ଖୋର୍ଦ୍ଧା: ରାଜ୍ୟରେ ଭୟଙ୍କର ରୂପ ନେଲାଣି କୋରୋନା ମହାମାରୀର ଦ୍ବିତୀୟ ଲହର । ଗାଁ ଠୁ ସହର ସବୁଠି ଭୟର ବାତାବରଣ । କୋରୋନା ସଂକ୍ରମଣ ଶୃଙ୍ଖଳକୁ ଭାଙ୍ଗିବା ପାଇଁ ସବୁଠି ଆରମ୍ଭ ହୋଇଗଲାଣି ପ୍ରକ୍ରିୟା । ଖୋର୍ଦ୍ଧା ଜିଲ୍ଲାରେ ପ୍ରତିଦିନ ସଂକ୍ରମଣ ହାର ବଢୁଥିବାବେଳେ ଏହାକୁ ଦୃଷ୍ଟିରେ ଜିଲ୍ଲାରେ କୋଭିଡ ଗାଇଡଲାଇନକୁ କଡାକଡି କରିଛି ଜିଲ୍ଲା ପ୍ରଶାସନ । ସମଗ୍ର ଜିଲ୍ଲାରେ ମାସ୍କ ଓ ସାମାଜିକ ଦୂରତା ଉପରେ କଡା ନଜର ରଖିବାକୁ ଜିଲାର ସମସ୍ତ ତହସିଲଦାର, ବିଡ଼ିଓ ଏବଂ ଥାନା ଅଧିକାରୀଙ୍କୁ କଡା ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ ।
ସେହିପରି ଆଜି ବେଗୁନିଆ ଥାନା ଛକ ଠାରେ ମାସ୍କ ଚେକିଂ କରିଛନ୍ତି ଅତିରିକ୍ତ ତହସିଲଦାର । ଘରୁ ବାହାରକୁ ବାହାରିଲେ ମାସ୍କ ପିନ୍ଧିବା ପାଇଁ ରାଜ୍ୟ ସରକାର କଡା ନିର୍ଦ୍ଦେଶ ଦେଇଛନ୍ତି । ସେହିପରି କୋଭିଡ ନିୟମ ସଠିକ ଅନୁପାଳନ କରୁନଥିବା ଅମାନିଆଙ୍କ ଠାରୁ ଆଜି 28ଶହ ଟଙ୍କା ଜୋରିମାନା ଆଦାୟ କରାଯାଇଛି । ବେଗୁନିଆ ବଜାର ଉପରେ ବ୍ୟବସାୟୀମାନଙ୍କୁ କୋରୋନା କଟକଣା ମାନିବା ସହ ବ୍ୟବସାୟିକ ପ୍ରତିଷ୍ଠାନ ଗୁଡିକରେ ସାମାଜିକ ଦୂରତା ରକ୍ଷା କରିବାକୁ ତାଗିଦ କରାଯାଇଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
