ଭୁବନେଶ୍ବର: ବୁଧବାର-ଗୁରୁବାର ମଧ୍ୟରାତ୍ରୀରେ ସ୍ଥଳ ଭାଗ ଛୁଇଁପାରେ ସାମୁଦ୍ରିକ ଝଡ "ବାୟୁ " । ଏହାର ସାମ୍ଭାବ୍ୟ ପ୍ରଭାବ ଅନୁଭୂତ ହେବା ଆଗରୁ ସତର୍କ ହୋଇ ଉଠିଛନ୍ତି ଗୁଜୁରାଟ ସରକାର । ଏହି ବାତ୍ୟାର ମୁକାବିଲା ପାଇଁ ଯୁଦ୍ଧକାଳୀନ ଭିତ୍ତିରେ ପ୍ରସ୍ତୁତି ଆରମ୍ଭ ହୋଇଯାଇଛି । ମାତ୍ର ଏଭଳି ସ୍ଥିତିରେ ଗୁଜୁରାଟକୁ ସହଯୋଗ କରିବା ପାଇଁ ତତ୍ପରତା ଦେଖାଇଛି ରାଜ୍ୟ ।
ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟର ମୁକାବିଲା କିଭଳି କରାଯିବ ସେହି ଅଭିଜ୍ଞତାକୁ ଗୁଜୁରାଟ ସହ ସେୟାର କରିଛି ଓଡିଶା । ଏ ସମ୍ପର୍କରେ ରାଜ୍ୟ ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀଙ୍କ ସହ ଆଲୋଚନା କରିଛନ୍ତି ଗୁଜୁରାଟ ସରକାରଙ୍କ ମୁଖ୍ୟ ଶାସନ ସଚିବ । ଫୋନ ଯୋଗେ ଉଭୟଙ୍କ ମଧ୍ୟରେ ବାର୍ତ୍ତାଳାପ ହୋଇଛି । ବାତ୍ୟା ଅନୁଭୂତ ହେବା ପୂର୍ବରୁ ଏବଂ ଏହା ପରେ ସୃଷ୍ଟି ହୋଇଥିବା ସ୍ଥିତିର ମୁକାବିଲା ପ୍ରସ୍ତୁତି କିପରି ଥିଲା ସେ ସମ୍ପର୍କରେ ଗୁଜୁରାଟକୁ ଅବଗତ କରିଛି ଓଡିଶା ।
"ଫନି" ବାତ୍ୟା ବେଳେ ଯେଭଳି ଭାବେ ବ୍ୟାପକ ସଂଖ୍ୟାରେ ଲୋକଙ୍କ ସ୍ଥାନାନ୍ତର କରାଯାଇଥିଲା ସେନେଇ ମଧ୍ୟ ଉଭୟ ରାଜ୍ୟ ମଧ୍ୟରେ ଆଲୋଚନା କରାଯାଇଛି । ଏହା ସହ ଯଦି ବାତ୍ୟା ସମୟରେ ଗୁଜୁରାଟ ସହାୟତା ମାଗେ, ତେବେ ଓଡିଶା ସହଯୋଗ କରିବାକୁ ରାଜି ଅଛି ବୋଲି ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀ ସୂଚନା ଦେଇଛନ୍ତି । ଓଡିଶା ସରକାର "ଫନି", ହୁଡହୁଡ୍ ଏବଂ "ତିତିଲ" ଭଲି ଝଡ ତୋଫାନର ସଫଳ ମୁକାବିଲା କରି ସାରିଛନ୍ତି ।
ପାଣିପାଗ ବିଭାଗର ପୂର୍ବାନୁମାନ ଅନୁସାରେ ଆରବ ସାଗରରେ ସୃଷ୍ଟି ହୋଇଥିବା ବାତ୍ୟା "ବାୟୁ" ଗୁଜରାଟରେ ସ୍ଥଳ ଭାଗ ଛୁଇଁବା ନେଇ ପୂର୍ବାନୁମାନ କରିଛି । ଏହାକୁ ଦୃଷ୍ଟିରେ ରଖି ଏହି ବାତ୍ୟା ଦ୍ବାରା ପ୍ରଭାବିତ ହେବାକୁ ଥିବା ସମ୍ଭାବ୍ୟ ଅଞ୍ଚଳରେ ଅନେକ ପ୍ରକାରର ସତର୍କତା ଅବଲମ୍ବନ କରାଯାଇଛି।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
