ଭୁବନେଶ୍ବର: କଳିଙ୍ଗ ହସ୍ପିଟାଲରେ ଚଢାଉ । ଜିଲ୍ଲା ପ୍ରଶାସନ ଓ ସ୍ଵାସ୍ଥ୍ୟ ବିଭାଗର ପିସିପି ଏନଡିଟି ସେଲ ପକ୍ଷରୁ , ସୋମବାର ମିଳିତ ଭାବେ କଳିଙ୍ଗ ହସ୍ପିଟାଲରେ ଚଢାଉ କରାଯାଇଛି। ଏହି ସମୟରେ ଦୁଇ ଅଲ୍ଟ୍ରାସାଉଣ୍ଡ ମେସିନ ସିଲ କରିବା ସହ ଡାକ୍ତରଖାନାରେ ପିସିପି ଏନଡିଟି ଆଇନ କିଭଳି କାର୍ଯ୍ୟକାରୀ ହେଉଛି ତାହାର ଟିକିନିଖି ଯାଞ୍ଚ କରିଛି ଟିମ୍ ।
ଡାକ୍ତରଖାନାରେ ବେଆଇନ କାର୍ଯ୍ୟ କରାଯାଉଥିବା ଯାଞ୍ଚ ସମୟରେ ଦେଖିବାକୁ ପାଇଥିଲା ଏହି ଟିମ୍ । ଏହା ସହ ଅଲ୍ଟ୍ରାସାଉଣ୍ଡ କରୁଥିବା ପ୍ରସୂତି ମାନଙ୍କର ରେର୍କଡ ପତ୍ର ମଧ୍ୟ ଠିକ୍ ଭାବେ ମିଳିନଥିଲା। ପ୍ରସୂତିମାନଙ୍କ ପାଇଁ
ଉଦିଷ୍ଟ ଫର୍ମ 'ଏଫ' ରେ ଅଲ୍ଟ୍ରାସାଉଣ୍ଡ କରୁଥିବା ଡାକ୍ତରଙ୍କ ଦସ୍ତଖତ ବାଧ୍ୟତା ମୂଳକ ଥିବାବେଳେ ଅନେକ ଫର୍ମରେ ଡାକ୍ତରଙ୍କ ଦସ୍ତଖତର ଚିହ୍ନବର୍ଣ୍ଣ ନଥିଲା। ଏପ୍ରକାର ଘଟଣାକୁ ଅନୁଧ୍ୟାନ କରିବା ପରେ ଗର୍ଭସ୍ଥ ଶିଶୁମାନଙ୍କର ଲିଙ୍ଗ ନିରୂପଣ ଏଠାରେ ହେଉଥିବା ନେଇ ସନ୍ଦେହ ପ୍ରକଟ କରିଛନ୍ତି ଯାଞ୍ଚ ଅଧିକାରୀ ।
ଆଇନ ଉଲଙ୍ଘନ ଅଭିଯୋଗରେ କଳିଙ୍ଗ ହସ୍ପିଟାଲରୁ ଦୁଇଟି ଅଲ୍ଟ୍ରାସାଉଣ୍ଡ ମେସିନକୁ ସିଲ କରାଯାଇଛି । ସମାନ ଅଭିଯୋଗରେ ପୂର୍ବରୁ ମଧ୍ୟ ଗୋଟିଏ ଅଲଟ୍ରା ସାଉଣ୍ଟ ମେସିନ ସିଲ କରିଥିଲା ପ୍ରଶାସନ । ଡ଼ାକ୍ତରଖାନାରେ ବେଆଇନ କାର୍ଯ୍ୟଚାଲୁଥିବା ଅଭିଯୋଗ ଆଧାରରେ କର୍ତ୍ତୃପକ୍ଷଙ୍କ ବିରୋଧରେ ମାମଲା ରୁଜୁ କରାଯାଇଛି।
ଜିଲ୍ଲା ପ୍ରଶାସନ ପକ୍ଷରୁ ଏହି ଟିମରେ ଜିଲ୍ଲାପାଳଙ୍କ ସମେତ ଖୋର୍ଦ୍ଧା ସିଡିଏମଓ ଏବଂ ସ୍ଵାସ୍ଥ୍ୟ ବିଭାଗର ବରିଷ୍ଠ ଅଧିକାରୀ ମାନେ ମଧ୍ୟ ସାମିଲ ରହିଥିଲେ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
