ଖୋର୍ଦ୍ଧା: ହାତୀ ଓ ମଣିଷ ମଧ୍ୟରେ ଲଢେଇ ଅନେକ ଦିନର । କେଉଁଠି ହାତୀ ଜନବସତି ମୁହାଁ ହୋଇ ଅନେକ ଧନ ଜୀବନ ନଷ୍ଟ କରୁଛି ତ ଆଉ କେଉଁଠି ନିରୀହ ମଣିଷଙ୍କୁ ପାଦରେ ଦଳିଦେଉଛି । ସେପଟେ ପୁଣି ଦିନକୁ ଦିନ କମିବାରେ ଲାଗିଛି ହାତୀଙ୍କ ସଂଖ୍ୟା । କେଉଁଠି କୂଅରେ ପଡି, କରେଣ୍ଟ ଲାଗି କିମ୍ବା ଶିକାରୀର ଫାଶରେ ପଡି ଅକାଳରେ ଜୀବନ ହାରୁଛନ୍ତି ହାତୀ ।
ତେବେ ହାତୀମାନଙ୍କର ଉପଦ୍ରବ ଖୋର୍ଦ୍ଧା ଏବଂ ଏହାର ଆଖପାଖ ଅଞ୍ଚଳରେ ବୃଦ୍ଧି ପାଇବାରେ ଲାଗିଛି । ଜଙ୍ଗଲୀ ହାତୀ ପଲ ରାତିରେ ଆସି ଜନବସତି ଭିତରକୁ ପଶି ଘର ଭାଙ୍ଗିବା ସହ ଫସଲ ନଷ୍ଟ କରୁଛନ୍ତି । ସନ୍ଧ୍ୟା ହେଲେ ହାତୀମାନଙ୍କ ଭୟରେ ଲୋକେ ଘରୁ ବାହାରିବାକୁ ମଧ୍ୟ ଭୟ କରୁଛନ୍ତି ।
ସେହିଭଳି ଶନିବାର ବିଳମ୍ବିତ ରାତିରେ ଖୋର୍ଦ୍ଧାର ଗୋଡ଼ା ଗାଁରେ ହାତୀପଲ ପଶି ବ୍ୟାପକ ଧାନ ଓ ପନିପରିବା ଫସଲ ନଷ୍ଟ କରିଛନ୍ତି । ହାତୀଙ୍କ କାରଣରୁ ଅଞ୍ଚଳବାସୀ ଆତଙ୍କିତ ଅବସ୍ଥାରେ ରହିଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ