ଭୁବନେଶ୍ବର : ମଧ୍ୟାହ୍ନ ଭୋଜନରେ ସ୍ବଚ୍ଛତା ପାଇଁ ସରକାରଙ୍କ ପ୍ରସ୍ତୁତି । ଖାଦ୍ୟର ସୁରକ୍ଷା ଓ ହାଇଜିନ ଖାଦ୍ୟ ପ୍ରସ୍ତୁତ କରିବା ନେଇ ଆସନ୍ତାକାଲିଠାରୁ ମିଡ୍ ଡେ' ମିଲ୍ର ରୋଷେୟା ଏବଂ ସହାୟକଙ୍କୁ ଦିଆଯିବ ତାଲିମ। । କାରଣ ଅନେକ ସମୟରେ ମଧ୍ୟାହ୍ନ ଭୋଜନରେ ପୋକ ଦେଖିବାକୁ ମିଳେ । ଯାହାକୁ ନେଇ ଛାତ୍ରଛାତ୍ରୀ ଓ ଅଭିଭାବକ ମହଲରେ ଅସନ୍ତୋଷ ଦେଖିବାକୁ ମିଳେ । ସେହିପରି କିଛି ସ୍ଥାନରେ ଅପରିଷ୍କାର ପରିବେଶରେ ମଧ୍ୟ ଖାଦ୍ୟ ପ୍ରସ୍ତୁତ ହେଉଥିବାରୁ ଛାତ୍ରଛାତ୍ରୀ ଖାଇବାକୁ ନାପସନ୍ଦ କରୁଛନ୍ତି । ଏଭଳି ସ୍ଥଳେ ରୋଷେୟା ଓ ସହାୟକଙ୍କୁ ରୋଷେଇରେ ସ୍ୱଚ୍ଛତା ପାଇଁ ଯେଉଁ ତାଲିମ ଦିଆଯିବ ତାହା ବେଶ ସହାୟକ ହେବ । ନିଜକୁ କେମିତି ସଫା ଏବଂ ସ୍ବଚ୍ଛ ରଖିବା ସହ ଖାଦ୍ୟକୁ କିଭଳି ଭାବରେ ସ୍ୱଚ୍ଛତାର ସହ ତିଆରି କରିବେ ସେନେଇ ଧ୍ୟାନ ଦିଆଯିବ । ଏହାସହ ଖାଦ୍ୟ ଯେଉଁଠି ସଂରକ୍ଷଣ କରି ରଖାଯାଉଛି ତାକୁ କେମିତି ସ୍ୱଚ୍ଛ ଭାବେ ରଖିବେ ସେନେଇ ମଧ୍ୟ ପ୍ରଶିକ୍ଷଣ ଦିଆଯିବ।
ସେହିପରି ମିଶନ ଶକ୍ତି ଭବନରେ ଆୟୋଜିତ ହେବାକୁ ଥିବା ଏହି ପ୍ରଶିକ୍ଷଣ ଶିବିର ଆଠଟି ପର୍ଯ୍ୟାୟରେ ଅନୁଷ୍ଠିତ ହେବ। 600ରୁ ଊର୍ଦ୍ଧ୍ବ ରୋଷେୟା ଏବଂ ସହାୟକଙ୍କୁ ତାଲିମ ଦିଆଯିବାର କାର୍ଯ୍ୟକ୍ରମ ରହିଛି। ଏଠାରେ ଯେଉଁମାନେ ପ୍ରଶିକ୍ଷଣ ନେଇଛନ୍ତି ତାହା ସେମାନେ ବ୍ଲକ ସ୍ତରରେ ଅନ୍ୟ ରୋଷେୟା ଏବଂ ସହାୟକଙ୍କୁ ତାଲିମ ଦେବେ ବୋଲି କହିଛନ୍ତି ମିଡ-ଡେ ମିଲର ରାଜ୍ୟ ନୋଡାଲ ଅଫିସର ରଘୁରାମ ଆର ଆୟର ।
ଏନେଇ ଜଣେ ପାଚିକା ସହାୟକ ସଂଘର ସଭାପତି କହିଛନ୍ତି ଯେ, ରାଜ୍ୟ ସରକାରଙ୍କର ସମସ୍ତ ଯୋଜନା ମଧ୍ୟରେ ଏହା ଏକ ବଳିଷ୍ଠ ପଦକ୍ଷେପ । ପିଲାମାନଙ୍କୁ ସ୍କୁଲ୍କୁ ଆସିବା ନେଇ ଯେଉଁ ଆକୃଷ୍ଟ କରାଯାଉଛି ତାହା କିଭଳି ଭାବରେ ସରସ ସୁନ୍ଦର ହୋଇପାରିବ ସେନେଇ ନିଆଯାଉଛି ପଦକ୍ଷେପ । ଏହା ସହ ଯେଉଁମାନେ ରୋଷେଇ କରୁଛନ୍ତି ସେମାନେ କିଭଳି ଭାବରେ ସ୍ବଚ୍ଛତାର ସହିତ କାର୍ଯ୍ୟ କରିବେ ପିଲାମାନଙ୍କୁ ଠିକ୍ ସମୟରେ ଠିକ୍ ଭାବରେ ଖାଦ୍ୟ ଦିଆଯିବ ସେନେଇ ପ୍ରଶିକ୍ଷଣ ଦିଆଯିବ । ଅନ୍ୟପଟେ ସ୍କୁଲ୍ରେ ପରିବେଶ କିଭଳି ଭାବରେ ଠିକ୍ ରହିବ । ବୃକ୍ଷ ରୋପଣ ଅଧିକରୁ ଅଧିକ କରାଯିବ । ସ୍କୁଲକୁ କିଭଳି ଭାବରେ ସରସ ସୁନ୍ଦର କରାଯିବ ସେନେଇ ଆଲୋଚନା କରାଯିବା ସହ ପ୍ରଶିକ୍ଷଣ ଦିଆଯିବ ବୋଲି କହିଛନ୍ତି ପାଚିକା ସଂଘ ।
ଇଟିଭି ଭାରତ, ଭୁବନେଶ୍ବର
