ଖୋର୍ଦ୍ଧା : କୋରୋନା ପ୍ରଭାବରେ ସାରା ଦେଶରେ ଲକଡ଼ାଉନ ହୋଇଛି । ଆଉ ଏହା ଦ୍ବାରା ବେଶି ପ୍ରଭାବିତ ହୋଇଛନ୍ତି ଚିଲିକାର ଯାତ୍ରୀବାହୀ ଡଙ୍ଗାଚାଳକ । ଲକଡାଉନ ପାଇଁ ପର୍ଯ୍ୟଟନ ସ୍ଥଳୀ ବନ୍ଦ ରହିବାରୁ ପର୍ଯ୍ୟଟକ ମାନେ ଆସୁନାହାନ୍ତି । ଯାହା ଫଳରେ ପର୍ଯ୍ୟଟନ ସ୍ଥଳୀ ଚିଲିକା ଉପରେ ନିର୍ଭର କରୁଥିବା ପ୍ରାୟ ୩୦୦ରୁ ଉର୍ଦ୍ଧ୍ବ ଘରୋଇ ଡଙ୍ଗା ଚାଳକମାନେ ଏବେ ହାତବାନ୍ଧି ବସିରହିଛନ୍ତି ।
ଯାତ୍ରୀମାନଙ୍କୁ ନେଇ ଚିଲିକାରେ ଭ୍ରମଣ କରାଇଲେ ନିଜର ଗୁଜୁରାଣ ମେଣ୍ଟାଉଥିବା ପରିବାର ଏବେ ଦୁର୍ଦ୍ଦିନରେ ରହୁଥିବା ଜଣାପଡ଼ିଛି । ମହାମାରୀ କୋରୋନା ଯୋଗୁଁ ସାରା ରାଜ୍ୟ ଓ ଦେଶରେ ଏବେ ତାଲାବନ୍ଦ । ନା ଆସୁଛନ୍ତି ପର୍ଯ୍ୟଟକ ନା ଚାଲୁଛି ସେମାନଙ୍କ ଯାତ୍ରୀବାହୀ ଡ଼ଙ୍ଗା । କୋରୋନାର ଚଡକ ପଡିଛି ସେମାନଙ୍କ ମୁଣ୍ଡରେ, ହନ୍ତସନ୍ତ ହେଉଛନ୍ତି ଏକହଜାରରୁ ଉର୍ଦ୍ଧ୍ବ ପରିବାର । ଯାହାଫଳରେ ଦୁଇ ଓଳା ଦୁଇ ମୁଠା ଖାଇବାକୁ ମିଳୁନାହିଁ ପେଟକୁ ଦାନା । ଅଭାବ ଅନଟନରେ ଦିନ କାଟୁଛନ୍ତି । ସରକାର ଏମାନଙ୍କ ପାଇଁ ସହାୟତା ଦେବାକୁ ଦାବି କରିଛନ୍ତି ଡଙ୍ଗା ଚାଳକମାନେ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
