ଭୁବନେଶ୍ବର: ବସି ପାରିଲାନି ବିଧାନସଭା ପିଏସି ବୈଠକ । କୋରମ ଅଭାବରୁ ବୈଠକ ବସି ପାରିଲା ନାହିଁ । ଯାହାକୁ ନେଇ ସରକାରୀ ଦଳ ଉପରେ ବର୍ଷିଛନ୍ତି ବିରୋଧୀ । ଜାଣି ଶୁଣି ଶାସକ ଦଳ ବୈଠକ କରାଇ ଦେଉନଥିବା ଅଭିଯୋଗ କରିଛନ୍ତି ବରିଷ୍ଠ କଂଗ୍ରେସ ବିଧାୟକ ନରସିଂହ ମିଶ୍ର । ଆଜି ବିଧାନସଭା ପବ୍ଲିକ ଆକାଉଣ୍ଟସ କମିଟି ବୈଠକ ଅନୁଷ୍ଠିତ ହେବାକୁ ଥିଲା । ମାତ୍ର କମିଟି ସଦସ୍ୟ ଯୋଗ ନଦେବାରୁ ବୈଠକ ବସିପାରିଲା ନାହିଁ ।
ଏନେଇ ଶାସକ ଦଳ ଉପରେ ବର୍ଷି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି, "ଆଜି ଅନେକ ଗୁରୁତ୍ବପୂର୍ଣ୍ଣ ପ୍ରସଙ୍ଗ ଆଲୋଚନା ହେବାର ଥିଲା । କମିଟିରେ ୧୨ ଜଣ ସଦସ୍ୟ ଥିବାବେଳେ ଅନ୍ୟୁନ ୪ ଜଣ ଉପସ୍ଥିତ ରହିବା ଆବଶ୍ୟକ । କୋରମ ଅଭାବରୁ ବୈଠକ ହୋଇପାରୁନାହିଁ ।" କମିଟି ଅଧ୍ୟକ୍ଷ ମୋହନ ମାଝୀ ଓ ସଦସ୍ୟ ନରସିଂହ ମିଶ୍ରଙ୍କୁ ଛାଡ଼ିଦେଲେ ଅନ୍ୟ କେହି ଆସିନଥିଲେ ।
ଆଗକୁ ପଦ୍ମପୁର ଉପନିର୍ବାଚନ ଥିବାରୁ ଶୃଙ୍ଖଳିତ ନିର୍ବାଚନ ପାଇଁ ଆଲୋଚନା ହୋଇଥାନ୍ତା ବୋଲି କୁହାଯାଉଛି । ସେପଟେ ବୈଠକ କରାଇ ନଦେବାକୁ ଶାସକ ଦଳ ଷଡଯନ୍ତ୍ର କରିଛି ବୋଲି ବିଜେପି ମୁଖ୍ୟ ସଚେତକ ମୋହନ ମାଝୀ କହିଛନ୍ତି ।
ଇଟିଭି ଭାରତ, ଭୁବନେଶ୍ବର
