ଖୋର୍ଦ୍ଧା: ବେଆଇନ ବ୍ଲାଷ୍ଟିଂ ପାଇଁ ହନ୍ତସନ୍ତ ଲୋକେ । ଯାହାକୁ ନେଇ ସ୍ଥାନୀୟ ବାସିନ୍ଦାଙ୍କ ମଧ୍ୟରେ ବଢୁଛି ଅସନ୍ତୋଷ । ଖୋର୍ଦ୍ଧା ଉପଖଣ୍ଡ ମଳିପଡ଼ା ଗାଁ ନିକଟରେ ଥିବା ହନୁମନ୍ତିଆ ପାହାଡ଼ରୁ ବେଆଇନ ଭାବେ ପଥର ଉତ୍ତୋଳନ ହେଉଥିବା ଅଭିଯୋଗ ହୋଉଛି । ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ ଶ୍ରୀଜଗନ୍ନାଥ ମନ୍ଦିର ପ୍ରଶାସନ ତରଫରୁ ପ୍ରାୟ ସାଢେ ୧୦ ଏକର ସୈରାତକୁ ନିଲାମ ପ୍ରଦାନ କରାଯାଇଛି । ମାତ୍ର ନିଲାମଧାରୀ ନିର୍ଦ୍ଧାରିତ ସୀମା ବାହାରୁ ପଥର ଉତ୍ତୋଳନ କରିବା ଏହାର ସିଧାସଳଖ ପ୍ରଭାବ ସ୍ଥାନୀୟ ଲୋକଙ୍କ ଉପରେ ପଡ଼ୁଛି ।
ସେହିପରି ଜଳ ଉତ୍ସଗୁଡ଼ିକ ପ୍ରଦୂଷିତ ହେବା ଦ୍ଵାରା ଗୋରୁ ପାଣି ପିଇବା ନେଇ ସମସ୍ୟା ସୃଷ୍ଟି ହୋଇଛି । ପଥର ଉତ୍ତୋଳନ ପାଇଁ ବ୍ଲାଷ୍ଟିଂ କରିବା ଦ୍ବାରା ନିକଟରେ ଥିବା ଘରଗୁଡ଼ିକ କାନ୍ଥରେ ଫାଟ ସୃଷ୍ଟି ହୋଇଥିବା ଅଭିଯୋଗ ହୋଇଛି । ମଳିପଡ଼ାର ଜଣେ ସ୍ଥାନୀୟ ଲୋକ ଶୈଲେସ କୋଦାମସିଂଙ୍କ ଅଭିଯୋଗ ହେଉଛି । ତାଙ୍କ ଖାତା ନମ୍ବର ୫୦୭ରେ ପ୍ଳଟ ୧୦ର ପ୍ରାୟ ଅଧା ଏକର ଜମିରେ ନିଲାମଧାରୀ ପଥର ଉତ୍ତୋଳନ କରି ନେଇଛନ୍ତି ।
ସେହିପରି ଗୋଟିଏ ପ୍ଲଟକୁ ନିଲାମ ମନ୍ଦିର ପ୍ରଶାସନ ନେଇଥିବା ବେଳେ ନିଲାମଧାରୀ ୩ ଗୋଟି ସୈରାତରୁ ପଥର ଉତ୍ତୋଳନ କରୁଛନ୍ତି । ବ୍ଲାଷ୍ଟିଂ ଦ୍ବାରା ହେଉଥିବା କ୍ଷତିପୂରଣ ଦାବି କରିଛନ୍ତି ସ୍ଥାନୀୟ ବାସିନ୍ଦା ।
ସେପଟେ ନିଲାମଧାରୀଙ୍କ ସମ୍ପର୍କୀୟ ସରଞ୍ଜିତ କହଳସିଂହଙ୍କ କହିବା କଥା ମନ୍ଦିର ପ୍ରଶାସନ ନିର୍ଦ୍ଧାରିତ ସୈରାତରୁ ନିୟମ ମୁତାବକ ପଥର ଖନନ କରାଯାଉଛି । ଏହା ସତ୍ତ୍ବେ ଯଦି ସ୍ଥାନୀୟ ଲୋକଙ୍କ କିଛି ଅଭିଯୋଗ ରହିଛି । ତେବେ ସେମାନେ ମନ୍ଦିର ପ୍ରଶାସନ ନିକଟରେ ଅଭିଯୋଗ କରନ୍ତୁ । ମନ୍ଦିର ପ୍ରଶାସନ ମାପଚୁପ କରିବା ପରେ ସବୁ ସତ ପଦାକୁ ଆସିବ ବୋଲି ସେ କହିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ତା, ଇଟିଭି ଭାରତ
