ଖୋର୍ଦ୍ଧା: ଜାତୀୟ ରାଜପଥରୁ ଅପହରଣ ହେଲା ମଦ ବୋଝେଇ ଟ୍ରକ । ବୁଧବାର ଖୋର୍ଦ୍ଧାରୁ ଦଶପଲ୍ଲା ଅଭିମୁଖେ ଯାଉଥିବା ଏକ ମଦ ବୋଝେଇ ଟ୍ରକକୁ ଅପହରଣ କରାଯାଇଛି । ଏଭଳି ଘଟଣା ଘଟିଛି ଖୋର୍ଦ୍ଧା ଜିଲ୍ଲା ବେଗୁନିଆ ଥାନା ଅନ୍ତର୍ଗତ ପିଚୁକୁଳି ନିକଟରୁ ।
ସୂଚନା ମୁତାବକ, ଗତ ମଙ୍ଗଳବାର ବିଳମ୍ବିତ ରାତିରେ ଖୋର୍ଦ୍ଧା ମଦ ଡିପୋରୁ ବିଅର ଟ୍ରକ ସାହାଯ୍ୟରେ ଦଶପଲ୍ଲାର ପ୍ରଭାତ ମିଶ୍ରଙ୍କ ବିଅର ପାର୍ଲରକୁ ମଦ ବୋଝେଇ ଟ୍ରକଟି ଯାଉଥିଲା । ଉକ୍ତ ସମୟରେ 57ନଂ ଜାତୀୟ ରାଜପଥର ପିଚୁକୁଳି ନିକଟରେ 6ରୁ ଉର୍ଦ୍ଧ୍ବ ଦୁର୍ବୃତ୍ତ ଏକ ବୋଲେରୋ ଏବଂ ବାଇକରେ ଆସି ଟ୍ରକଟିକୁ ଅଟକାଇ ଥିଲେ ।
ଏହାପରେ ସେମାନେ ଟ୍ରକ ଡ୍ରାଇଭରଙ୍କୁ ବନ୍ଧୁକ ଓ ଭୁଜାଲି ଦେଖାଇ ଭୟଭୀତ କରି ମୋବାଇଲ, ନଗଦ 13ହଜାର ଟଙ୍କା ନେବା ସହ ମଦ ବୋଝେଇ ଟ୍ରକଟିକୁ ଅପହରଣ କରି ନେଇଛନ୍ତି । ତେବେ ମଦର ଆନୁମାନିକ ମୂଲ୍ୟ ସାଢେ 5 ଲକ୍ଷରୁ ଊର୍ଦ୍ଧ୍ବ ହେବା ନେଇ ଆଶଙ୍କା କରାଯାଉଛି । ଏପଟେ ଏହି ଘଟଣା ନେଇ ବେଗୁନିଆ ଥାନାରେ ଅଭିଯୋଗ ହେବାପରେ ପୋଲିସ ଘଟଣାସ୍ଥଳରେ ପହଞ୍ଚିବା ସହ ତଦନ୍ତ ଜାରି ରଖିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା , ଇଟିଭି ଭାରତ
