ଖୋର୍ଦ୍ଧା: ଜିଲ୍ଲାର ବେଗୁନିଆ ଅଞ୍ଚଳରେ ବଢୁଛି ଦେଶୀ ମଦ ବେପାର । ତୃତୀୟ ଥର ପାଇଁ ବେଗୁନିଆ ପୋଲିସକୁ ସଫଳତା ମିଳିଛି । ମଦଭାଟିରେ ଚଢାଉ କରି ବ୍ୟାପକ ପୋଚ ଓ ମଦ ଜବତ କରିଛି ପୋଲିସ ।
ମଦଭାଟି ଉପରେ ପୋଲିସର ଚଢ଼ାଉ
ସୂଚନାଅନୁସାରେ, ମଦ ବ୍ୟବସାୟୀମାନେ ଜଙ୍ଗଲ ଭିତରେ ମଦ ରାନ୍ଧି ବିକ୍ରି କରି ବେଶ୍ ଲାଭବାନ ହେଉଥିବା ଜଣାପଡିଛି । ସେପଟେ ଏହି ମଦ ବ୍ୟବସାୟୀଙ୍କ ଉପରେ କଡା ନଜର ରଖିଥିଲା ପୋଲିସ । ଆଗରୁ ଦୁଇଥର ମଦଭାଟି ଉପରେ ପୋଲିସ ଚଢାଉ କରିଥିଲା । ରବିବାର ବେଗୁନିଆ ଥାନା ଅନ୍ତର୍ଗତ ରାଷୋଳ କାଜୁବଗିଚାରେ ମଦ ରନ୍ଧା ହେଉଥିବା ବିଶେଷ ସୂତ୍ରରୁ ଖବର ପାଇ ବେଗୁନିଆ ଥାନା ଅଧିକାରୀ ସଦଳବଳେ ତୃତୀୟ ଥର ପାଇଁ ଚଢ଼ାଉ କରିଥିଲା ।
ଚଢାଉରେ 3ହଜାର ଲିଟର ପୋଚ ନଷ୍ଟ କରିବା ସହ 100 ଲିଟର ଦେଶୀ ମଦ ଜବତ ହୋଇଛି । ପୋଲିସ ଚଢ଼ାଉ ସମ୍ପର୍କରେ ଜାଣିପାରି ମଦ ବେପାରୀମାନେ ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡିଛି । ପୋଲିସ ବେଗୁନିଆ ଅଞ୍ଚଳରେ ମଦ ବେପାରୀଙ୍କୁ ଧରିବା ପାଇଁ କଡା ନଜର ରଖିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
