ଖୋର୍ଦ୍ଧା: କୋରୋନା ମହାମାରୀ ପାଇଁ ଚାଲି ଯାଇଛି ଅନେକଙ୍କ ଜୀବିକା । କେତେକ ନିଜ ଭାଗ୍ୟ ଆଦରୀ ଘରେ ହାତ ବାନ୍ଧି ବସିଥିବା ବେଳେ ଆଉ କେତେକଙ୍କୁ କୋରୋନା ମହାମାରୀ ଦେଖାଇଛି ବଞ୍ଚିବାର ରାହା । ଖୋର୍ଦ୍ଧା ଜିଲ୍ଲା ବୋଲଗଡ଼ ବ୍ଲକ ଗୌଡ଼ ପାଟଣାର କାହ୍ନୁ ବେହେରା ଓ ତାଙ୍କ ପତ୍ନୀ ମମତା ବେହେରା । ମହାମାରୀ ପାଇଁ ଉଭୟଙ୍କ ଜୀବିକା ବୁଡିଯାଇଥିଲା । ଗାଁକୁ ଆସି କିଛି କାମଧନ୍ଧା ନ ପାଇଁ ଘରେ ବସିଥିଲେ । ଏହି ସମୟରେ ସେମାନଙ୍କୁ ସହାୟତାର ହାତ ବଢାଇଥିଲା ସରକାରଙ୍କ ପ୍ରାଣୀ ସମ୍ପଦ ବିଭାଗ ।
3 ଲକ୍ଷ 3 ହଜାର ମିଳିଥିଲା କୋଭିଡ ସହାୟତା । ସହାୟତା ବଳରେ ନିଜ ଜାଗାରେ ମମତା ଆରମ୍ଭ କରିଥିଲେ ଏକ ହଜାର କ୍ଷମତା ବିଶିଷ୍ଟ ଏକ ଅଣ୍ତାଦିଆ କୁକୁଡ଼ା ଫାର୍ମ । ଏହି ଫାର୍ମରୁ ସେ ପ୍ରତିଦିନ ଛଅ ଶହରୁ ସାତ ଶହ ଅଣ୍ଡା ପାଆନ୍ତି । ଏବଂ ତାକୁ ନିକଟସ୍ଥ ବଜାରରେ ବିକ୍ରି କରି ଏବେ ଗୁଜୁରାଣ ମେଣ୍ଟାନ୍ତି । ସେହିପରି ରାଜ୍ୟରେ ଆବଶ୍ୟକ ସଂଖ୍ୟକ ଅଣ୍ଡା ଉତ୍ପାଦନ ହୋଇପାରୁନଥିବା କାରଣରୁ ବାହାର ରାଜ୍ୟ ଉପରେ ନିର୍ଭର କରୁଛି । ରାଜ୍ୟରେ ଥିବା ବେକାର ଯୁବକ ଯୁବତୀ ଏଭଳି ଫାର୍ମ କରି ସ୍ବାବଲମ୍ବୀ ହୋଇ ପାରିବେ ବୋଲି କହିଛନ୍ତି ମମତା ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
