ଭୁବନେଶ୍ବର: ଆରମ୍ଭ ହେଲା ଆମ ପୋଲିସ ସମିତି । ଏଣିକି ଭୟ ନୁହେଁ ଭରସାର ସହ ପୋଲିସ କର୍ମଚାରୀଙ୍କୁ କରନ୍ତୁ ଯୋଗାଯୋଗ । ପ୍ରତ୍ୟେକ ଥାନାକୁ କିଛି ଭାଗରେ ବିଭକ୍ତ କରାଯାଇ ଜଣେ ଲେଖାଏଁ ପୋଲିସ କର୍ମଚାରୀଙ୍କୁ ନିଯୁକ୍ତ କରାଯାଇ ପ୍ରତି ଘରକୁ ଦିଆଯିବ ସୁରକ୍ଷା ।
ତେବେ ଅନ୍ୟ ସମିତି ପରି ଆମ ପୋଲିସ ସମିତିରେ ମଧ୍ୟ ପ୍ରତି ମାସରେ ବୈଠକ କରାଯିବ । ଅଞ୍ଚଳର ସମସ୍ୟା ସହ ସ୍ବତଃ ଜଡିତ ହୋଇ ସେ ସମ୍ପର୍କରେ ଅବଗତ ହେବେ ପୋଲିସ । ଆଇନଗତ ଦିଗରେ କାର୍ଯାନୁଷ୍ଠାନ ସହ ସମାଧାନ କରିବେ । ଯାଦ୍ବାରା କେବଳ କେସ ନୁହେଁ ଆଲୋଚନା ଜରିଆରେ ସମାଧାନର ବାଟ ବି ଫିଟିପାରିବ । ପୋଲିସ ଲୋକଙ୍କ ନିକଟତର ହୋଇପାରିବ ଏବଂ ଅପରାଧିକ କାର୍ଯ୍ୟକଳାପ କମିପାରିବ ।
ଖାଲି ସେତିକି ନୁହେଁ ଗଛ ଲଗାଇବାଠୁ ଆରମ୍ଭ କରି, ରକ୍ତଦାନ, ପର୍ବ ପର୍ବାଣିର ସାମୁହିକ ଆୟୋଜନରେ ଭାଗିଦାର ହୋଇପାରିବେ ପୋଲିସ କର୍ମଚାରୀ । ପ୍ରତ୍ୟେକ ଥାନା ଅଞ୍ଚଳରେ ୨୫ରୁ ୨୬ ଜଣ ପୋଲିସ କର୍ମଚାରୀଙ୍କୁ ଏନେଇ ଦାୟିତ୍ବ ମିଳିବ ଓ ପ୍ରତି 2ବର୍ଷରେ ଥରେ ତାଙ୍କୁ ବଦଳି କରାଯିବ । କ୍ୟାପିଟାଲ ଥାନା ପରିସରରେ ଏହି ସମିତି ଉଦଘାଟନ କରି ଏହା ବୟୋଜ୍ୟେଷ୍ଠ ଲୋକଙ୍କ ପାଇଁ ବିଶେଷ ସହାୟକ ହେବ ବୋଲି କହିଛନ୍ତି ପୋଲିସ କମିଶନର ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
