ଭୁବନେଶ୍ବର: ରାଜ୍ୟରେ ବଢ଼ିଲା ଫାର୍ମାସିଷ୍ଟ ଓ ଲ୍ୟାବ୍ ଟେକ୍ନିସିଆନ ପଦବୀ । ରାଜ୍ୟରେ ଉନ୍ନତମାନର ସ୍ୱାସ୍ଥ୍ୟ ସେବା ଯୋଗାଇ ଦେବା ପାଇଁ ଅନେକ ପଦକ୍ଷେପ ନେଉଛନ୍ତି ରାଜ୍ୟ ସରକାର । ରାଜ୍ୟରେ ଥିବା ଫାର୍ମାସିଷ୍ଟ ଓ ଲ୍ୟାବ୍ ଟେକନିସିଆନଙ୍କ ପଦବୀ ସଂଖ୍ୟାରେ ବୃଦ୍ଧି କରାଯାଇଛି । ଯାହା ଫଳରେ ରୋଗୀମାନେ ହସ୍ପିଟାଲକୁ ଆସି ଯେଭଳି ସଠିକ ଭାବରେ ଚିକିତ୍ସା ପାଇପାରିବେ ସେନେଇ ପଦକ୍ଷେପ ନିଆଯାଇଛି ।
ଲ୍ୟାବ୍ ଟେକ୍ନିସିଆନ କ୍ୟାଡରରେ ସହକାରୀ ନିର୍ଦ୍ଦେଶକ ଓ ମୁଖ୍ୟ ଟେକ୍ନିକାଲ ଅଫିସର ପାଇଁ ନୂଆ ପଦବୀ ସୃଷ୍ଟି କରାଯାଇଛି । ଏବେ ଲ୍ୟାବ ଟେକ୍ନିସିଆନ କ୍ୟାଡରରେ ପଦବୀ ସଂଖ୍ୟା ବୃଦ୍ଧି ପାଇ ୨ହଜାର ୫୮୧ ହୋଇଛି । ସେହିପରି ଫାର୍ମାସିଷ୍ଟ କ୍ୟାଡରରେ ପଦବୀ ସଂଖ୍ୟା ବୃଦ୍ଧି ହୋଇ ୫,୦୦୯ ରେ ପହଞ୍ଚିଛି । ଚିଫ୍ ଫାର୍ମାସିଷ୍ଟ ଅଫିସର ପରି ନୂଆ ପଦବୀ ମଧ୍ୟ ସୃଷ୍ଟି ହୋଇଛି । ଏପଟେ ଜନସ୍ୱାସ୍ଥ୍ୟ ସୁବିଧା ବୃଦ୍ଧି, ସରକାରୀ ହସ୍ପିଟାଲରେ ରୋଗୀ ଭାର ବଢିବା ଏବଂ ନିରାମୟ ଅଧୀନରେ ଥିବା ଔଷଧ ବଣ୍ଟନ କେନ୍ଦ୍ର ସଂଖ୍ୟାକୁ ଦୃଷ୍ଟିରେ ରଖି ସ୍ୱାସ୍ଥ୍ୟ ବିଭାଗ ଓଡିଆ ଫାର୍ମାସିଷ୍ଟ ସେବା କ୍ୟାଡରକୁ ସୁଗମ କରିଛନ୍ତି । ଫାର୍ମାସିଷ୍ଟ, ସିନିୟର ଫାର୍ମାସିଷ୍ଟ, ମୁଖ୍ୟ ଫାର୍ମାସିଷ୍ଟ ଏବଂ ଅତିରିକ୍ତ ନିର୍ଦ୍ଦେଶକ ଆଦି ପଦବୀ ସୃଷ୍ଟି କରାଯାଇଛି ।
ସୂଚନା ଅନୁଯାୟୀ, କିଛି ଦିନ ପୂର୍ବେ ସରକାରୀ ମେଡିକାଲ କଲେଜରେ ନୂଆ ସହକାରୀ ପ୍ରଫେସରଙ୍କୁ ନିଯୁକ୍ତି ଦେଇଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ରାଜ୍ୟରେ ରୋଗୀମାନେ କିଭଳି ଭାବରେ ଉତ୍ତମ ଚିକିତ୍ସା ପାଇବା ସରକାରୀ ମେଡ଼ିକାଲ ଗୁଡ଼ିକ ଉନ୍ନତ ହୋଇପାରିବ ସେଥିପାଇଁ ପଦକ୍ଷେପ ନିଆଯାଉଛି । BSKY ଯୋଜନାରେ ସରକାରୀ ବା ବେସରକାରୀ ହସ୍ପିଟାଲରେ ସମସ୍ତଙ୍କୁ ମାଗଣା ଚିକିତ୍ସା ମିଳିପାରୁଛି । ସରକାରୀ ମେଡିକାଲ କଲେଜ ଓ ହସ୍ପିଟାଲ ଆଦିରେ ଉନ୍ନତମାନର ସ୍ବାସ୍ଥ୍ୟସେବା ସହ ଚିକିତ୍ସା ଯୋଗାଇଦେବା ସମସ୍ତଙ୍କ ଦାୟିତ୍ବ । ଏନେଇ ସରକାରୀ ହସ୍ପିଟାଲରେ ନୂଆ ଆଧୁନିକ ଚିକିତ୍ସାର ଭିତ୍ତିଭୂମି ଯୋଗାଇ ଦିଆଯାଉଛି ।
