କୋରାପୁଟ: ଏଣିକି କୋରାପୁଟ ଜିଲ୍ଲାର ଯେକୌଣସି ଗାଁରେ ବାଲ୍ୟ ବିବାହ ହେଲେ ସେହି ଗାଁର ଅଙ୍ଗନବାଡି କର୍ମୀଙ୍କ ସମେତ ତାଙ୍କ ସୁପରଭାଇଜର ଓ ସିଡିପିଓ ଦାୟୀ ରହିବେ । ରାଜ୍ୟ ସରକାର ସିଡିପିଓ ମାନଙ୍କୁ ବାଲ୍ୟ ବିବାହ ନିରୋଧ ଅଧିକାରୀ ଭାବେ ସ୍ବତନ୍ତ୍ର ଅଧିକାର ଦେବା ସହ ନିଜ ନିଜ କ୍ଷେତ୍ରରେ ସୁପରଭାଇଜର ଓ ଅଙ୍ଗନବାଡି କର୍ମୀଙ୍କ ସହାୟତାରେ ବାଲ୍ୟବିବାହକୁ ପ୍ରତିହତ କରିବାର ଦାୟିତ୍ବ ପ୍ରଦାନ କରିଛନ୍ତି ।
ଏଥି ସତ୍ତ୍ବେ କୋରାପୁଟ ଜିଲ୍ଲା, ରାଜ୍ୟରେ ବାଲ୍ୟବିବାହ ବହୁଳ ଜିଲ୍ଲାର ତାଲିକାରେ ଦ୍ଵିତୀୟ ସ୍ଥାନ ଅଧିକାର କରିବା ପରିତାପର ବିଷୟ ବୋଲି ଜିଲ୍ଲାପାଳ ମଧୁସୂଦନ ମିଶ୍ର ମତ ରଖିଛନ୍ତି । ଜିଲ୍ଲା ପ୍ରଶାସନ , ୟୁନିସେଫ ଓ ଆକ୍ସନଏଡ଼ର ମିଳିତ ଆନୁକୂଲ୍ୟରେ ବାଲ୍ୟବିବାହ ନିୟନ୍ତ୍ରଣ ପାଇଁ ଟାସ୍କଫୋର୍ସ ଗଠନ କରିବା ପାଇଁ ଆୟୋଜିତ ହୋଇଥିଲା ବୈଠକ । ଏହି ବୈଠକରେ କୋରାପୁଟ ଜିଲ୍ଲାରେ ବାଲ୍ୟ ବିବାହର ମାତ୍ରା ୩୪ ପ୍ରତିଶତରେ ପହଞ୍ଚିଥିବା ଜାଣିବା ପରେ ଜିଲ୍ଲାପାଳ ଏହି ମନ୍ତବ୍ୟ ଦେଇଛନ୍ତି ।
ବିଦ୍ୟାଳୟର ପିଲାଙ୍କ ଦ୍ବାରା ଗାଁ ଗାଁରେ ବାଲ୍ୟ ବିବାହ ବିରୁଦ୍ଧରେ ସଚେତନତା ସୃଷ୍ଟି କରାଯିବା ପାଇଁ କାର୍ଯ୍ୟପନ୍ଥା ପ୍ରସ୍ତୁତ କରିବା ପାଇଁ ନିର୍ଦ୍ଦେଶ ଦିଆଯାଇଛି । ବାଲ୍ୟ ବିବାହ ସଂଗଠିତ ହେଲେ ଗାଁରେ ରହି ଗାଁର ସମସ୍ତ ଖବରକୁ ଜାଣୁଥିବା ଅଙ୍ଗନବାଡି କର୍ମୀ ଉପରିସ୍ଥ ଅଧିକାରୀଙ୍କୁ ଜଣାଇବାର ଦାୟିତ୍ବକୁ ସୁଚାରୁରୂପେ ନତୁଲାଇଲେ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପାଇଁ ଜିଲ୍ଲାପାଳ ନିଷ୍ପତ୍ତି ନେଇଛନ୍ତି । ଅଙ୍ଗନବାଡି କର୍ମୀଙ୍କ ଏ ଦିଗରେ ଅସମର୍ଥତାକୁ ଠିକ ରୂପେ ତଦାରଖ କରିପାରିନଥିବା ଯୋଗୁଁ ସୁପରଭାଇଜର ଓ ସିଡିପିଓଙ୍କ ଉପରେ ମଧ୍ୟ ତାଙ୍କ ସିସିଆରକୁ ପ୍ରଭାବିତ କଲା ଭଳି ପଦକ୍ଷେପ ନିଆଯିବ ବୋଲି ସେ ଚେତାବନୀ ଶୁଣାଇଛନ୍ତି ।
ଆଜିର ଏହି ସଭାରେ ଜିଲ୍ଲାର ବିଭିନ୍ନ ବିଭାଗ ର ସମନ୍ବୟରେ କିପରି ବାଲ୍ୟ ବିବାହ ଭଳି ଏକ ସମସ୍ୟାକୁ ପ୍ରତିହତ କରିହେବ ସେନେଇ ବିଷଦ ଭାବେ ଆଲୋଚନା ହୋଇଥିଲା ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
