ଭୁବନେଶ୍ବର: ଛାତ୍ରମାନେ ଥଣ୍ଡାରେ ନଦୀରେ ବାସନ ମାଜିବା ଘଟଣା । ପ୍ରଧାନ ଶିକ୍ଷକଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି । ବିଜ୍ଞାନ ମେଳାକୁ ଆସି ଦୟାନଦୀରେ ହଣ୍ଡା ବାସନ ମାଜୁଥିବା ଛାତ୍ରମାନଙ୍କ ଖବର ରାଜ୍ୟ ବିଦ୍ୟାଳୟ ଓ ଗଣଶିକ୍ଷା ବିଭାଗର ଦୃଷ୍ଟିକୁ ଆସିଛି । ରାଜ୍ୟ ମାଧ୍ୟମିକ ଶିକ୍ଷା ନିର୍ଦ୍ଦେଶକ ସୁଶାନ୍ତ କୁମାର ଦାଶ ପୁରୀ ଜିଲ୍ଲା ଅନ୍ତର୍ଗତ କଣାସ ବ୍ଲକ୍ ଅଧୀନ ଦୟାବିହାର ସ୍ଥିତ ବେଣାଗାଁ ଦୁର୍ଗାଦେବୀ ଉଚ୍ଚବିଦ୍ୟାଳୟର ପ୍ରଧାନଶିକ୍ଷକ ବିଜୟ କୁମାର ଜେନାଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି । ୨ ଦିନ ମଧ୍ୟରେ ଏହାର ସନ୍ତୋଷଜନକ ଉତ୍ତର ନଦେଲେ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ତାଙ୍କ ବିରୁଦ୍ଧରେ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିର୍ଦ୍ଦେଶକ ଜଣାଇଛନ୍ତି ।
ସୂଚନା ଅନୁଯାୟୀ, ରାତିରେ ପୁରୀ କଣାସ ଦୟା ନଦୀରେ ପିଲାମାନେ ବାସନ ମାଜୁଥିବାର ଭିଡିଓ ଭାଇରାଲ ହୋଇଥିଲା । ଯାହା ଏବେ ଚର୍ଚ୍ଚାର ବିଷୟ ପାଲଟିଛି । ପିଲାମାନେ ବାସନ ମାଜୁଥିବାବେଳେ ଶିକ୍ଷକ ବନ୍ଧ ଉପରେ ଛିଡ଼ା ହୋଇ ଦେଖୁଥିବା ଭିଡିଓରେ ଦେଖିବାକୁ ମିଳିଥିଲା । ରାତି ସମୟରେ ପିଲାମାନେ ଏପରି ବାସନ ମାଜିବା ଘଟଣା ଜଣାପଡିବା ପରେ ଅଭିଭାବକଙ୍କ ମହଲରେ ଦେଖା ଦେଇଥିଲା ଅସନ୍ତୋଷ । ସୂଚନା ଅନୁସାରେ, କଣାସ ନୀଳାଚଳ ସେବା ପ୍ରତିଷ୍ଠାନରେ ବିଜ୍ଞାନ ମେଳା ଅନୁଷ୍ଠିତ ହୋଇଥିଲା । ଏଥିରେ ଭୋଜି ଭାତର ଆୟୋଜନ କରାଯାଇଥିଲା । ଆଉ ଭୋଜି ପରେ ପିଲାମାନେ ଶୀତ କାକରରେ ବାସନ ମାଜିବା ଘଟଣାରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି ହୋଇଥିଲା ।
ଭାଇରାଲ ହେଉଥିବା ଭିଜୁଆଲ ରାତି ପ୍ରାୟ 11ଟା ସମୟର ବୋଲି କୁହାଯାଉଥିବାବେଳେ ପିଲା ମାନଙ୍କ ଦ୍ୱାରା ଦୟା ନଦୀରେ ଶିକ୍ଷକମାନେ ବାସନ ମଜାଇବା ଘଟଣାକୁ ନେଇ ଚର୍ଚ୍ଚା ଜୋର ଧରିଥିଲା । ବିଦ୍ୟାଳୟରେ ହୋଇଥିବା ଭୋଜି ଭାତରେ ବ୍ୟବହୃତ ବଡ଼ ବଡ଼ ହଣ୍ଡା ଡିଶ୍ ସବୁ କୁନି କୁନି ପିଲାଙ୍କ ହାତରେ ଦୟା ନଦୀ କୂଳକୁ ବୁହାଇ ନିଆଯାଇଥିଲା । ଏହାସହ କୋମଳ ହାତରେ ବିପଦ ପୂର୍ଣ୍ଣ ଅବସ୍ଥାରେ ରାତି ଅଧରେ ବାସନ ମଜାଇବା କେତେ ଦୂର ଯଥାର୍ଥ ବୋଲି ଉଠିଥିଲା ପ୍ରଶ୍ନ । ବିଦ୍ୟାଳୟରେ ସରକାର ଅନେକ ସୁବିଧା ସୁଯୋଗ ଯୋଗାଇ ଦେଉଥିବାବେଳେ ଏଭଳି ଦୃଶ୍ୟ ଅନେକଙ୍କୁ ବ୍ୟଥିତ କରିଛି । ଆଉ ଏହି ଘଟଣାକୁ ନେଇ ବର୍ତ୍ତମାନ ଆକ୍ଟିଭ ମୋଡକୁ ଆସିଛି ଶିକ୍ଷା ବିଭାଗ । ଏନେଇ ପ୍ରଧାନ ଶିକ୍ଷକଙ୍କୁ କାରଣ ଦର୍ଶାଅ ନୋଟିସ ଜାରି ହୋଇଛି ।
ଇଟିଭି ଭାରତ, ଭୁବନେଶ୍ବର
