ଭୁବନେଶ୍ବର: ୧୮୧୭ ମସିହାରେ ହୋଇଥିବା ପ୍ରଥମ ପାଇକ ବିଦ୍ରୋହକୁ ଜାତୀୟ ମାନ୍ୟତା ପାଇଁ କସରତ ଚାଲିଥିବା ବେଳେ ଏହାକୁ ନେଇ ରାଜନୈତିକ ବିତର୍କ ବଢ଼ିବାରେ ଲାଗିଛି । ଏହାରି ମଧ୍ୟରେ ଖୋର୍ଦ୍ଧାରେ ପାଇକ ସ୍ମାରକୀ ନିର୍ମାଣ ପାଇଁ କେନ୍ଦ୍ରର ବିଜେପି ସରକାର ୨୦୦ କୋଟି ଟଙ୍କା ଅନୁଦାନ ମଞ୍ଜୁର କରିଛନ୍ତି । ଗୋଟିଏ ପଟେ କେନ୍ଦ୍ର ସରକାର ଏହି ଆନ୍ଦୋଳନକୁ ଜାତୀୟ ମାନ୍ୟତା ନଦେଇ ଚୁପ ବସିଛନ୍ତି ବୋଲି ଅଭିଯୋଗ କରିଛନ୍ତି ରାଜ୍ୟ ସରକାର । ଏହାପରେ ଏହାକୁ ନେଇ ଆରମ୍ଭ ହୋଇଯାଇଛି ରାଜନୈତିକ ବୟାନବାଜି । ଅନ୍ୟପଟେ କଂଗ୍ରେସ ଏହି ପ୍ରସଙ୍ଗରେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କୁ ଟାର୍ଗେଟ କରିଛି । ଉଭୟ ସରକାର ଏନେଇ ଆଲୋଚନା କରି କାର୍ଯ୍ୟକ୍ରମ ହାତକୁ ନେବା କଥା ବୋଲି କହିଛନ୍ତି ପିସିସି ସଭାପତି ।
ଏନେଇ ବିଜେପି ବିଧାୟକ ଲଳିତେନ୍ଦୁ ମହାପାତ୍ର କହିଛନ୍ତି, "ଇତିହାସ କହିବ ପାଇକ ବିଦ୍ରୋହ କଣ । ତର୍ଜମା ହେଉ, ବିତର୍କ ହେଉ । ଖାଲି ବିଧାନସଭାରେ ଚିଠି ଲେଖିଦେଲେ ଇତିହାସର ପୁନର୍ଲିଖନ ହୁଏନାହିଁ । ବିଧାନସଭାରେ ସଂକଳ୍ପ ପାରିତ ହୋଇଗଲେ ମାନ୍ୟତା ମିଳିବ ନାହିଁ । ଏଥିପାଇଁ ଆନ୍ତରିକତା ଦରକାର ।" ଏହା ସହିତ କଂଗ୍ରେସକୁ ମଧ୍ୟ କଟାକ୍ଷ କରିଛନ୍ତି ଲଳିତେନ୍ଦୁ । ତେବେ ଉଭୟ ରାଜ୍ୟ ଓ କେନ୍ଦ୍ର ସରକାର ଏନେଇ ଆଲୋଚନା କରି ଏକ ନିଷ୍କର୍ଷରେ ପହଞ୍ଚିବା ପାଇଁ ସେ ଅନୁରୋଧ କରିଛନ୍ତି । ସେପଟେ ବିଜେଡି ବିଧାୟକ ପର୍ଶୁରାମ ଧଡ୍ଡା କହିଛନ୍ତି, "ଓଡିଶା ସରକାରଙ୍କର ଯଦି ଦରଦ ନଥାନ୍ତା, ତାହେଲେ ସେ ପାଇକ ସ୍ମାରକୀ ପାଇଁ କାହିଁକି ଜମି ଯୋଗାଇ ଦେଇଥାନ୍ତେ ? ବିଜେପି ଭୁଲ କଥା କହୁଛି । ଭିତ୍ତିହୀନ କଥା କହୁଛି ବିଜେପି ।" କେନ୍ଦ୍ର ସରକାର ଏନେଇ ରାଜନୀତି କରୁଛନ୍ତି ବୋଲି କହିଛନ୍ତି ବିଜେଡି ବିଧାୟକ ।
