ଭୁବନେଶ୍ବର: ଆଜି ବିଶ୍ୱ ନାଟକ ଦିବସ। ନାଟକର ଅସ୍ତିତ୍ବକୁ ବଞ୍ଚାଇ ରଖିବା ପାଇଁ ସରା ବିଶ୍ବରେ ଆଜି ନାଟକ ଦିବସ ପାଳନ କରାଯାଏ । ଦୁନିଆ ବଦଳିବା ସହ ବଦଳିଛି ଲୋକଙ୍କ ପସନ୍ଦ। ନାଟକ ପ୍ରତି ଲୋକଙ୍କର ଆଗ୍ରହ କମିବାରେ ଲାଗିଛି । ତେଣୁ ନାଟକ ପ୍ରତି ଲୋକଙ୍କର ଆଗ୍ରହକୁ ଜାଗ୍ରତ କରିବା ପାଇଁ ଓଡିଶା ନାଟ୍ୟକାର ପକ୍ଷରୁ ଏହି ଦିବସ ପାଳନ କରାଯାଇଛି ।
ନାଟକ ହେଉଛି ସମାଜର ଏକ ନିରନ୍ତର ପ୍ରତିଛବି । ସମାଜରେ ଘଟୁଥିବା ବା ଘଟି ଯାଇଥିବା ଘଟଣାବଳୀକୁ ସିଧାସଳଖ ଭାବେ ଆମେ ନାଟକ ମାଧ୍ୟମରେ ଦେଖିଥାଉ । ନାଟକ ଦିବସରେ ନାଟ୍ୟ ନିର୍ଦ୍ଦେଶକ ଓ ନାଟ୍ୟ କଳାକାର ଧୀର ମଲ୍ଲିକ କହିଛନ୍ତି ନାଟକ ମାଧ୍ୟମରେ ସମାଜର ପ୍ରତିଛବି ପ୍ରକାଶ ପାଇଥାଏ ଏହା ମଣିଷକୁ ଶୃଙ୍ଖଳିତ, ପରିମାର୍ଜିତ ଓ ଭଦ୍ର କରିଥାଏ । ତେଣୁ ନାଟକକୁ ପ୍ରୋତ୍ସାହନ ଦେବା ମନେ ପକାଇବା ଓ ନାଟକ ପ୍ରତି ଶ୍ରଦ୍ଧା ଜାଗ୍ରତ କରିବା ପାଇଁ ଆମେ ନାଟକ ଦିବସ ପାଳନ କରୁଛୁ । ବର୍ତ୍ତମାନ ନାଟକର ପୃଷ୍ଠ ପୋଷକତା ବଦଳିଲାଣି ଅଧିକରୁ ଅଧିକ ନାଟକ ଓଡ଼ିଶାରେ ହେଉଛି । ଏହାକୁ ନେଇ ଓଡିଶା ଏବେ ନାଟକର ହବ୍ ପାଲଟିଲାଣି । ରାଜ୍ୟର ବିଭିନ୍ନ ସହର ଯେପରିକି ଭୁବନେଶ୍ୱର, ଢେଙ୍କାନାଳ, ରାଉଲକେଲା, ପୁରୀ, ପାରାଦୀପ, ସମ୍ବଲପୁର, କଟକ, ବାଲେଶ୍ୱରରେ ଅଧିକରୁ ଅଧିକ ନାଟକ ଦେଖିବାକୁ ମିଳିଛି ।
ତେବେ ଏବେ ଲୋକଙ୍କ ନାଟକ ପ୍ରତି ରୁଚି ବଢିଛି । ସୋସିଆଲ ମିଡିଆ ଦ୍ବାରା ନାଟକକୁ ଏବଂ କଳାକାରଙ୍କୁ ଲୋକେ ପସନ୍ଦ କରିବା ଆରମ୍ଭ କରିଛନ୍ତି । ଧୀରେଧୀରେ ମଞ୍ଚ ମୁହାଁ ହେଉଛନ୍ତି କଳାକାର ଓ ଯୁବପିଢ଼ି । ଲୁପ୍ତ ପଉଥିବା ନାଟକର ଅସ୍ତିତ୍ବ ଏବେ ଧୀରେଧୀରେ ନିଜ ପରିଚୟ ଖୋଜି ପାଇବାରେ ସଫଳ ହେଉଛି । ତେଣୁ ଆଜିର ନାଟକ ଅତୀତର ସେହି ସ୍ମୃତିକୁ ଜାବୁଡି ଧରି ବର୍ତ୍ତମାନର ସ୍ଥିତିକୁ ସାମ୍ନା କରି ଭବିଷ୍ୟତର ନୂଆ ଆହ୍ୱାନକୁ ନେଇ ନାଟକ ଦିବସ ପାଳୁଛି ।
ତେବେ ଓଡିଶା ନାଟ୍ୟ ସଂଘ କହିଛି, ସରକାରଙ୍କ ପ୍ରୋତ୍ସାହନ ଦ୍ବାରା ନାଟକ ଅଧିକରୁ ଅଧିକ ପ୍ରସାରିତ ହୋଇପାରିବ । ଆଗରୁ ସରକାର ପ୍ରେକ୍ଷାଳୟ ବା ମଞ୍ଚଗୁଡିକୁ ୫୦ ପ୍ରତିଶତ ରିହାତିରେ ଦେଉଥିଲେ। ହେଲେ କରୋନା ପରେ କିଛି ରିହାତି ମିଳୁନଥିବା ବେଳେ, ୧୦୦ ପ୍ରତିଶତ ଭଡା ନେଇ ମଞ୍ଚ ଦେଉଛନ୍ତି । ତେଣୁ ସରକାରଙ୍କ ଯଦି ଅଭ୍ୟାସ ସହ ନାଟକ ପରିବେଷଣ ପାଇଁ ପୁଣି ରିହାତି ପ୍ରଦାନ କରନ୍ତେ ତେବେ ନାଟ୍ୟସଂସ୍ଥା ଓ କଳାକାର ଉପକୃତ ହୁଅନ୍ତେ ବୋଲି ଓଡିଶା ନାଟ୍ଯ ସଂଘ କହିଛି ।
ଇଟିଭି ଭାରତ, ଭୁବନେଶ୍ବର
