ଭୁବନେଶ୍ବର: ସଡ଼କ ଦୁର୍ଘଟଣାରେ ଗୁରୁତର ବ୍ୟକ୍ତିଙ୍କୁ ଯଥାଶୀଘ୍ର ଡାକ୍ତରଖାନା ପହଞ୍ଚାଇବା ସମ୍ଭାବନା ବହୁତ କମ ରହିଥାଏ । ଏହି ପରିସ୍ଥିତିରେ ଲୋକେ ପୋଲିସର ଭୟ କିମ୍ବା ଅନ୍ୟ କୌଣସି କାରଣରୁ ନୀରବଦ୍ରଷ୍ଟା ସାଜିଥାନ୍ତି । ଏଭଳି ସମୟରେ ଜଣେ ଦୁର୍ଘଟଣାଗ୍ରସ୍ତ ଆହତ ବ୍ୟକ୍ତିଙ୍କ ଜୀବନ ବଞ୍ଚାଇ ମେଡିକାଲ ପହଞ୍ଚାଇଛନ୍ତି ଓଲିଉଡ ସୁପରଷ୍ଟାର ସିଦ୍ଧାନ୍ତ ମହାପାତ୍ର । ଏହି ମହାନ କାମ ଯୋଗୁଁ ସବୁଆଡୁ ତାଙ୍କୁ ପ୍ରଶଂସା କରାଯାଉଛି । ଅଭିନେତାଙ୍କ ଏହି ବଦାନ୍ୟତା ପାଇଁ ରାଜ୍ୟ ପରିବହନ ବିଭାଗ ମଧ୍ୟ ସିଦ୍ଧାନ୍ତଙ୍କୁ ପ୍ରଶଂସା କରିବା ସହ ଧନ୍ୟବାଦ ଜଣାଇଛନ୍ତି ।
ଖୋର୍ଦ୍ଧା ଜିଲ୍ଲା ପାହାଳ ଥାନା ଅନ୍ତର୍ଗତ ନରଣପୁରସ୍ଥିତ କେଏମବିବି ଯୁକ୍ତ ଦୁଇ ବିଜ୍ଞାନ କଲେଜର ଏକ କାର୍ଯ୍ୟକ୍ରମର ଉଦଘାଟକ ଭାବେ ଯୋଗଦେଇ ଭୁବନେଶ୍ୱର ଫେରୁଥିଲେ ସିଦ୍ଧାନ୍ତ । ଏହି ସମୟରେ ସେ ଏକ ସଡ଼କ ଦୁର୍ଘଟଣାରେ ଗୁରୁତର ଭାବେ ଆହତ ହୋଇଥିବା ଜଣେ ବ୍ୟକ୍ତିଙ୍କୁ ଉଦ୍ଧାର କରିଛନ୍ତି । କେବଳ ଏତିକି ନୁହେଁ ନିଜ ଗାଡ଼ି ଅଟକାଇ ଗୁରୁତର ଆହତ ବ୍ୟକ୍ତିଙ୍କୁ ପ୍ରଥମେ ମେଡିକାଲ ପହଞ୍ଚାଇଥିଲେ । ପରେ ଉକ୍ତ ବ୍ୟକ୍ତିଙ୍କ ପରିବାରକୁ ଖବର ଦେଇଥିଲେ । ପରିବାର ଲୋକେ ମେଡିକାଲରେ ନପହଞ୍ଚିବା ଯାଏଁ ମେଡିକାଲରେ ରହିଥିଲେ ଅଭିନେତା । ସିଦ୍ଧାନ୍ତ କେବଳ ରିଲ୍ ହିରୋ ନୁହନ୍ତି ବରଂ ଜଣେ ରିଅଲ ଲାଇଫ ହିରୋ ବୋଲି ପ୍ରମାଣିତ କରିଛନ୍ତି । ଏଥିପାଇଁ ତାଙ୍କୁ ସାଧୁବାଦ ଜଣାଇଛି ରାଜ୍ୟ ପରିବହନ ବିଭାଗ ।
ଏହା ମଧ୍ୟ ପଢନ୍ତୁ: ବାଇକରେ ସଚେତନତା ବାର୍ତ୍ତା, ସାମିଲ ହେଲେ ଅଭିନେତା ସିଦ୍ଧାନ୍ତ
ଟ୍ବିଟରରେ ରାଜ୍ୟ ପରିବହନ ବିଭାଗ ଏକ ପୋଷ୍ଟ ସେୟାର କରି ଅଭିନେତା ସିଦ୍ଧାନ୍ତ ମହାପାତ୍ରଙ୍କୁ ଧନ୍ୟବାଦ ଜଣାଇବା ସହ ପ୍ରଶଂସା କରିଛି । ଟ୍ୱିଟ୍ ମାଧ୍ୟମରେ ପରିବହନ ବିଭାଗ କହିଛି, "ଜଣେ ସାହାଯ୍ୟକାରୀ ସିଦ୍ଧାନ୍ତ ମହାପାତ୍ରଙ୍କ ଭଳି ହେବା ଆବଶ୍ୟକ । ଆପଣ ଆମ୍ଭ ମାନଙ୍କ ପାଇଁ ଏକ ପ୍ରେରଣା ଉତ୍ସ । ଜଣେ ଆଦର୍ଶ ହୋଇଥିବାରୁ ଆପଣଙ୍କ ଧନ୍ୟବାଦ । ବିଳମ୍ବ ଏବଂ ଭୟ ନକରି ସଡକ ଦୁର୍ଘଟଣା ପରେ ପ୍ରାଥମିକ ସମୟରେ (Golden Hour) ଆହତ ବ୍ୟକ୍ତିଙ୍କ ଜୀବନ ବଞ୍ଚାଇବାକୁ ପଛଘୁଞ୍ଚା ଦିଅନ୍ତୁ ନାହିଁ । ଆପଣଙ୍କ ସାହାଯ୍ୟ କାହାର ଜୀବନ ବଞ୍ଚାଇ ପାରେ । ଏଭଳି ସାହାଯ୍ୟକାରୀଙ୍କ ସୁରକ୍ଷା ଆଇନ ଦ୍ୱାରା ସୁନିଶ୍ଚିତ ।"
ସୂଚନା ଥାଉ କି, ରବିବାର ଅପରାହ୍ନ ୨ଟା ସମୟରେ ସିଦ୍ଧାନ୍ତଙ୍କ କାର ପାଖରୁ ପ୍ରାୟ କୋଡିଏ ମିଟର ଦୂରରେ ଏକ ଭ୍ୟାନ ଜଣେ ବାଇକ ଆରୋହୀଙ୍କୁ ପଛପଟୁ ଧକ୍କା ଦେଇଥିଲା । ଧକ୍କା ଦେବା ପରେ ସେହି ବ୍ୟକ୍ତିଙ୍କୁ ଗାଡିଟି ଘୋଷାଡ଼ି ନେଇଥିଲା । ଫଳରେ ବାଇକ ଆରୋହୀଙ୍କ ଗୋଟିଏ ଗୋଡ କଟିଯାଇଥିଲା । ଆହତ ବ୍ୟକ୍ତି ଜଣକ ଆଇନଜୀବୀ ମଦନ ସ୍ବାଇଁ ବୋଲି ଜଣାପଡିଛି । ଏପରି ସ୍ଥିତିରେ ସିଦ୍ଧାନ୍ତ ମଦନଙ୍କ ପାଇଁ ଦେବଦୂତ ସାଜି ମୃତ୍ୟୁମୁଖରୁ ରକ୍ଷା କରିଛନ୍ତି । ଅଭିନେତାଙ୍କ ଏଭଳି ମହାନ ଏବଂ ସାହସିକ କାର୍ଯ୍ୟ ପାଇଁ ପ୍ରଶଂସା କରାଯାଉଛି । ଏଭଳି ସମୟରେ ଗୁରୁତରଙ୍କ ଜୀବନ ବଞ୍ଚାଇ ଅନ୍ୟଙ୍କ ପାଇଁ ଉଦାହରଣ ସାଜିଛନ୍ତି ଓଲିଉଡ୍ ସୁପରଷ୍ଟାର ସିଦ୍ଧାନ୍ତ ମହାପାତ୍ର ।
