ଭୁବନେଶ୍ବର: ଦିନକୁ ଦିନ ଘନେଇବାରେ ଲାଗିଛି ଆବାସ ବିବାଦ । କାହିଁକି ଯୋଗ୍ୟ ହିତାଧିକାରୀ ଚୟନ ହୋଇପାରିନାହାନ୍ତି ଏବଂ ତାଲିକାରୁ ବାଦ ପଡିଥିବା ହିତାଧିକାରୀଙ୍କ କଥା କିଏ ବୁଝିବ । ଏହି ପ୍ରଶ୍ନ ସେତେବେଳେ ଉଠିଛି ଯେତେବେଳେ ବିଜେପି ସମସ୍ତ ବ୍ଲକସ୍ତରରେ ଆନ୍ଦୋଳନ ଆରମ୍ଭ କରିଛି । ତେବେ ଘଟଣାକୁ ନେଇ ଚର୍ଚ୍ଚା ଆଲୋଚନା ଜାରି ରହିଥିବା ବେଳେ ବରିଷ୍ଠ ରାଜନେତା ଦାମ ରାଉତ ଘଟଣାକୁ ନେଇ ବିଜେପି ଓ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି । ରାଜ୍ୟ ସରକାରଙ୍କ ପ୍ରସଙ୍ଗରେ ବିଜେପି ଅଯଥା ବିବାଦ ସୃଷ୍ଟି କରୁଥିବା ସେ ଅଭିଯୋଗ କରିଛନ୍ତି । ସେପଟେ 2024 ପୂର୍ବରୁ ଯିଏ ବସହରାଙ୍କୁ ଘର ଯୋଗାଇବ ସେ ଫାଇଦା ନେବ ବୋଲି କହିଛନ୍ତି ବରିଷ୍ଠ ରାଜନୀତି ସମୀକ୍ଷକ ରବି ଦାସ ।
"ଆବାସ ବଣ୍ଟନରେ କେନ୍ଦ୍ରମନ୍ତ୍ରୀଙ୍କ ହସ୍ତକ୍ଷେପ ଅଗ୍ରହଣୀୟ": ବରିଷ୍ଠ ରାଜନେତା ଦାମୋଦର ରାଉତ କହିଛନ୍ତି, "ବାସହୀନ ପରିବାରକୁ ବାସ ଯୋଗାଇ ଦେବା ରାଜ୍ୟ ସରକାରଙ୍କ ଦାୟିତ୍ବ । କାରଣ ଏହା ରାଜ୍ୟ ସରକାରଙ୍କ ବିଷୟ । ରାଜ୍ୟ ସରକାର ଏହି ଦାୟିତ୍ବ ତୁଲାଇବାକୁ ହେଲେ ସଂଘୀୟ ସମ୍ବିଧାନ ଅନୁସାରେ କେନ୍ଦ୍ର ସରକାର ସହାୟତା ଯୋଗାଇବାକୁ ବାଧ୍ୟ । ମାତ୍ର ହିତାଧିକାରୀ ଚୟନ, କାର୍ଯ୍ୟାଦେଶ ପ୍ରଦାନ ଏବଂ ନିର୍ମାଣ ସମ୍ପର୍କରେ କେନ୍ଦ୍ର ସରକାର କିମ୍ବା କେନ୍ଦ୍ରମନ୍ତ୍ରୀମାନେ ଅଯଥା ବିବାଦ ସୃଷ୍ଟି କରିବା ଗ୍ରହଣୀୟ ନୁହେଁ ।"
"କେନ୍ଦ୍ର ସରକାରଙ୍କ ସହାୟତା ସମୁଦ୍ରକୁ ଶଙ୍ଖେ": ଓଡିଶାର ମୋଟ ଜନସଂଖ୍ୟାର 24 ପ୍ରତିଶତ ଆଦିବାସୀ ଏବଂ 16 ପ୍ରତିଶତ ହରିଜନ । ଏମାନେ ଅସ୍ଥାୟୀ ଚାଳ ଘରେ ବାସ କରୁଥିବା ପରିବାର । ଏହି ଦୃଷ୍ଟିରୁ ଦେଖିଲେ ବାସହୀନ ପରିବାରଙ୍କ ସଂଖ୍ୟା ଅନ୍ୟ ରାଜ୍ୟ ତୁଳନାରେ ଓଡିଶାରେ ଅଧିକ । ଏସବୁ ଦୃଷ୍ଟିରୁ ବିଚାର କଲେ ଚଳିତବର୍ଷ ଯେଉଁ 8 ଲକ୍ଷ 50 ହଜାର ଗୃହ ପ୍ରଧାନମନ୍ତ୍ରୀ ଆବାସ ଯୋଜନାରେ କେନ୍ଦ୍ର ସରକାର ଯୋଗାଇଛନ୍ତି, ତାହା ସମୁଦ୍ରକୁ ଶଙ୍ଖେ ବୋଲି ଦାମ ରାଉତ କହିଛନ୍ତି । ଇଚ୍ଛାକୃତ ଭାବରେ ଓଡିଶାରେ କେନ୍ଦ୍ରମନ୍ତ୍ରୀ ଏବଂ ଭାରତୀୟ ଜନତା ପାର୍ଟି ଜନ ଅସନ୍ତୋଷ ସୃଷ୍ଟି କରି ଫାଇଦା ହାସଲ କରିବା ପାଇଁ ଷଡଯନ୍ତ୍ର କରୁଥିବା ଅଭିଯୋଗ କରିଛନ୍ତି ଦାମ ।
ଯିଏ ଘର ଦେବ, ତାର ଫାଇଦା: ଅନ୍ୟପକ୍ଷରେ ରାଜନୈତିକ ସମୀକ୍ଷକ ରବି ଦାସ କହିଛନ୍ତି, "2024 ନିର୍ବାଚନ ପୂର୍ବରୁ ବିଜେଡି ହେଉ କି ବିଜେପି, ଯିଏ ଲୋକଙ୍କ ପାଖରେ ଘର ପହଞ୍ଚାଇଲା, ଲୋକେ ତାକୁ ଗ୍ରହଣ କରିବେ । ବଳକା ଲୋକଙ୍କୁ ଘର ଦେବା ପାଇଁ ରାଜ୍ୟ ସରକାର ଯେଉଁ ପ୍ରତିଶ୍ରୁତି ଦେଇଛନ୍ତି ତାହା ଯଦି ପୂରଣ କରନ୍ତି ଏବଂ 15 ଲକ୍ଷ ଟାର୍ଗେଟ ପୂରଣ କରନ୍ତି, ତେବେ ଭୋଟର ବିଜେଡି ପ୍ରତି ଆକୃଷ୍ଟ ହେବେ । ଏହା ପୂର୍ବରୁ ଯଦି ବିଜେପି ଯୋଗ୍ୟ ହିତାଧିକାରୀଙ୍କୁ ଘର ବାଣ୍ଟେ, ତେବେ ବିଜେପି ମଧ୍ୟ ଫାଇଦାରେ ରହିବାର ସମ୍ଭାବନା ଅଛି ।
ସଂଘୀୟ ବ୍ୟବସ୍ଥାରେ ରାଜ୍ୟ ସରକାରଙ୍କ ଲକ୍ଷ୍ୟ ହାସଲ ପାଇଁ କେନ୍ଦ୍ର ସରକାର ପାଣ୍ଠି ଯୋଗାଇ ଦେବା କଥା । କାରଣ ଏହା କେନ୍ଦ୍ର ସରକାରଙ୍କ ନିଜସ୍ବ ପାଣ୍ଠି ନୁହେଁ । ରାଜ୍ୟମାନଙ୍କ ଠାରୁ ସଂଗୃହିତ କେନ୍ଦ୍ରୀୟ ଟିକସକୁ ନେଇ ଯେଉଁ ପାଣ୍ଠି ଗଠିତ ହୁଏ ରାଜ୍ୟମାନଙ୍କ ସମବିକାଶ ପାଇଁ ଏହି ପାଣ୍ଠି ବଣ୍ଟନ କରିବା କେନ୍ଦ୍ର ସରକାରଙ୍କ ଦାୟିତ୍ବ । ତେବେ ରାଜନୈତିକ ଫାଇଦା ହାସଲ ପାଇଁ ଏବେ ମୋଦି ସରକାର ଏବଂ ବିଜେପି ଯେଉଁ ନାଟକବାଜି ଆରମ୍ଭ କରିଛନ୍ତି, ତାର ଜବାବ ଓଡିଶାବାସୀ ନିଶ୍ଚୟ ଦେବେ ବୋଲି କହିଛନ୍ତି ଦାମ । ତେବେ ବିଜେପି ଓ ବିଜେଡି ମଧ୍ୟରେ ଆରମ୍ଭ ହୋଇଥିବା ଏହି ଆବାସ ଯୁଦ୍ଧର ଫଳାଫଲ କାହା ସପକ୍ଷରେ ଯାଉଛି, ଏବେ ତାହାକୁ ହିଁ ଅପେକ୍ଷା ।
ଇଟିଭି ଭାରତ, ଭୁବନେଶ୍ବର
