ଖୋର୍ଦ୍ଧା: ଆସୁଛି ଆଲୋକର ପର୍ବ ଦୀପାବଳୀ । ପୁରଠୁ ପଲ୍ଲୀ ବେଶ ଉତ୍ସାହର ସହ ଦୀପାବଳୀ ପାଳନ କରିଥାନ୍ତି ସମସ୍ତେ । କିନ୍ତୁ ଦୁଇ ବର୍ଷ ହେବ କୋରୋନା ପାଇଁ ଏହି ଉତ୍ସବ ଫିକା ପଡିଛି । ସେହିପରି ଚଳିତ ବର୍ଷ ବାଣ ବିକ୍ରି ଓ ଫୁଟାଇବା ଉପରେ କଟକଣା ଜାରି କରିଛନ୍ତି ରାଜ୍ୟ ସରକାର । ସେପଟେ ଦୀପାବଳିରେ ବାଣ ବ୍ୟବସାୟ କରି ନିଜ ପରିବାର ପ୍ରତିପୋଷଣ କରୁଥିବା ବ୍ୟବସାୟୀ ମାନେ ଚିନ୍ତାରେ ପଡିଛନ୍ତି ।
ବାଣ ବ୍ୟବସାୟ ବନ୍ଦ, ଚିନ୍ତାରେ ବ୍ୟବସାୟୀ
କଟକଣା ପାଇଁ ବେପାରରେ ବନ୍ଧା ହୋଇଛି ଡୋରି । ଓଡ଼ିଶା ବାଣ ବ୍ୟବସାୟର ପେଣ୍ଠସ୍ଥଳୀ କୁହାଯାଇଥିବା ଖୋର୍ଦ୍ଧାର ଜଟଣୀ ସହରରେ ପୁର୍ବ ବର୍ଷ ଭଳି ଖୋଲିନି ଭଳିକି ଭଳି ବାଣ ଦୋକାନ । ପ୍ରତିବର୍ଷ ଜଟଣୀ ସହରକୁ ଶିବକାଶୀରୁ ବହୁ ଭେରାଇଟିର ବାଣ ଆସୁଥିବା ବେଳେ ଚଳିତ ବର୍ଷ କଟକଣା ପାଇଁ ତାହା ଆଣିନାହାନ୍ତି ବ୍ୟବସାୟୀ । ତେବେ ରାଜ୍ୟ ସରକାର ନିଷ୍ପତ୍ତିରେ ପରିବର୍ତ୍ତନ କରି ବାଣ ଦୋକାନ ଖୋଲିବା ପାଇଁ ଦାବି କରିଛନ୍ତି ଜଟଣୀର ବାଣ ବ୍ୟବସାୟୀ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
