ହାଇଦ୍ରାବାଦ: ଚାମ୍ପିଆନ୍ସ ଟ୍ରଫି ଆରମ୍ଭ ପୂର୍ବରୁ ଟିମ୍ ଇଣ୍ଡିଆକୁ ଲାଗିଲା ବଡ ଝଟକା । ବିସ୍ଫୋରକ ବ୍ୟାଟର ଓ୍ବିକେଟ କିପର ରିଷଭ ପନ୍ତ ଆହତ । ରବିବାର ଭାରତୀୟ ଟିମ୍ ଦୁବାଇରେ ପ୍ରଥମ ନେଟ୍ ପ୍ରାକ୍ଟିସ୍ ଆରମ୍ଭ କରିଥିଲା । ତେବେ ପ୍ରଥମ ପ୍ରାକ୍ଟିସ୍ ସେସନରେ ଭାରତ ପାଇଁ ଆହତ ସମସ୍ୟା ମୁଣ୍ଡ ଟେକିଛି । ଟାଇମ୍ ଅଫ୍ ଇଣ୍ଡିଆ ରିପୋର୍ଟ ମୁତାବକ, ଓ୍ବିକେଟକିପର -ବ୍ୟାଟର ରିଷଭ ପନ୍ତଙ୍କ ଆଣ୍ଠୁରେ ବଲ ବାଜିଥିଲା । ଏହା ପରେ ପନ୍ତ ଯନ୍ତ୍ରଣାରେ ଛଟପଟ ହେବା ସହିତ ଆହତ ହୋଇଥିଲେ ।
Rishabh Pant got hit on his knees 👀
— Nikhil (@TheCric8Boy) February 16, 2025
- hope this is not serious 🙏 pic.twitter.com/Nz4e93Jf1b
ଦୁବାଇରେ ଶନିବାର ପହଞ୍ଚିଥିଲା ଟିମ୍ ଇଣ୍ଡିଆ । ମେଗା ଆଇସିସି ଇଭେଣ୍ଟ ଫେଭରେଟ ଟିମ୍ ହେଇଛି ଭାରତୀୟ ଦଳ । ଆଉ ଭାରତୀୟ ଦଳ ଦୁବାଇରେ ପହଞ୍ଚିବା ପରେ ଫ୍ୟାନ୍ସଙ୍କ ଉତ୍ସାହ କହିଲେ ନସରେ । ଟିମ୍ ଇଣ୍ଡିଆକୁ ଜବରଦସ୍ତ ସ୍ୱାଗତ ସମ୍ୱର୍ଦ୍ଧନା କରିଥିଲେ ଫ୍ୟାନ୍ସ । ଏପଟେ ଦୁବାଇରେ ପହଞ୍ଚୁ ପହଞ୍ଚୁ ପ୍ରାକ୍ଟିସ୍ ଆରମ୍ଭ କରିଦେଇଥିଲା ଟିିମ୍ ଇଣ୍ଡିଆ । କାରଣ ଭାରତୀୟ ଦଳ ଏଠାରେ ହିଁ ଚାମ୍ପିଆନ୍ସ ଟ୍ରଫି ମ୍ୟାଚ ଖେଳିବ ।
ପନ୍ତ ୱିକେଟ୍ କିପିଂ ଡ୍ରିଲ୍ କରୁଥିବାବେଳେ, ଏକ ଚିନ୍ତାର ମୁହୂର୍ତ୍ତ ଘଟିଥିଲା । ହାର୍ଦ୍ଦିକ ପାଣ୍ଡ୍ୟାଙ୍କ ଏକ ସ୍ଲାସ୍ 27 ବର୍ଷିୟାଙ୍କ ଆଣ୍ଠୁରେ ଆଘାତ କରିଥିଲା ଏବଂ ପରବର୍ତ୍ତୀ ମୁହୂର୍ତ୍ତରେ ସେ ତଳେ ପଡିଯାଇଥିଲେ। ଫିଜିଓ ଏବଂ ମେଡିକାଲ୍ ଟିମ୍ ସଙ୍ଗେସଙ୍ଗେ ପନ୍ତଙ୍କ ପାଖରେ ପହଞ୍ଚିଥିଲେ । ଏହା ପରେ କିଛି ସମୟ ପରେ ଠିଆ ହୋଇଥିଲେ ବିସ୍ଫୋରକ ବ୍ୟାଟର୍ ପନ୍ତ । ପରେ ପାଣ୍ଡ୍ୟା ତାଙ୍କ ଆହତ ସମସ୍ୟା ନେଇ ଯାଞ୍ଚ କରିଥିଲେ ଏବଂ ଉଭୟ ଖେଳାଳି ଆଲିଙ୍ଗନ କରିଥିଲେ । ଅଭ୍ୟାସ ଅଧିବେଶନ ଶେଷ ହେବା ପରେ ବାମହାତୀ ବ୍ୟାଟ୍ସମ୍ୟାନ ଡ୍ରେସିଂ ରୁମକୁ ଅଗ୍ରସର ହୋଇଥିଲେ ଏବଂ ବସ୍ରେ ଯିବାବେଳେ ମଧ୍ୟ କ୍ରମାଗତ ଭାବରେ ଛୋଟେଇ ଛୋଟେଇ ଚାଲିଥିଲେ ।
ପନ୍ତଙ୍କ ଆଣ୍ଠୁରେ ଆଘାତ ଲାଗିଥିବାରୁ ଭାରତୀୟ ପ୍ରଶଂସକମାନେ ଆଶା କରିବେ ଯେ ସେଭଳି କୌଣସି ଗୁରୁତର ଆହତ ସମସ୍ୟା ନ ଉପୁଜୁ ଏବଂ ପନ୍ତ ସମସ୍ତ ମ୍ୟାଚ ପାଇଁ ପ୍ରସ୍ତୁତ ରୁହନ୍ତୁ । 2017 ଚାମ୍ପିଅନ୍ସ ଟ୍ରଫିରେ ଭାରତ ରନର୍ ଅପ୍ ହୋଇଥିଲା ଏବଂ ଦଳ ଏଥର ଚାମ୍ପିଆନ ପାଇଁ ଖେଳିବ ।
ଚାମ୍ପିଅନ୍ସ ଟ୍ରଫି ଫେବୃଆରୀ 19 ରୁ ଆରମ୍ଭ ହେବାକୁ ଯାଉଛି ଏବଂ ଟୁର୍ଣ୍ଣାମେଣ୍ଟ ଓପନର୍ କରାଚି ଜାତୀୟ ଷ୍ଟାଡିୟମରେ ପାକିସ୍ତାନ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଖେଳାଯିବ | ଗ୍ରୁପ୍ ଏ’ରେ ନ୍ୟୁଜିଲ୍ୟାଣ୍ଡ, ବାଂଲାଦେଶ ଏବଂ ପାକିସ୍ତାନ ସହିତ ଭାରତ ସ୍ଥାନିତ ହୋଇଛି । ବହୁ ପ୍ରତୀକ୍ଷିତ ଭାରତ ବନାମ ପାକିସ୍ତାନ ମ୍ୟାଚ 23 ଫେବୃଆରୀରେ ଖେଳାଯିବ ।
