ଭୁବନେଶ୍ବର: ରାଜ୍ୟରେ ଦୃତ ଗତିରେ ଜଙ୍ଗଲ ନିଆଁ ବଢିବାରେ ଲାଗିଛି । ନିଆଁ ଲିଭାଇ ପାରୁନି ବନ ବିଭାଗ । ଦିନକୁ ଦିନ ରାଜ୍ୟରେ ଦୃତ ଗତିରେ ବଢ଼ିବାରେ ଲାଗିଛି ଜଙ୍ଗଲ ନିଆଁ। । ଗତକାଲି ପର୍ଯ୍ୟନ୍ତ ୧୩୮୦ ପଏଣ୍ଟରେ ନିଆଁ ଲାଗିଥିଲା । ଆଜି(ସୋମବାର) ସକାଳ ୯ଟା ସୁଦ୍ଧା ୯୩ ପ୍ରତିଶତ ଆୟତ କରାଯାଇଛି । ଜଙ୍ଗଲ ନିଆଁକୁ ଆୟତ୍ତ କରିବାକୁ ବନ ବିଭାଗର ୨୭୮ଟି ଅଗ୍ନି ନିରାପତ୍ତା ସ୍କ୍ବାଡ୍ ଗଠନ କରାଯାଇଛି । ଏହି ଜଙ୍ଗଲ ନିଆଁ ଯୋଗୁଁ ପ୍ରଦୂଷଣ ସିଟି ତାଲିକାରେ ଓଡ଼ିଶାରେ ରାଉରକେଲା ଶୀର୍ଷରେ ରହିଛି ।
ଏନେଇ ବନ ବିଭାଗ ଆକଳନ କରିଛି ଯେ ଫେବୃଆରୀ ଆରମ୍ଭରୁ ମାର୍ଚ୍ଚ 5 ପର୍ଯ୍ୟନ୍ତ ଯେତିକି ସ୍ଥାନରେ ନିଆଁ ଲାଗିଛି ତାହା 97 ପ୍ରତିଶତ । ଶିମିଳିପାଳ କୋରାପୁଟ ସହ ପ୍ରାୟ ଅନେକ ସ୍ଥାନରେ ନିଆଁ ଲାଗିଛି । ନିଆଁକୁ ଆୟତ୍ତ କରିବା ପାଇଁ ବନ ବିଭାଗ କର୍ମଚାରୀ, ଜଙ୍ଗଲ ପାଖାପାଖି ଅଞ୍ଚଳରେ ରହୁଥିବା ସ୍ବେଚ୍ଛାସେବୀ ମହିଳା , 278ଟି ଅଗ୍ନି ନିରାପତ୍ତା ସ୍କ୍ବାଡ୍ ନିୟୋଜିତ ରହିଛନ୍ତି । ଏହାସହ 4 ଚକିଆ ଗାଡିର ମଧ୍ୟ ବ୍ୟବସ୍ଥା କରାଯାଇଛି । ଲୋକମାନଙ୍କୁ ସଚେତନ କରିବା ପାଇଁ ବନ ସୁରକ୍ଷା ସମିତିର ସାହାଯ୍ୟ ନିଆଯାଉଛି । ଏସଏଚ୍ଜି ଗ୍ରୁପ୍ ମହିଳାଙ୍କର ମଧ୍ୟ ସାହାଯ୍ୟ ନିଆଯାଉଛି । ବିଭିନ୍ନ ପ୍ରକାରର ନାଟକ କରି ଲୋକଙ୍କୁ ସଚେତନ କରାଯାଉଛି । କାରଣ ୧୦୦ ପ୍ରତିଶତ ଜଙ୍ଗଲ ନିଆଁ ହେଉଛି ମନୁଷ୍ୟକୃତ । ଜଙ୍ଗଲରେ ପ୍ରାକୃତିକ ନିଆଁ ଲାଗିବା ବହୁତ କମ । କିଛି ଲୋକମାନେ ଜାଣିଶୁଣି ନିଆଁ ଲଗାଉଥିବା ବେଳେ ଆଉ କିଛି ପଶୁ ଶିକାର କରିବା ପାଇଁ ଲଗାଉଛନ୍ତି ।
ଏହାସହ ଜଙ୍ଗଲ ପୋଡ଼ି ଯେଉଁ ଚାଷ କରୁଛନ୍ତି ତାହାଦ୍ଵାରା ମଧ୍ୟ ନିଆଁ ଉଡ଼ି ଜଙ୍ଗଲର ଅନ୍ୟ ଆଡ଼େ ଲାଗିଯାଉ ଥିବାର ନଜର ରହିଛି । ପାଖାପାଖି ୧୦ ପ୍ରତିଶତ ଜଙ୍ଗଲ ବାହାରେ ନିଆଁ ଲାଗୁଛି । ୨୦୨୧ ମସିହାରେ ଯେଉଁଭଳି ଭାବରେ ପାଣିପାଗରେ ପରିବର୍ତ୍ତନ ହୋଇଥିଲା ବର୍ତ୍ତମାନ ସ୍ଥିତି ସେମିତି ରହିଛି । ବର୍ତ୍ତମାନ ଅକ୍ଟୋବର ମାସ ଠାରୁ ରାଜ୍ୟରେ ବର୍ଷା ନାହିଁ । ଦୀର୍ଘ ୬ ମାସ ଧରି ରାଜ୍ୟରେ ବର୍ଷା ହୋଇନାହିଁ । ଯଦି ବର୍ଷା ହୁଏ ତେବେ ରାଜ୍ୟରେ ଜଙ୍ଗଲ ନିଆଁ କମିଯିବ । ନହେଲେ ଯେଭଳି ଭାବରେ ଜଙ୍ଗଲ ନିଆଁକୁ ନେଇ ସଜାଗ ରହି କାମ କରାଯାଉଛି ସେହିଭଳି କାର୍ଯ୍ୟ କରାଯିବ ।
ଅନ୍ୟପଟେ ରାଜ୍ୟ ପ୍ରଦୂଷଣ କଣ୍ଟ୍ରୋଲ ବୋର୍ଡର ସଦସ୍ୟ ସଚିବ ଡ. କେ. ମୁରୁଗେଶନ କହିଛନ୍ତି, "ଜଙ୍ଗଲରେ ନିଆଁ ଲାଗିଲେ ସିଟି ଉପରେ ତାର ବେଶୀ ପ୍ରଭାବ ପଡ଼ୁନାହିଁ । କିନ୍ତୁ ଓଡ଼ିଶାରେ ରାଉରକେଲା ସିଟି ଉପରେ ମଝିରେ ମଝିରେ ଅଧିକ ପ୍ରଦୂଷଣ ହେଉଛି । ରାଉରକେଲା ସିଟି ଅଞ୍ଚଳରେ ନିକଟରେ ରହିଛି ବୀରମିତ୍ରପୁର ଓ ରାଜଗାଙ୍ଗପୁର ଆଦି ଅଞ୍ଚଳ। ଯେଉଁଠି କି ଅଧିକ ପରିମାଣର ଜଙ୍ଗଲ ରହିଛି । ବିଶେଷ ଭାବରେ ସେଠାରେ ବେଶୀ ନିଆଁ ଲାଗୁଛି । ଭୁବନେଶ୍ୱରକୁ ଲାଗି ଚନ୍ଦକା ରହିଛି । କିନ୍ତୁ ତାହାର ଏତେଟା ପ୍ରଭାବ ସିଟି ଉପରେ ପଡୁନାହିଁ । ଆମ ରାଜ୍ୟରେ କେବଳ ସିଟିକୁ ଦେଖିଲେ ରାଉରକେଲାରେ ବେଶୀ ନିଆଁ ଲାଗୁଛି। କେବଳ ସହର ପ୍ରଦୂଷଣ ମାମଲାରେ ରାଉରକେଲା ଆଗରେ ରହିଛି। ଗତବର୍ଷ ପ୍ରଦୂଷଣ ମାତ୍ରା 160 AQI ରହିଥିବା ବେଳେ ଚଳିତ ବର୍ଷ ଏହା ବୃଦ୍ଧି ଘଟି 200 AQI ହୋଇଥିଲା । ତେବେ କିଭଳି ଜଙ୍ଗଲ ନିଆଁକୁ ରୋକାଯାଇ ପାରିବ ସେନେଇ ବନ ବିଭାଗ ପକ୍ଷରୁ ସ୍କ୍ୱାଡ୍ ଗଠନ କରାଯାଇଛି ।
ସୂଚନା ଅନୁଯାୟୀ, ରାଜ୍ୟରେ ଦୃତ ଗତିରେ ଜଙ୍ଗଲରେ ନିଆଁ ଲାଗିବାର ଲାଗିଛି । ମାଲକାନଗିରି, ନବରଙ୍ଗପୁର, ନୂଆପଡ଼ା, କୋରାପୁଟ, ବରଗଡ଼, ବଲାଙ୍ଗୀର, କଳାହାଣ୍ଡି, ରାୟଗଡ଼ା, ସୁନ୍ଦରଗଡ଼, କନ୍ଧମାଳ, ସମ୍ବଲପୁର, ଗଜପତି, ଗଞ୍ଜାମ, ଅନୁଗୋଳ, ଦେବଗଡ଼, ଖୋର୍ଦ୍ଧା, ଢେଙ୍କାନାଳ, କେନ୍ଦୁଝର ର ଆଦି ଅନେକ ଅଞ୍ଚଳରେ ନିଆଁ ଲାଗିଥିବା ସୂଚନା ମିଳିଛି ।
ଇଟିଭି ଭାରତ, ଭୁବନେଶ୍ବର
