ଖୋର୍ଦ୍ଧା: ଆଜି ଅର୍ନ୍ତଜାତୀୟ ଶିଶୁକନ୍ୟା ଦିବସ । ଶିଶୁକନ୍ୟା ପ୍ରତି ହେଉଥିବା ଅନ୍ୟାୟକୁ ରୋକିବାକୁ ସାରା ବିଶ୍ବରେ ଏହି ଦିବସ ପାଳନ କରାଯାଏ । ହେଲେ ଏହିପରି ଦିନରେ ବି ଅଲୋଡା ହୋଇଛି ଶିଶୁ କନ୍ୟା । ନବଜାତ ଶିଶୁକନ୍ୟାକୁ ଅନ୍ୟ ଏକ ପରିବାର ହାତକୁ ଟେକିଦେଲା ଜନ୍ମ ଦେଇଥିବା ମା’ । ଏଭଳି ଘଟଣା ଘଟିଛି ଖୋର୍ଦ୍ଧା ଜିଲ୍ଲା ବାଘମାରୀ ଅଞ୍ଚଳରେ ।
ମିଳିଥିବା ସୂଚନା ଅନୁଯାୟୀ, ଉକ୍ତ ଅଞ୍ଚଳର ଜଣେ ମହିଳା ଏବଂ ତାଙ୍କ ଝିଅ ଭିକ୍ଷାବୃତ୍ତି କରନ୍ତି । ତେବେ ଏହାର ସୁଯୋଗ ନେଇ ମହିଳାଙ୍କ ଝିଅକୁ ଜଣେ ଜନୈକ ବ୍ୟକ୍ତି ଦୁଷ୍କର୍ମ କରିଥିଲା । ଏନେଇ ବେଗୁନିଆ ଥାନାରେ ଅଭିଯୋଗ ପରେ ପୋଲିସ ଅଭିଯୁକ୍ତକୁ ଗିରଫ କରିଥିଲା ।
ପରେ ପୀଡିତା ଗତ ୨୨ ତାରିଖରେ ଏକ ଶିଶୁକନ୍ୟା ଜନ୍ମ ଦେଇଥିଲେ । କିନ୍ତୁ ଶିଶୁ କନ୍ୟାଟିର ଜନ୍ମର କିଛି ସମୟ ପରେ ତାକୁ ଅନ୍ୟ ଏକ ପରିବାରକୁ ଦେଇ ଦେଇଥିବା ଅଞ୍ଚଳରେ ଚର୍ଚ୍ଚା ହେଉଛି । ତେବେ ନବଜାତକ ଶିଶୁକନ୍ୟାଟି ନିଜ ମା’ ଠାରୁ ଦୁରେଇ ରହିଥିବା ବେଳେ ଶିଶୁ ସୁରକ୍ଷା ବିଭାଗ ବିଭାଗ ଏ ସମ୍ପର୍କରେ ଅବଗତ ନାହିଁ । ସେପଟେ ଶିଶୁ କନ୍ୟାର ସୁରକ୍ଷା ଦାବି କରିଛନ୍ତି ସମାଜସେବୀ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
