ସାଙ୍ଗଙ୍କୁ ଭେଟିବା ପାଇଁ ଅର୍ଥ ସାଜିଛି ବାଧକ, ରାଷ୍ଟ୍ରପତି ଦୌପଦୀ ମୁର୍ମୁଙ୍କ ବାଟ ଚାହିଁ ବସିଛନ୍ତି ଗୌରୀ

ସାଙ୍ଗକୁ ଭେଟିବା ପାଇଁ ବ୍ୟାକୁଳ ଥିଲେ ବି ସୁଯୋଗ ପାଉନି ସାଙ୍ଗ । ଜଣେ ଭାରତର ସର୍ବୋଚ୍ଚ ପଦରେ ଥିବାବେଳେ ଆଉ ଜଣେ ଜରିପାଲ ତଳେ ଜୀବନ କାଟୁଛି । ପଢନ୍ତୁ ଆଉ ଏକ କୃଷ୍ଣ ସୁଦାମାର କାହାଣୀ

ଖୋର୍ଦ୍ଧା: ସାଙ୍ଗକୁ ଭେଟିବା ପାଇଁ ବ୍ୟାକୁଳ ଥିଲେ ବି ସୁଯୋଗ ପାଉନି ସାଙ୍ଗ । ଜଣେ ଭାରତର ସର୍ବୋଚ୍ଚ ପଦରେ ଥିବାବେଳେ ଆଉ ଜଣେ ଜରିପାଲ ତଳେ ଜୀବନ କାଟୁଛି । ଏଭିଳି କଥା କୃଷ୍ଣ ଆଉ ସୁଦାମାଙ୍କ କାହାଣୀ ଆଉ ସ୍ମୃତିକୁ ମନେ ପକାଉଛି । ଦିନ ଥିଲା ଗୋଟିଏ ଘରେ ଗୋଟିଏ ଯାଗାରେ ଖାଉଥିଲେ ସୁଖ ଦୁଃଖ ହେଉଥିଲେ ଆଉ ମନକୁ ଆନମନା କରୁଥିବା ପ୍ରଶ୍ନର ଉତ୍ତର ସାଙ୍ଗଠାରୁ ଖୋଜୁଥିଲେ । କିନ୍ତୁ ସମୟ ବଦଳିବା ସହ ଜଣେ ସାଙ୍ଗ ଦେଶର ସର୍ବୋଚ୍ଚ ପଦ ଅର୍ଥାତ ରାଷ୍ଟ୍ରପତି ଆସନ ଅଳଙ୍କୃତ କରିଛି । ହେଲେ ଅନ୍ୟ ଜଣେ ସାଙ୍ଗ ନିଜ ଭାଗ୍ୟକୁ ଆଦରି ଚାଳ ଛପର ଘରେ ପଡି ରହିଛନ୍ତି ।

ଏହିପରି ଭାବେ ରାଷ୍ଟ୍ରପତି ଦୌପଦୀ ମୁର୍ମୁଙ୍କ ବନ୍ଧୁ ଜରିପାଲ ତଳେ ଜୀବନ କାଟୁଛନ୍ତି । ସାଙ୍ଗକୁ ଭେଟିବାକୁ ଇଚ୍ଛା ଥିଲେ ବି ତାଙ୍କ ପାଇଁ ଅର୍ଥ ପ୍ରତିବନ୍ଧକ ସାଜିଛି । ଭାରତର ପ୍ରଥମ ନାଗରିକ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସହ ପିଲାବେଳେ କଟାଇଥିବା ସ୍ମୃତିକୁ ସାଇତି ରଖି ଏବେବି ତାଙ୍କ କଥା ମନେ ପକାଉଛନ୍ତି ଖୋର୍ଦ୍ଧା ଜିଲ୍ଲା ଦୁର୍ଗାପୁର ଗ୍ରାମର ଗୌରୀ ମଲ୍ଲିକ । ମହାମହିମ ରାଷ୍ଟ୍ରପତି ଓଡିଶା ଆସିଲେ ତାଙ୍କ ପିଲାବେଳର ସାଙ୍ଗମାନେ ରାଷ୍ଟ୍ରପତିଙ୍କୁ ଭେଟୁଥିବାବେଳେ ଗୌରୀ କିନ୍ତୁ ସାକ୍ଷାତ କରିବାରୁ ବଞ୍ଚିତ ହୋଇଛନ୍ତି । ପିଲା ଦିନର ସାଙ୍ଗକୁ ଭେଟି ନପାରି ଦୁଃଖ ପ୍ରକାଶ କରିଛନ୍ତି ଗୌରୀ ।

ପିଲାଦିନର ସ୍ମୃତିକୁ ମନେ ପକାଇ ଗୌରୀ କହିଛନ୍ତି, "ସେ ମୋର ସବୁଠୁ ଭଲ ସାଙ୍ଗ । ଆମେ ହଷ୍ଟେଲରେ ମିଳିମିଶି ରହୁଥିଲୁ । ସେ ଏବେ ଦେଶର ସର୍ବୋଚ୍ଚ ପଦବୀରେ ଥିବା ଜାଣି ଖୁବ ଖୁସି ଓ ଗର୍ବିତ ଲାଗୁଛି । ଅନେକ ଥର ଭେଟିବାକୁ ଚାହୁଁଥିଲେ ମଧ୍ୟ ସମ୍ଭବ ହୋଇପାରିନି ।" ତେବେ ମହାମହିମ ତାଙ୍କୁ ନିଶ୍ଚୟ ଭେଟିବେ ଓ ପିଲାବେଳର ସ୍ମୃତିକୁ ପୁଣିଥରେ ମନେ ପକେଇବେ ବୋଲି ଆଶା ରଖିଛନ୍ତି ଗୌରୀ । ମହାମହିମ ରାଷ୍ଟ୍ରପତିଙ୍କ ପିଲାବେଳର ବାନ୍ଧବୀ ଗୌରୀ ରାଷ୍ଟ୍ରପତି ଦୌପଦୀ ମୁର୍ମୁଙ୍କୁ ଭେଟିବାକୁ ଅପେକ୍ଷା କରି ରହିଛନ୍ତି ।

ଇଟିଭି ଭାରତ, ଖୋର୍ଦ୍ଧା