ଭୁବନେଶ୍ବର: ଜହ୍ନ ରାତିର ସାଥୀ ପରେ ପୁଣି ଆଉ ଏକ ଓଡ଼ିଆ ପାରିବାରିକ କାହାଣୀକୁ ନେଇ ଆସୁଛି ବହୁ ପ୍ରତିକ୍ଷୀତ ଫିଲ୍ମ ଶଙ୍କର । ଆଜି ଫିଲ୍ମର ଅଡିଓ ଓ ପୋଷ୍ଟର ରିଲିଜ ହୋଇଯାଇଛି । ସୁପରଷ୍ଟାର ସିଦ୍ଧାନ୍ତ ମହାପାତ୍ର ମୁଖ୍ୟ ଚରିତ୍ର ଶଙ୍କରରେ ନଜର ଆସୁଥିବା ବେଳେ ଶିବ, କୁନା ତ୍ରିପାଠୀ, କେକେ, କାଳୀ, ବିଜୁ ବଡ଼ଜେନା, ଦିପ୍ତୀରେଖା ପଣ୍ଡା, ସୁପ୍ରିୟା, ମୀତା ଚକ୍ରବର୍ତ୍ତୀ, ନୁପୁର ଘୋଷ ଏବଂ ଦିବ୍ୟା ମହାନ୍ତି ନଜର ଆସିବେ । ତେବେ ଏହି ଫିଲ୍ମ ସେପ୍ଟେମ୍ବର 19 ଅର୍ଥାତ୍ ଗଣେଶ ଚତୁର୍ଥୀରେ ରିଲିଜ ହେବ ।
ଭୁବନେଶ୍ୱରର ଏକ ହୋଟେଲରେ ଶଙ୍କର ଫିଲ୍ମର ଅଡିଓ ଓ ପୋଷ୍ଟର ରିଲିଜ ହୋଇଯାଇଛି । ଏସ୍ଡି ଫିଲ୍ମସ୍ ବ୍ୟାନରରେ ନିର୍ମିତ ହୋଇଥିବା ନୂଆ ଓଡ଼ିଆ ଚଳଚ୍ଚିତ୍ର "ଶଙ୍କର "ଏକ ଜବରଦସ୍ତ ଆକ୍ସନ, ରୋମାଣ୍ଟିକ, ଓ ସସପେନ୍ସ ଭରା ଭିନ୍ନ ସ୍ୱାଦର କାହାଣୀ ଉପରେ ଆଧାରିତ । ଏଥିରେ ସୁପରଷ୍ଟାର ସିଦ୍ଧାନ୍ତ ମହାପାତ୍ର ସାବତ ପୁଅର ଭୂମିକାରେ ନଜର ଆସିବାକୁ ଥିବା ବେଳେ ଦେବା ଓ ଦିବ୍ୟାଙ୍କ ଯୋଡ଼ି ରୋମାନ୍ସ କରୁଥିବା ନଜର ଆସିବେ । ଦେବା ଫିଲ୍ମରେ ସିଦ୍ଧାନ୍ତ ମହାପାତ୍ରଙ୍କ ସାନଭାଇ ଚରିତ୍ରରେ ଅଭିନୟ କରିଥିବାବେଳେ ଦିବ୍ୟା ଏକ ସରଳ ଜୀବନ ଜିଉଁଥିବା ସ୍କୁଲ୍ ଶିକ୍ଷୟିତ୍ରୀ ଭୂମିକାରେ ନଜର ଆସିବେ । ଫିଲ୍ମରେ ଦେବା ଏବଂ ଦିବ୍ୟାଙ୍କ ରୋମାଣ୍ଟିକ ଯୋଡ଼ିକୁ ବେଶ ପସନ୍ଦ କରିବେ ।
ଚଳଚ୍ଚିତ୍ରଟିର ପ୍ରଯୋଜନା ଦାୟିତ୍ୱରେ ଅରବିନ୍ଦ ସାହୁ ଥିବାବେଳେ ଫିଲ୍ମର କାହାଣୀ, ଚିତ୍ରନାଟ୍ୟ ଓ ନିର୍ଦ୍ଦେଶନା ଦେଇଛନ୍ତି ଏନ୍. ପାଢ଼ୀ । ସଂଳାପ ଲେଖିଛନ୍ତି ମନୋରଞ୍ଜନ ଦାସ । ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ବୈଦ୍ୟନାଥ ଦାଶ । ନିର୍ମଳ ନାୟକ ଗୀତ ଲେଖିଥିବା ବେଳେ ବଲିଉଡ୍ କଣ୍ଠଶିଳ୍ପୀ ଉଦିତ ନାରାୟଣ ଓ ଓଡ଼ିଶା କଣ୍ଠଶିଳ୍ପୀ ଅସୀମା ପଣ୍ଡା ଏଥିରେ କଣ୍ଠଦାନ କରିଛନ୍ତି । ଗୀତଗୁଡିକ ବହୁତ ସୁନ୍ଦର ହୋଇଥିବା ବେଳେ ଦର୍ଶକଙ୍କୁ ବେଶ ପସନ୍ଦ ଆସିବ ବୋଲି କହିଛନ୍ତି ସଂଗୀତ ନିର୍ଦେଶକ ବୈଦନାଥ ଦାଶ ।
ଏହା ମଧ୍ୟ ପଢନ୍ତୁ: ରିଲ ନୁହେଁ ରିଅଲ ହିରୋ ସିଦ୍ଧାନ୍ତ, ଦୁର୍ଘଟଣାଗ୍ରସ୍ତ ବ୍ୟକ୍ତିଙ୍କ ବଞ୍ଚାଇଲେ ଜୀବନ
ତେବେ ଏହି ସିନେମାଟି ଏକ ପରିବାରିକ କାହାଣୀଙ୍କୁ ନେଇ ଗତିଶୀଳ ହୋଇଥିବା ବେଳେ ବର୍ତ୍ତମାନ ଘରେ ଘରେ ଘଟୁଥିବା ଦୃଶ୍ୟକୁ ଦେଖାଯାଇଛି । ଫ୍ୟାମିଲି ଡ୍ରାମା ସହ ଜବରଦସ୍ତ ଆକ୍ସନ, ରୋମାଣ୍ଟିକ, ଓ ସସପେନ୍ସ ଭରି ରହିଥିବା ବେଳେ ସିଦ୍ଧାନ୍ତ ମହାପାତ୍ରଙ୍କ ଗୁରୁତ୍ୱପୂର୍ଣ୍ଣ ଚରିତ୍ର ସିନେମାକୁ ଅଧିକ ରୁଦ୍ଧିମନ୍ତ କରିଥିବାରୁ ସବୁ ବର୍ଗର ଲୋକଙ୍କୁ ଏହା ଭଲ ଲାଗିବ ବୋଲି କହିଛି ପ୍ରଯୋଜନା ସଂସ୍ଥା ।
