ଭୁବନେଶ୍ବର: ସାମନାକୁ ଆସିଲା ବାର ମାଲିକଙ୍କ କଳାଫର୍ଦ୍ଦ । ଡ୍ୟାନ୍ସ ବାର୍ ଆଳରେ ଚଲାଇଛନ୍ତି ଦେହ ବ୍ୟବସାୟ । ଆଗରେ ବାର୍ ଆଉ ଭିତରେ ଚାଲିଛି ଅନୈତିକ କାର୍ଯ୍ୟ (Illegal work in dance bar ) । ସିକ୍ରେଟ ଚାମ୍ବରରେ ଚାଲୁଛି କାରବାର । ପୋଲିସ କି ଅବକାରୀ ପାଖରେ ନାହିଁ ସୁରାକ । ବିଳମ୍ବିତ ରାତ୍ରି ପର୍ଯ୍ୟନ୍ତ ଗ୍ରାହକଙ୍କ ଭିଡ଼ ଜମୁଥିବା ବେଳେ ଗ୍ରାହକଙ୍କୁ ସୁବିଧା ଯୋଗାଇ ମାଲିକ ହେଉଛନ୍ତି ମାଲେମାଲ । ଜଣେ ବାର ମାଲିକଙ୍କ ବିରୋଧରେ ଖୋଦ ବାର ମ୍ୟାନେଜର କମିଶନନରେଟ ପୋଲିସର ଲକ୍ଷ୍ମୀସାଗର ଥାନାରେ ଅଭିଯୋଗ କରିବା ପରେ ରାଜଧାନୀରେ ଦେହ ବ୍ୟବସାୟର ଏପରି କିଛି କାରନାମା ଏବେ ସାମ୍ନାକୁ ଆସିଛି ।
ରାଜଧାନୀରେ ଡ୍ୟାନ୍ସ ବାର ଆଳରେ ଏମିତି ଚାଲିଛି ଦେହ ବ୍ୟବସାୟ । ବାର ଲାଇସେନ୍ସ ନେଇ ଦେହ ବ୍ୟବସାୟ ଚଳାଇଛନ୍ତି କିଛି ବାର ମାଲିକ । ମାନୁ ନାହାନ୍ତି ଏକସାଇଜ କି ପୋଲିସର ନିୟମ । ନିୟମକୁ ବେଖାତିର କରି ନିଜ ପତି ଆରାରରେ ଚଳାଇଛନ୍ତି ଏଭଳି କାରବାର । ରାତି ବଢିଲେ ବାର୍ରେ ବଢେ ଗ୍ରାହକଙ୍କ ଭିଡ଼ । ବାର ଗାର୍ଲଙ୍କ ମଧ୍ୟରୁ ଯିଏ ଆସେ ପସନ୍ଦ ତାକୁ ଦିଆଯାଏ ସିଗ୍ନାଲ । ଗ୍ରାହକଙ୍କ ପସନ୍ଦ ବାର୍ ଗାର୍ଲ୍ ସହ ବିତାଇଥାନ୍ତି ସମୟ । ରେଟ୍ ଫିକ୍ସ କରିଥାନ୍ତି ବାର୍ ମାଲିକ ଓ ତାଙ୍କ ଲୋକ। ବାରଗାର୍ଲ୍ ବିରୋଧ କଲେ ବି ମାଲିକ ଦେଇଥାଏ ଧମକ । ଚାକିରି ଆଳରେ ଶେଷରେ ବାର୍ ଗାର୍ଲ୍ ଶୋଷଣର ଶିକାର ହେଉଥିବା ଅଭିଯୋଗ ହୋଇଛି ।
ରାଜଧାନୀରେ ଏବେ ଏମିତି ଢଙ୍ଗରେ ଚାଲିଛି ଦେହ ବ୍ୟବସାୟ । ସୁପ୍ରିମକୋର୍ଟରେ ଦେହଜୀବୀଙ୍କ ପାଇଁ ଅନୁମତି ମିଳିବା ପରେ ଏହାର ଫାଇଦା ନେଉଛନ୍ତି ଏଭଳି ସେକ୍ସ ରାକେଟ ଚଲାଇଥିବା ବାର୍ ମାଲିକ । ହେଲେ ବାର ଗାର୍ଲଙ୍କୁ ଏପରି ଶୋଷଣ ଏବେ ପଦାରେ ପଡ଼ିଛି । ସୂଚନା ଅନୁସାରେ ଏନେଇ ରାତି ଅଧିଆ ପୋଲିସ ଓ ଅବକାରୀ ଟିମ୍ ଚଢାଉ କରୁଛନ୍ତି । ହେଲେ ବାର୍ ମାଲିକଙ୍କ ଧୁସର ନୋଟରେ ସବୁକିଛି ଚାଲୁଥିବା ଚର୍ଚ୍ଚା ହେଉଛି ।
ଏହା ବି ପଢନ୍ତୁ- ରାଜଧାନୀରେ ବଙ୍ଗଳା ଦେହଜୀବୀ ସକ୍ରିୟ, ବେଧଡ଼କ ଚାଲୁଛି ଦେହ ବ୍ୟବସାୟ !
ଭୁବନେଶ୍ବରରେ ୨୦୨୨ରୁ ଏଯାବତ ସେକ୍ସ ରାକେଟ କାରବାର ଠାବ କରିପାରିନି କମିଶନରେଟ୍ ପୋଲିସ । ସେହିପରି ୨୦୨୧ ମସିହାରେ ସହିଦ ନଗର, ଲକ୍ଷ୍ମୀସାଗର ବୁଦ୍ଧେଶ୍ବରୀ କଲୋନିରେ ଧରାପଡିଥିଲା ସେକ୍ସ ରାକେଟ । ସେତେବେଳେ ସାମ୍ନାକୁ ଆସିଥିଲା ହୋମ ସର୍ଭିସର ସେକ୍ସ ରାକେଟ । ସେହିପରି ବଙ୍ଗଳା ଯୁବତୀ ନକଲି ଆଧାର କାର୍ଡରେ କିପରି ସେକ୍ସ ରାକେଟର ନେଟୱର୍କ ଚାଲିଥିଲା ତାହାର ନଜିର ମଧ୍ୟ ୨୦୧୯ ମସିହାରେ ସାମ୍ନାକୁ ଆଣିଥିଲା ଏସଟିଏଫ୍ ଟିମ ।
ସେହି ସମୟରେ ୧୫ରୁ ୧୯ ବଙ୍ଗଳା ଯୁବତୀ ଧରାପଡିବା ସହ ସର୍ଟ ଷ୍ଟେ ହୋମରେ ଥିବା ବେଳେ ସେମାନଙ୍କ ମଧ୍ୟରୁ ଅଧିକାଂଶ ଖସିଯାଇଥିଲେ । ତେବେ ସୁପ୍ରିମକୋର୍ଟର ନୂଆ ଅନୁମତି ପରେ ଏବେ ଆଖିବୁଜି ଦେଇଛି ପୋଲିସ । ସେକ୍ସ ରାକେଟ ବିଭିନ୍ନ ଆଳରେ ନୂଆ ଟ୍ରେଣ୍ଡରେ ଚାଲୁଥିଲେ ମଧ୍ୟ ନିୟମର ଆଳରେ ପୋଲିସ ଚୁପ ବସିଛି । ଯାହାର ଜ୍ବଳନ୍ତ ଉଦାହରଣ ହେଉଛି ଚଳିତ ୨୦୨୨ରେ ଗୋଟିଏ ବି ଏଭଳି ଘଟଣା ସାମ୍ନାକୁ ଆଣି ପାରିନାହିଁ ପୋଲିସ ।
ଇଟିଭି ଭାରତ, ଭୁବନେଶ୍ବର
