍ଧିଜୀବୀ ମହଲରେ କୁହାଯାଇଛି । କୁଇ ଭାଷା ସହ ପରିଚିତ ଛାତ୍ରଛାତ୍ରୀଙ୍କୁ ଓଡ଼ିଆ ପଢ଼ିବା ସହାୟକ ହେବ ବୋଲି ଅଭିଭାବକ କହିଛନ୍ତି ।
ଗତ କିଛିଦିନ ପୂର୍ବେ ଆନ୍ଧ୍ର ପ୍ରଦେଶର ରାଜଧାନୀ ଅମରାବତୀ ଠାରେ ଆନ୍ଧ୍ର ପ୍ରଦେଶର ଉପ ମୁଖ୍ୟମନ୍ତ୍ରୀ ରାଜନ ଦୋରା 6ଟି ଆଦିବାସୀ ଭାଷାରୁ ତେଲୁଗୁ ଓ ଇଂରାଜୀ ଶିଖିବା ପାଇଁ ଉପଯୋଗୀ ପୁସ୍ତକର ଉନ୍ମୋଚନ କରିଥିଲେ । ଓଡ଼ିଶା ସୀମାନ୍ତରେ ପ୍ରଚଳିତ ସଉରା ଓ କୁଇ ଭଳି ଆଦିବାସୀ ଭାଷା ସହ ଓଡ଼ିଆ ଜାଣିଥିବା ପିଲାମାନେ କିପରି ସହଜରେ ତେଲୁଗୁ ଶିଖି ପାରିବେ ସେ ଦିଗରେ ଆନ୍ଧ୍ର ସରକାର ପ୍ରୟାସ କରିଥିଲେ। ମାତ୍ର ଏହା ପୂର୍ବରୁ ପିଲାଙ୍କ ପାଖରେ ଓଡ଼ିଆ-କୁଇ ପ୍ରାଇମର ପୁସ୍ତକ ପହଞ୍ଚି ସାରିଛି।
ଏହା ଫଳରେ ପିଲାମାନେ ଓଡ଼ିଆ ଭାଷାକୁ ସହଜରେ ଗ୍ରହଣ କରିବେ ବୋଲି ଆଶା ପ୍ରକାଶ କରାଯାଉଛି । ଦ୍ଵିତୀୟ ପର୍ଯ୍ୟାୟରେ କୋଟିଆ ପଞ୍ଚାୟତର ବାକିଥିବା ସେମ୍ବି, ଧୁଲିପଦର , ତଡିଵାଲାସା ଓ ନେରେଡିବାଲାସାରେ ପ୍ରାଇମର ପୁସ୍ତିକାକୁ ବଣ୍ଟନ କରାଯିବ ବୋଲି ଆମ କୋଟିଆ ସଂଗଠନର ସ୍ବେଚ୍ଛାସେବୀ ସୂଚନା ଦେଇଛନ୍ତି ।
ଇଟିଭି ଭାରତ, କୋରାପୁଟ
