କୋରାପୁଟ: ଓଡିଶା ଓ ଆନ୍ଧ୍ରପ୍ରଦେଶ ମଧ୍ୟରେ ଥିବା ସୀମା ବିବାଦ ଉଗ୍ର ରୂପ ଧାରଣ କରିଛି । ଏମିତିକି ସୀମାରେ ଉଭୟ ରାଜ୍ୟର ଲୋକଙ୍କ ପକ୍ଷରୁ ରାସ୍ତା ଅବରୋଧ ମଧ୍ୟ ହଟାଯାଇଛି । ତେବେ ଉଭୟ ରାଜ୍ୟର ପ୍ରଶାସନଙ୍କ ମଧ୍ୟରେ ଆଲୋଚନା ହେବା ପରେ ଉତ୍ତେଜନା ଥମିଛି ।
ସୂଚନା ଅନୁଯାୟୀ କୋରାପୁଟ ଜିଲ୍ଲା ପଟ୍ଟାଙ୍ଗୀ ଅନ୍ତର୍ଗତ ସମ୍ବାଇ ପଞ୍ଚାୟତର ସୁନାବେଡା ଗ୍ରାମରେ ଆନ୍ଧ୍ର-ଓଡିଶା ସୀମା ବିବାଦ ତୀବ୍ର ରୂପ ନେଇଥିଲା । ଏମିତିକି ସ୍ଥାନୀୟ ଅଞ୍ଚଳରେ ରାସ୍ତାରୋକ ମଧ୍ୟ କରାଯାଇଥିଲା । ଏହି ରାସ୍ତାରୋକ ଦୀର୍ଘ 8 ଦିନ ଧରି ଚାଲୁ ରହିଥିଲା । ବୁଧବାର କୋରାପୁଟ ଜିଲ୍ଲାର ସହଜିଲ୍ଲାପାଳ ଅର୍ଚ୍ଚନା ଦାସ ଓ ପଟ୍ଟାଙ୍ଗୀ ତହସିଲଦାର ପ୍ରଫୁଲ୍ଲ ଭତ୍ରାଙ୍କ ନେତୃତ୍ବରେ ଏକ ରାଜସ୍ବ ଅଧିକାରୀଙ୍କ ଦଳ ସୁନାବେଡା ଠାରେ ଆନ୍ଧ୍ରପ୍ରଦେଶର ପାଡେରୁ ଉପଜିଲ୍ଲାପାଳ ତଥା ଆରାକୁ ତହସିଲଦାର ଓ ବନଖଣ୍ଡ ଅଧିକାରୀଙ୍କ ସହ ଆଲୋଚନା ହୋଇଥିଲା ।
ଏହାପରେ କୋରାପୁଟ ଓ ବିଶାଖାପାଟଣା ଜିଲ୍ଲାର ଜିଲ୍ଲାପାଳଙ୍କ ମଧ୍ୟରେ ଏହି ବିବାଦକୁ ନେଇ ଆଲୋଚନା ହେବା ପରେ ଉଭୟ ରାଜ୍ୟର ଲୋକଙ୍କ ସହମତି କ୍ରମେ ରାସ୍ତାରୋକ ହଟିଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
