ଖୋର୍ଦ୍ଧା: ଜିଲ୍ଲାର ବେଗୁନିଆ ବ୍ଲକର ଶୀମୋର ପଞ୍ଚାୟତର କାନ୍ଥରେ ବିଭିନ୍ନ ରଙ୍ଗ ବେରଙ୍ଗର ଚିତ୍ର ଅଙ୍କନ କରାଯାଇଛି । ଯାହାକି କୋରୋନା ସଚେତନତା ଠାରୁ ଆରମ୍ଭ କରି ସମାଜର ବିଭିନ୍ନ ସମସ୍ୟା ସଂପର୍କରେ ବାର୍ତ୍ତା ବାଣ୍ଟିବା ସହିତ ଲୋକମାନଙ୍କୁ ପ୍ରଭାବିତ କରୁଥିବା ଦେଖିବାକୁ ମିଳୁଛି ।
ବଡ ବଡ ସହରମାନଙ୍କର ଉଚ୍ଚ ପାଚେରୀରେ ଏଭଳି କଳାକୃତି ଦେଖିବାକୁ ମିଳିଥାଏ । ଯାହାକି ସହରର ସୌନ୍ଦର୍ଯ୍ୟ ବଢାଇବା ସହିତ ଲୋକମାନଙ୍କୁ ବିଭିନ୍ନ ପ୍ରକାର ବାର୍ତ୍ତା ପ୍ରେରଣ କରିଥାଏ । ତେବେ ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ ଶୀମୋର ପଞ୍ଚାୟତରେ ଏଭଳି ଏକ ପ୍ରଶଂସନୀୟ ପଦକ୍ଷେପ ନିଆଯାଇ କାନ୍ଥଗୁଡିକରେ ସଚେତନତା ଧର୍ମୀ ଚିତ୍ର ଅଙ୍କନ କରାଯାଇଛି ।
ପାଇକ ବିଦ୍ରୋହ, କାଞ୍ଚି ଅଭିଯାନ,ଜଳ ସଂରକ୍ଷଣ, ସ୍ବଚ୍ଛ ଭାରତ, ଵୃକ୍ଷ ସମ୍ପଦଠାରୁ ଆରମ୍ଭ କରି ବର୍ତ୍ତମାନର ବଡ ସମସ୍ୟା କୋରୋନା ମହାମାରୀଠାରୁ ରକ୍ଷା ପାଇବା ପାଇଁ ଗ୍ରହଣ କରିବା ପଦକ୍ଷେପ ଆଦି ସଂପର୍କରେ ଲୋକମାନଙ୍କୁ ଚିତ୍ର ମାଧ୍ୟମରେ ସଚେତନତା ବାର୍ତ୍ତା ଦିଆଯାଇଛି । ଏହି ଚିତ୍ରଗୁଡିକ ଆମ କଳା, ସଂସ୍କୃତି ଓ ଐତିହ୍ୟକୁ ମନେ ପକାଇ ଦେଉଛି । ଚିତ୍ରକଳା ଏତେ ସୁନ୍ଦର ଯେ ଏହି ରାସ୍ତା ଦେଇ ଯାଉଥିବା ଲୋକମାନେ ଏଠାରେ ସେଲ୍ଫି ନେଉଥିବା ଦେଖିବାକୁ ମିଳୁଛି । ଗ୍ରାମ ପଞ୍ଚାୟତକୁ ନିଆରା କରିବା ପାଇଁ ଏପରି ପଦକ୍ଷେପ ହାତକୁ ନେଇଥିବା ଶୀମୋର ସରପଞ୍ଚ ସରୋଜିନୀ ଖୁଣ୍ଟିଆ କହିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
