ଖୋର୍ଦ୍ଧା: ବିଧାୟକଙ୍କ ନାଁରେ ଫେକ ଆକାଉଣ୍ଟ ଖୋଲି ଟଙ୍କା ମାଗୁଛନ୍ତି ସାଇବର ଠକ । ତେବେ ବେଗୁନିଆ ନିର୍ବାଚନ ମଣ୍ଡଳୀର ବିଧାୟକ ରାଜେନ୍ଦ୍ର କୁମାର ସାହୁଙ୍କ ନାମରେ ଫେସବୁକରେ ଫେକ ଆକାଉଣ୍ଟ ଖୋଲି ମେସେଞ୍ଜର ଚାଟରେ ଟଙ୍କା ମଗାଯାଉଥିବା ଦେଖିବାକୁ ମିଳିଛି । ଏଭଳି ଘଟଣା ଘଟିଛି ବେଗୁନିଆ ଥାନା ଅଧିନ ସାନପଦର-ଦେଉଳି ଗ୍ରାମର ରାକେଶ କୁମାର ନାୟକଙ୍କ କ୍ଷେତ୍ରରେ ।
ସୂଚନା ଅନୁସାରେ ମଙ୍ଗଳବାର ସଂଧ୍ୟା ସମୟରେ ରାକେଶଙ୍କ ଫେସବୁକ ମେସେଞ୍ଜର ଚାଟରେ ବିଧାୟକଙ୍କ ନାମରେ ଖୋଲାଯାଇଥିବା ଫେସବୁକ ଆକାଉଣ୍ଟରୁ ଜରୁରୀ ଅଛି ଲେଖି ୭ ହଜାର ଟଙ୍କା ମାଗିଥିଲେ । ହେଲେ ରାକେଶଙ୍କ ମନରେ ବିଧାୟକ ଟଙ୍କା ମାଗୁଥିବା ନେଇ ସନ୍ଦେହ ଜାତ ହେବାରୁ କୌଣସି ଉତ୍ତର ନ ଦେଇ ଫେସବୁକ ଅଫ କରିଦେଇଥିଲେ । ଏବେ ଏହି ଘଟଣା ସୋସିଆଲ ମିଡିଆରେ ଘୁରିବୁଲୁଛି ।
ଏପଟେ ଘଟଣା ସମ୍ପର୍କରେ ବିଧାୟକଙ୍କ ମତାମତ ନିଆ ଯିବାରୁ, ସେ କହିଥିଲେ କି, ମୋ ନାମରେ କେହି ଦୁର୍ବୃତ୍ତ ଫେକ ଆକାଉଣ୍ଟ ଖୋଲି ମୋତେ ବଦନାମ କରିବା ପାଇଁ ଅପଚେଷ୍ଟା କରିଛି । ଏନେଇ ମୁଁ ସାଇବର ସେଲରେ ଅଭିଯୋଗ କରିବି ବୋଲି କହିଛନ୍ତି ବିଧାୟକ ରାଜେନ୍ଦ୍ର କୁମାର ସାହୁ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
