ଭୁବନେଶ୍ବର: ଧାମନଗର ଉପନିର୍ବାଚନ (Dhamnagar ByPoll) ଲାଗି ଚାଲିଛି ଜୋରଦାର ପ୍ରଚାର । ଆସନ୍ତା 3ତାରିଖରେ ହେବ ଭୋଟ ଗ୍ରହଣ । ତେବେ ଧାମନଗରରେ ବିଜେଡି ପାଇଁ ଏସଏଚଜି ମହିଳା ଟଙ୍କା ବାଣ୍ଟୁଥିବା ଅଭିଯୋଗ କରିଛି ବିଜେପି । ଏହି ପ୍ରସଙ୍ଗକୁ ନେଇ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛି ବିଜେପିର ଏକ ପ୍ରତିନିଧି ଦଳ । ଟଙ୍କା ବାଣ୍ଟୁଥିବା ଲୋକଙ୍କୁ ଗିରଫ କରିବା ପାଇଁ ଦାବି କରିଛି ବିଜେପି ।
ବିଜେପି ସାଧାରଣ ସମ୍ପାଦିକା ଲେଖାଶ୍ରୀ ସାମନ୍ତ ସିଂହାରଙ୍କ(BJP Leader Lekhasri Samantsinghar) ନେତୃତ୍ୱରେ ଏକ ପ୍ରତିନିଧି ଦଳ ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ଧାମନଗରରେ ବିଜେଡି ପାଇଁ SHG ମହିଳା ଟଙ୍କା ବାଣ୍ଟୁଥିବା ଅଭିଯୋଗ କରିଛି । କୌଣସି କାର୍ଯ୍ୟାନୁଷ୍ଠନ ନହେଲେ ଭଦ୍ରକ ଜିଲ୍ଲାପାଳ ଓ ରାଜ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବାକୁ ଦଳ ପକ୍ଷରୁ ଚେତାବନୀ ଦିଆଯାଇଛି । ପୂର୍ବରୁ ଟଙ୍କା ବଣ୍ଟା ଅଭିଯୋଗ କରି ଧାମନଗର ସମସ୍ତ ଏସଏଚଜିଙ୍କ ବ୍ୟାଙ୍କ ଆକାଉଣ୍ଟ ଫ୍ରୀଜ ପାଇଁ ଦାବି କରିଥିଲା ବିଜେପି ।
ଏହା ମଧ୍ୟ ପଢନ୍ତୁ: ଆର୍ଥିକ ଚିନ୍ତାକୁ କିପରି କରିବେ ଦୂର ? ଏଥର ଦୀପାବଳିରେ ଅନୁସରଣ କରନ୍ତୁ ଏହି ଟିପ୍ସ
ଏନେଇ ଲେଖାଶ୍ରୀ ସାମନ୍ତସିଂହାର କହିଛନ୍ତି," ଗତକାଲି ଠାରୁ ଏକ ଭିଡିଓ ଭାଇରାଲ ହେଉଛି । ଧାମନଗରରେ ଜଣେ SSG ମହିଳା ଟଙ୍କା ବାଣ୍ଟୁଥିବା ଦେଖାଦେଇଛି । ବିଜୁ ଜନତା ଦଳର ସଭାରେ ଯେଉଁମାନେ ଆସିଥିଲେ ସେମାନଙ୍କୁ ଆକୃଷ୍ଟ କରିବା ପାଇଁ ଟଙ୍କା ବଣ୍ଟାଯାଇଛି । ଏହା ଏକ ଅପରାଧ । ଆଦର୍ଶ, ଆଚରଣ ବିଧିର ଉଲଂଘନ । ଧାରା 123 ଏବଂ 173Eରେ ଟଙ୍କା ବାଣ୍ଟୁଥିବା ମହିଳାଙ୍କୁ ଗିରଫ ମଧ୍ୟ କରିହେବ । ଅବାଧ, ମୁକ୍ତ ଗଣତନ୍ତ୍ର ବିରୋଧରେ ବିଜୁଜନତା ଏହି କାର୍ଯ୍ୟକୁ ନେଇ ଆମର ଏକ ପ୍ରତିନିଧି ଦଳ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛୁ ।
ଯେଉଁ ମହିଳା ଟଙ୍କା ବାଣ୍ଟୁଥିଲେ ତାଙ୍କୁ 2 ଦିନ ମଧ୍ୟରେ ଗିରଫ କରିବା ପାଇଁ ଦାବି କରିଛୁ । ଯଦି ତାହା ନହୁଏ ତେବେ ଧାମନଗର ନିର୍ବାଚନ ଅବାଧ, ନିରପେକ୍ଷ ବୋଲି ଆମେ କେବେ କହିପାରିବା ନାହିଁ । ଯଦି ମୁଖ୍ୟ ନିର୍ବାଚନ ଅଧିକାରୀ କୌଣସି ପଦକ୍ଷେପ ନନିଅନ୍ତି ତେବେ 26 ତାରିଖ ଦିନ ଭଦ୍ରକ ଜିଲ୍ଲାପାଳ ଓ ରାଜ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେବ । ଏବଂ ବିଜୁ ଜନତା ଦଳ ସହ ମୁଖ୍ୟ ନିର୍ବାଚନ ଅଧିକାରୀ ହାତ ମିଳାଇଛନ୍ତି ବୋଲି ପ୍ରମାଣିତ ହେବ ।"
ଇଟିଭି ଭାରତ, ଭୁବନେଶ୍ବର
