ଭୁବନେଶ୍ବର: ରାତି ପାହିଲେ ମାଟ୍ରିକ ପରୀକ୍ଷା । ସମ୍ମେଟିଭ ୨ ପରୀକ୍ଷା ଦେବେ ଛାତ୍ରଛାତ୍ରୀ । ଆସନ୍ତା କାଲି ପରୀକ୍ଷା ଆରମ୍ଭ ହୋଇ ମାର୍ଚ୍ଚ 17 ତାରିଖରେ ସରିବ । ଏନେଇ ସୁରକ୍ଷାର ସହ ହବରେ ରହିଛି ପ୍ରଶ୍ନପତ୍ର । ଖରା ପାଇଁ ହୋଇଛି ସ୍ଵତନ୍ତ୍ର ବ୍ୟବସ୍ଥା । ତ୍ରିସ୍ତରୀୟ ସ୍କ୍ବାଡ ବ୍ୟବସ୍ଥା ହୋଇଛି । ଚାପ ମୁକ୍ତ ରହି ପରୀକ୍ଷା ଦେବାକୁ ଗଣଶିକ୍ଷା ମନ୍ତ୍ରୀ ପରାମର୍ଶ ଦେଇଛନ୍ତି। ସମେଟିଭ ୧ ସରିଥିବା ବେଳେ ପ୍ରଶ୍ନପତ୍ର ପାର୍ଟନ ପିଲାଙ୍କୁ ଜଣା ଅଛି । ଏଣୁ ବ୍ୟସ୍ତ ବିବ୍ରତ ନହୋଇ ଚାପ ମୁକ୍ତ ହୋଇ ପରୀକ୍ଷା ଦେବାକୁ ଗଣଶିକ୍ଷା ମନ୍ତ୍ରୀଙ୍କ ପରାମର୍ଶ ଦେଇଛନ୍ତି । ସ୍ୱଚ୍ଛ ପରୀକ୍ଷା ପରିଚାଳନା ପାଇଁ କେନ୍ଦ୍ରୀୟ ସ୍କ୍ବାଡ ୫୭ଟି କରାଯାଇଛି । ଯେଉଁମାନେ କୌଣସି ବି କେନ୍ଦ୍ରକୁ ଅଚାନକ ଭାବରେ ପରିଦର୍ଶନ କରିପାରିବେ । ଏନେଇ ଜିଲ୍ଲା ପ୍ରଶାସନର ସାହାଯ୍ୟ ନିଆଯାଇଛି ।
ତେବେ ଚଳିତ ଥର କପି ରୋକିବାକୁ ବିଶେଷ ପଦକ୍ଷେପ ନିଆଯାଇଥିବା ବେଳେ ଖରା ପାଇଁ ବିଶେଷ ପଦକ୍ଷେପ ନିଆଯାଇଛି । ସକାଳ 8ରୁ 10 ଯାଏଁ ହେବ ପରୀକ୍ଷା । ସକାଳ 7 ସୁଦ୍ଧା ଏଣ୍ଟ୍ରି କରିବାକୁ ହେବ। ସେହିପରି ସ୍କୁଲ ଗୁଡିକରେ ସିସିଟିଭି ବ୍ୟବସ୍ଥା କରାଯାଇଛି । ଯେଉଁ ସେଣ୍ଟରରେ ସମ୍ମେଟିଭ 1 ପରୀକ୍ଷା ହୋଇଥିଲା, ସେଠାରେ ହିଁ ସମ୍ମେଟିଭ 2 ପରୀକ୍ଷା ହେବ । ପୂର୍ବ ବର୍ଷ ଗୁଡିକରେ ଯେଉଁଠି କପି ଖବର ଆସିଥିଲା, ସେଠାରେ ସେଣ୍ଟର ପରିବର୍ତ୍ତନ କରାଯାଇଛି ବୋଲି କହିଛନ୍ତି ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ ।
ଏପଟେ କ୍ୟାପିଟାଲ ହାଇସ୍କୁଲର ପ୍ରଧାନଶିକ୍ଷକ ଜିତେନ୍ଦ୍ର ନାୟକ କହିଛନ୍ତି ଯେ, ପରୀକ୍ଷା ପାଇଁ ସମସ୍ତ ବ୍ୟବସ୍ଥା ସରିଛି । ଆସନ୍ତାକାଲି(ଶୁକ୍ରବାର) ପରୀକ୍ଷା ହେବାକୁ ଯାଉଛି । କ୍ୟାପିଟାଲ ହାଇସ୍କୁଲ ସେଣ୍ଟରରେ 7ଟି ଅନ୍ୟ ସ୍କୁଲର ପରୀକ୍ଷାର୍ଥୀମାନେ ପରୀକ୍ଷା ଦେବେ । 361 ପିଲା ଏହି ସ୍କୁଲରେ ପରୀକ୍ଷା ଦେବେ।
ସମ୍ମେଟିଭ 1ରେ ଯେଉଁ ନିୟମ ରହିଥିଲା ତାହା ସମେଟିଭ 2ରେ ମଧ୍ୟ ରଖାଯାଇଛି । ଖରାକୁ ଦୃଷ୍ଟିରେ ରଖି ପରୀକ୍ଷାର ସମୟ ପରିବର୍ତ୍ତନ କରାଯାଇଛି । ସବୁ ବିଷୟରେ ସକାଳ 8 ରୁ 10 ଟା ପର୍ଯ୍ୟନ୍ତ ପରୀକ୍ଷା କରାଯାଉଥିବା ବେଳେ ଗଣିତରେ ଅଧିକ 15 ମିନିଟ ସମୟ ଦିଆଯାଇଛି । ଖରାକୁ ଦୃଷ୍ଟିରୁ ରଖି ପାଣିର ବ୍ୟବସ୍ଥା, ଏଥିସହ ଇଲେକ୍ଟ୍ରିକ କିଭଳି ଭାବରେ ପରୀକ୍ଷା ସମୟରେ ନକଟା ଯିବ ସେନେଇ ମଧ୍ୟ ବିଦ୍ୟୁତ୍ ବିଭାଗକୁ ଜଣାଇ ଦିଆଯାଇଛି । ଅନେକ କ୍ଲାସ ରୁମରେ ମଧ୍ୟ ଇନଭଟର କନେକ୍ସନ ରଖାଯାଇଛି। ଏଥିସହ କ୍ଲାସ ରୁମରେ ଅଧିକ ଫ୍ୟାନର ବ୍ୟବସ୍ଥା କରାଯାଇଥିବା କହିଛନ୍ତି କ୍ୟାପିଟାଲ ହାଇସ୍କୁଲର ପ୍ରଧାନ ଶିକ୍ଷକ ।
ପ୍ରକାଶ ଥାଉକି, ଆସନ୍ତାକାଲି ଆରମ୍ଭ ହେଉଛି ମାଟ୍ରିକ ପରୀକ୍ଷା । ମାଟ୍ରିକ ପରୀକ୍ଷା ସହ ମଧ୍ୟମା, ଓପନ ସ୍କୁଲ ପରୀକ୍ଷା ମଧ୍ୟ ଅନୁଷ୍ଠିତ ହେବ । ସକାଳ 8ଟା ରୁ 10ଟା ପର୍ଯ୍ୟନ୍ତ ମାଟ୍ରିକ ପରୀକ୍ଷା ଅନୁଷ୍ଠିତ ହେବ। ଚଳିତ ବର୍ଷ ପରୀକ୍ଷା ଦେବେ 5 ଲକ୍ଷ 41 ହଜାର 247 ପିଲା । ଏଥିପାଇଁ 3218 ପରୀକ୍ଷା କେନ୍ଦ୍ର ସହ 316 ନୋଡାଲ ସେଣ୍ଟର କରାଯାଇଛି । ମାଓ ଅଞ୍ଚଳରେ 22ଟି ଥାନାରେ ନୋଡାଲ ସେଣ୍ଟର କରାଯାଇଛି। ଏଥି ମଧ୍ୟରେ କନ୍ଧମାଳରେ 7ଟି, କୋରାପୁଟରେ 5 ଟି ଏବଂ ମାଲକାନଗିରି ରେ 10 ଟି ପୋଲିସ ଷ୍ଟେସନରେ ନୋଡାଲ ସେଣ୍ଟର କରାଯାଇଛି।
ଇଟିଭି ଭାରତ, ଭୁବନେଶ୍ବର
