ନୂଆଦିଲ୍ଲୀ: ନୂଆଦିଲ୍ଲୀରେ ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କୁ ସାକ୍ଷାତ କରିଛନ୍ତି ରାଜ୍ୟ ବିଜେପି ସଭାପତି ମନମୋହନ ସାମଲ। ସାକ୍ଷାତ ଅବସରରେ କେନ୍ଦ୍ର ସରକାରଙ୍କ 9 ବର୍ଷ ପୂର୍ତ୍ତୀ ନେଇ ହେବାକୁ ଥିବା କାର୍ଯ୍ୟକ୍ରମ, ରାଜ୍ୟ ରାଜନୈତିକ ସ୍ଥିତି, ଦଳର ସାଙ୍ଗଠନିକ କାର୍ଯ୍ୟ ସମେତ ଦଳୀୟ କାର୍ଯ୍ୟକ୍ରମକୁ ନେଇ ଆଲୋଚନା ହୋଇଛି ।
ବିଜେପି ନେତୃତ୍ବାଧୀନ କେନ୍ଦ୍ର ସରକାରଙ୍କୁ 9 ବର୍ଷ ପୁରିବାକୁ ଯାଉଛି । ଏଥିପାଇଁ ଦେଶବ୍ୟାପୀ ବିଭିନ୍ନ କାର୍ଯ୍ୟକ୍ରମ ଆଯୋଜନ କରୁଛି ବିଜେପି । ଯାହା ଗୋଟିଏ ମାସ ପର୍ଯ୍ୟନ୍ତ ଚାଲିବ । ଗତ 9 ବର୍ଷ ଭିତରେ ସରକାର କଣ କରିଛନ୍ତି, କେତେ ସଫଳତା ପାଇଛନ୍ତି, କଣ କଣ ସବୁ କାର୍ଯ୍ୟକ୍ରମ ହୋଇଛି, ଦେଶର ସ୍ବାର୍ଥ୍ୟ ଦୃଷ୍ଟିରୁ ସରକାର କଣ ସବୁ ପଦକ୍ଷେପ ନେଇଛନ୍ତି ତାହା ଦଳ ପକ୍ଷରୁ ଲୋକଙ୍କ ପାଖରେ ପହଞ୍ଚାଯିବ । ସେଥିପାଇଁ ସାରା ଦେଶରେ ପ୍ରସ୍ତୁତି ଚଳାଇଛି ବିଜେପି ।
ଏହାବି ପଢନ୍ତୁ- ADR ରିପୋର୍ଟ; ଅଜଣା ସୂତ୍ରରୁ ୨୯୧ କୋଟି ପାଇଛି ବିଜେଡି
ଓଡିଶାରେ ମଧ୍ୟ ହେବାକୁ ଥିବା କାର୍ଯ୍ୟକ୍ରମ ପାଇଁ ନଡ୍ଡାଙ୍କ ସହ ମନମୋହନ ସାମଲ ଆଲୋଚନା କରିଛନ୍ତି । ମନମୋହନ ସାମଲ ଏହ ଗସ୍ତ ଅବସରେ କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲଙ୍କୁ ମଧ୍ୟ ସାକ୍ଷାତ କରିଥିବା ଜଣାପଡିଛି । ଏତତବ୍ୟତୀତ ସାଧାରଣ ନିର୍ବାଚନ ଆଉ କିଛି ମାସ ବାକି ଥିବାବେଳେ ବିଜେପିର ରଣନୀତି, ଭବିଷ୍ୟତ ଆଭିମୁଖ୍ୟ ସମ୍ପର୍କରେ ଆଲୋଚନା ହୋଇଥିବା ଚର୍ଚ୍ଚା ହେଉଛି । ନିର୍ବାଚନ ପାଇଁ ରାଜ୍ୟରେ ଦୁଇ ପ୍ରମୁଖ ରାଜନୈତିକ ଦଳ ବିଜେପି ଓ ବିଜେଡି ଅଣ୍ଟା ଭିଡିଛନ୍ତି। ଝାରସୁଗୁଡ଼ା ଉପନିର୍ବାଚନ ଫଳାଫଳ ପରେ ଦୁଇ ଦଳ ସକ୍ରିୟ ହୋଇଛନ୍ତି।
ସେହିପରି ମନମୋହନ ତାଙ୍କ ନୂଆ ଟିମ ଗଠନ ନେଇ ମଧ୍ୟ ଆଲୋଚନା କରିଥିବା ଚର୍ଚ୍ଚା ହେଉଛି । ରାଜ୍ୟ ବିଜେପିରେ ମନମୋହନ ନୂଆ ଟିମ ଗଠନ କରିବେ ନା ସେହି ପୁରୁଣା ଟିମକୁ ନେଇ ଆଗକୁ ବଢିବେ ତାହା ଅସ୍ପଷ୍ଟ । କାରଣ ଆସନ୍ତା 20 ତାରିଖରୁ ଦଳର ରାଜ୍ୟ କାର୍ଯ୍ୟକାରୀଣି ବୈଠକ ହେବ । ଏହା ପରେ ଜିଲ୍ଲା କାର୍ଯ୍ୟକାରିଣୀ, ବ୍ଲକ, ମଣ୍ଡଳ କାର୍ଯ୍ୟକାରିଣୀ ଅନୁଷ୍ଠିତ ହେବ । ତେବେ ଦେଖିବାର କଥା ମନମୋହନ ସାମଲଙ୍କ ଏହି ସାକ୍ଷାତ ଆଲୋଚନା ରାଜ୍ୟ ବିଜେପିକୁ କେତେ ଶକ୍ତି ଯୋଗାଉଛି ।
ସାଧାରଣ ନିର୍ବାଚନକୁ ଆଉ କିଛି ମାସ ବାକି ଥିବା ବେଳେ, ମନମୋହନ ସାମଲ ନଡ୍ଡାଙ୍କ ଏହି ଭେଟଘାଟି ରାଜ୍ୟ ବିଜେପିକୁ କିଛି ମାତ୍ରାରେ ଶକ୍ତି ଦେଇପାରେ । ଶକ୍ତିଶାଳୀ ବିଜେଡି ବିରୋଧରେ ଲଢିବା ପାଇଁ ବିଜେପି ଉଦ୍ୟମ କରୁଥିଲେ ମଧ୍ୟ ବାରମ୍ବାର ଫେଲ ମାରୁଛି । ଯାହାକୁ ନେଇ ଏବେ ବିଜେପି ଭିନ୍ନ ରଣନୀତି ସହ ବିଜେଡି ବିରୋଧରେ ଲଢିବା ପାଇଁ ଯୋଜନା କରୁଛି ।
ଇଟିଭି ଭାରତ, ଭୁବନେଶ୍ବର
