ଭୁବନେଶ୍ୱର: ଇନଷ୍ଟିଚ୍ୟୁସନ ଅଫ ଇଞ୍ଜିନିୟର୍ସରେ ପାଳିତ ହୋଇଯାଇଛି ଜାତୀୟ ଶକ୍ତି ସଂରକ୍ଷଣ ଦିବସ । ମୁଖ୍ୟ ଅତିଥି ଭାବରେ ଏନଟିପିସିର ମହା ପ୍ରବନ୍ଧକ ପିୟୂଷ କୁମାର ଓ ଆଇଆଇଟି ଭୁବନେଶ୍ୱରର ବୈଦ୍ୟୁତିକ ବିଭାଗର ମୁଖ୍ୟ ପ୍ରଫେସର ଶୁଭ୍ରାଂଶୁ ରଞ୍ଜନ ସାମନ୍ତରାୟ ଯୋଗ ଦେଇ ଶକ୍ତି ସଂରକ୍ଷଣର ଆବଶ୍ୟକତା ଏବଂ ଉପଯୋଗିତା ବିଷୟରେ ମତ ରଖିଥିଲେ । ଏହି ଅବସରରେ ଶକ୍ତି ସଂରକ୍ଷଣ ଉପରେ ଏକ ପୋଷ୍ଟର ପ୍ରଦର୍ଶନ ତଥା ପ୍ରତିଯୋଗିତା ଅନୁଷ୍ଠିତ ହୋଇଥିଲା । ବରିଷ୍ଠ କାଉନସିଲ ସଭ୍ୟ ଡ. ନୂତନ କୁମାର ଦାଶ ଏହି ପ୍ରତିଯୋଗିତାକୁ ଉଦଘାଟନ କରିଥିଲେ । ଓଡିଶାର ବିଭିନ୍ନ ବୈଷୟିକ ଶିକ୍ଷାନୁଷ୍ଠାନର ୨୦୦ରୁ ଉର୍ଦ୍ଧ୍ଵ ଛାତ୍ରଛାତ୍ରୀ ଏହି କାର୍ଯ୍ୟକ୍ରମରେ ଭାଗ ନେଇ ପୁରସ୍କୃତ ହୋଇଥିଲେ । ଏହି ସଚେତନତା କାର୍ଯ୍ୟକ୍ରମ ରାଜ୍ୟ ଵ୍ୟାପୀ ଶକ୍ତି ସଞ୍ଚୟର ପ୍ରଚାର ଓ ପ୍ରସାର କରିବ ।
ଏହି କାର୍ଯ୍ୟକ୍ରମରେ ଆଇ.ଇ.ଆଇ ଓଡିଶା ଶାଖାର ବିଭିନ୍ନ ଯାନ୍ତ୍ରିକ ବିଭାଗର ସଭ୍ୟବୃନ୍ଦ ଇଞ୍ଜିନିୟର ଚତୁର୍ମୁଖ ପଟ୍ଟନାୟକ, ଇଞ୍ଜିନିୟର କେଦାରନାଥ ଦାଶ, ଡ଼ଃ ବିମଲ କୁମାର ଷଡ଼ଙ୍ଗୀ , ପ୍ରଫେସର ଡ. ସୁଧାଂଶୁ ଶେଖର ଦାଶ, ଆବାହକ ଦିଲ୍ଲୀପ କୁମାର ସାହୁ ଓ ସହ ଆବାହକ ସଂଗ୍ରାମ କେଶରୀ ରାଉତରାୟ ଉପସ୍ଥିତ ଥିଲେ । ପ୍ରତିବର୍ଷ ଡିସେମ୍ବର 14 ତାରିଖରକୁ ଆମ ଦେଶରେ ଜାତୀୟ ଶକ୍ତି ସଂରକ୍ଷଣ ଦିବସ ପାଳନ କରାଯାଏ । ମୂଲ୍ୟ ଅନୁସାରେ ଉପଯୋଗ କରି ଶକ୍ତି ଉତ୍ପାଦନ ଓ ସମ୍ବଳ ସଂରକ୍ଷଣ ଦିଗରେ ଭାରତର ଉତ୍କୃଷ୍ଟ ଉପଲବ୍ଧି ଲକ୍ଷ୍ୟରେ ଏହି ଦିନକୁ ପାଳନ କରାଯାଏ । ଏହି ଦିନ ଶକ୍ତିକୁ ଆଗାମୀ ପିଢି ପାଇଁ ସଂରକ୍ଷିତ କରିବା ନେଇ ଲୋକଙ୍କୁ ସଚେତନତା କରାଯାଉ ।
ଇଟିଭି ଭାରତ, ଭୁବନେଶ୍ବର
