ଖୋର୍ଦ୍ଧା: ଜଟଣୀ ଥାନା ଅନ୍ତର୍ଗତ ବେଣାପଞ୍ଜରୀ ଗ୍ରାମରୁ ବୁଧବାର ପୋଲିସ ୨ ଶହରୁ ଉର୍ଦ୍ଧ୍ବ ଗୋରୁ ଉଦ୍ଧାର କରିଛି । ଉଦ୍ଧାର ପରେ ଗୋରୁ ଗୁଡିକୁ ବିଭିନ୍ନ ଗୋସାଳାରେ ଛଡାଯିବ ବୋଲି ଥାନା ଅଧିକାରୀ ବିଶ୍ଵରଞ୍ଜନ ସାହୁ ସୂଚନା ଦେଇଥିଲେ । ଏହି ଘଟଣାରେ ପୋଲିସ ୨ ଜଣଙ୍କୁ ଅଟକ ରଖିଥିବା ସୂଚନା ମିଳିଛି ।
ଘଟଣାରୁ ପ୍ରକାଶଯେ ଦୀର୍ଘଦିନରୁ ବେଣାପଞ୍ଜରୀ, ତରାବୋଇ ଓ ତିରିମଲ ପ୍ରମୁଖ ଅଞ୍ଚଳରୁ ଗୋରୁ ଚୋରାଚାଲାଣ ହେଉଥିବା ଅଭିଯୋଗ ହେଉଥିଲା । ତେବେ ବେଣାପଞ୍ଜରୀରେ ବହୁ ଗୋରୁ ବନ୍ଧା ଯାଇଥିବା ଖବର ପାଇ ପୋଲିସ ଉକ୍ତ ଅଞ୍ଚଳରେ ଚଢାଉ କରିଥିଲା । ଚଢାଉବେଳେ ବିଭିନ୍ନ ସ୍ଥାନରେ ତମ୍ବୁଟଣା ହୋଇ ପ୍ରାୟ ୩ଶହରୁ ଉର୍ଦ୍ଧ୍ବ ଗୋରୁ ବନ୍ଧା ହୋଇ ରହିଥିବା ଦେଖିବାକୁ ପାଇଥିଲା ପୋଲିସ । ଏଥିସହିତ ସେହି ଅଞ୍ଚଳର ଅନ୍ୟ ଏକ ପରିତ୍ୟକ୍ତ ସ୍ଥାନରେ କିଛି ଗୋରୁଙ୍କ ହାଡ ପଡିଥିବା ଦେଖିବାକୁ ମିଳିଥିଲା । ଏହାପରେ ବନ୍ଧାଯାଇଥିବା ଗୋରୁଙ୍କୁ ଉଦ୍ଧାର କରିଥିଲା ପୋଲିସ ।
ଉଦ୍ଧାର ଗୋରୁଙ୍କ ଗଣତି କାର୍ଯ୍ୟ ଜାରି ରହିଥିବା ବେଳେ ଗଣତି ପରେ ଗୋସାଳାରେ ଛଡାଯିବ ବୋଲି ଥାନା ଅଧିକାରୀ କହିଛନ୍ତି । ତେବେ ଏତେ ସଂଖ୍ୟକ ଗୋରୁଙ୍କୁ ଏଠାରେ ରଖିବା ଏବଂ କେଉଁଠାରୁ ଏମାନଙ୍କୁ ଅଣାଯାଇଛି ସେ ସମ୍ପର୍କରେ ତଦନ୍ତ ଚାଲିଥିବା ପୋଲିସ କହିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
