ଭୁବନେଶ୍ବର: ବନ କର୍ମଚାରୀଙ୍କୁ ମିଳିଲା ପୋଲିସ କ୍ଷମତା । ଶିକାରୀ ଓ ସନ୍ଦିଗ୍ଧଙ୍କୁ ମୋବାଇଲ ଟ୍ରାକିଂ କରିପାରିବେ ବନ ଅଧିକାରୀ । ଲୋକେସନ ଟ୍ରାକ ସହ କଲ ଡିଟେଲସ ମଧ୍ୟ ଯାଞ୍ଜ କରିବା ନେଇ ଅନୁମତି ଦେଇଛନ୍ତି ରାଜ୍ୟ ସରକାର । ୬୯ତମ ରାଜ୍ୟସ୍ତରୀୟ ବନମହୋତ୍ସବ ସପ୍ତାହର ଉଦଯାପନୀ ସମାରୋହରେ ଏଭଳି ସୂଚନା ଦେଇଛନ୍ତି ପିସିସିଏଫ୍ ସୁଶିଲ କୁମାର ପୋପାଲି ।
ପିସିସିଏଫ ସୁଶୀଲ କୁମାର ପୋପଲି କହିଛନ୍ତି, ଶିକାରୀ ଓ ସନ୍ଦିଗ୍ଧଙ୍କ ଉପରେ କଡ଼ା ନଜର ରଖିବ ବନ ବିଭାଗ । ଲୋକେସନ ଟ୍ରାକ ସହ କଲ ଡିଟେଲସ ଯାଞ୍ଚ କରିବା ପାଇଁ ଅନୁମତି ଦେଇଛନ୍ତି ରାଜ୍ୟ ସରକାର । ଏହାକୁ ଦୃଷ୍ଟିରେ ରଖି ଶିକାରୀଙ୍କ ଦମନ ପାଇଁ ଗୁଳି ଚାଳନା ପ୍ରଶିକ୍ଷଣ ନେଉଛନ୍ତି ବନ ଅଧିକାରୀ । ଏପର୍ଯ୍ୟନ୍ତ 90 ଜଣ ବନ ଅଧିକାରୀ ଏହି ପ୍ରଶିକ୍ଷଣ ନେଇ ସାରିଛନ୍ତି । ଏହାସହ ଅନ୍ୟ ଅଧିକାରୀମାନେ ପର୍ଯ୍ୟାୟକ୍ରମେ ପ୍ରଶିକ୍ଷଣ ନେବେ । ’’
୬୯ତମ ରାଜ୍ୟସ୍ତରୀୟ ବନମହୋତ୍ସବ ସପ୍ତାହର ଉଦଯାପନୀ ସମାରୋହରେ ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନଫରେନ୍ସ ଜରିଆରେ ସାମିଲ ହୋଇଥିଲେ । ଏହାସହ ଜଙ୍ଗଲ ମନ୍ତ୍ରୀ ପ୍ରଦିପ କୁମାର ଅମାତ୍ ଓ ପିସିସିଏଫ ଦେବୀଦତ୍ତ ବିଶ୍ଵାଳ, ପ୍ରମୁଖ ଯୋଗ ଦେଇଥିଲେ । ସମାରୋହରେ ଉତ୍ସବରେ ଯୋଗ ହେଇ ବନ୍ୟପ୍ରାଣୀ ତଥା ସେମାନଙ୍କ ଆବାସସ୍ଥଳୀର ସୁରକ୍ଷା ଓ ଅଭିବୃଦ୍ଧି ପାଇଁ ଜନସାଧାରଣଙ୍କୁ ଅନୁରୋଧ କରିଛନ୍ତି ମୁଖ୍ୟମନ୍ତ୍ରୀ । ତେବେ ରାଜ୍ୟରେ ଦିନକୁ ଦିନ ପଶୁ ଶିକାର ବଢିବାରେ ଲାଗିଛି । ହାତୀ ସମେତ ଅନେକ ବନ୍ୟପ୍ରାଣୀମାନଙ୍କୁ ଶିକାରୀମାନେ ଅବାଧ ପ୍ରବେଶ କରି ଜଙ୍ଗଲ ମଧ୍ୟରେ ପ୍ରାଣୀଙ୍କୁ ଶିକାର କରୁଥିବା ନଜରକୁ ଆସୁଛି । ଜଙ୍ଗଲ ନିକଟରେ ଥିବା ଗାଁ ଲୋକଙ୍କୁ ନେଇ ବନ୍ୟପ୍ରାଣୀ ଓ ଜଙ୍ଗଲ ସୁରକ୍ଷାକୁ ନେଇ ସଚେତନତା କରାଯାଉଛି ।
ସୂଚନା ଅନୁଯାୟୀ, ଏହି ବନ୍ୟପ୍ରାଣୀ ସପ୍ତାହ ଉତ୍ସବ ପାଳନ ଅବସରରେ ରାଜ୍ୟ ସ୍ତରୀୟ ଫଟୋଚିତ୍ର ପ୍ରଦର୍ଶନୀ କରାଯାଇଛି। କ୍ଵିଜ୍ , ଫଟୋଗ୍ରାଫି ଓ ଚିତ୍ରାଙ୍କନ ପ୍ରତିଯୋଗିତାରେ ବିଜେତା ମାନଙ୍କୁ ପୁରସ୍କାର ସହ ମାନପତ୍ର ପ୍ରଦାନ କରାଯାଇଥିଲା । ଏହି ଅବସରରେ “Wildlife Odisha 2023”, “Majestic Stripes: A Pictorial Tribute to Tigers of Odisha”, “Many Moods of Elephants of Odisha: Beauty & Majesty Unveiled”, “Unforgettable Impressions” ଓ “Debrigarh-The Seen & The Unseen” ୫ ଗୋଟି ପୁସ୍ତକ ମଧ୍ୟ ଉନ୍ମୋଚନ କରାଯାଇଛି ।
ଇଟିଭି ଭାରତ, ଭୁବନେଶ୍ବର
