ଖୋର୍ଦ୍ଧା: ବୋଲଗଡ ବ୍ଲକ ଶ୍ରୀଚନ୍ଦନପୁର ପାଟଣା ସେବା ସମବାୟ ସମିତିରେ ନିର୍ବାଚନକୁ ସାମୟିକ ଭାବେ ବନ୍ଦ ଘୋଷଣା କରିଛନ୍ତି ନିର୍ବାଚନ ଅଧିକାରୀ । ଉକ୍ତ ନିର୍ବାଚନ ପାଇଁ ନାମାଙ୍କନ ଦାଖଲ ସମୟ ଆଜି(ରବିବାର)କୁ ଧାର୍ଯ୍ୟ ହୋଇଥିଲା । ତେବେ ସମିତି ସମ୍ପାଦକ ବେଆଇନ ଭାବେ ୩୯ ଜଣ ବ୍ୟକ୍ତିଙ୍କ ନାମ ଭୋଟ ତାଲିକାରେ ସଂଯୋଗ କରିଥିବା ପ୍ରତିବାଦରେ କିଛି ସଦସ୍ୟ ଧାରଣାରେ ବସିଥିବା ଦେଖିବାକୁ ମିଳିଥିଲା ।
ସୂଚନା ଅନୁସାରେ ଉକ୍ତ ସମବାୟ ସମିତିର ସମ୍ପାଦକ ୩୯ ଜଣ ବ୍ୟକ୍ତିଙ୍କ ନାମ ଭୋଟ ତାଲିକାରେ ନୂତନ ଭୋଟର ଭାବେ ଅନ୍ତର୍ଭୁକ୍ତ କରିଥିଲେ । ଏହା ବେଆଇନ୍ ପ୍ରକ୍ରିୟାରେ ହୋଇଥିବା ଦର୍ଶାଇ କିଛି ସଦସ୍ୟ ୩ ଦିନ ଧରି ଅଭିଯୋଗ କରିଆସୁଛନ୍ତି । ତେବେ ଆଜି ସେମାନେ ଏହାର ପ୍ରତିବାଦରେ ଧାରଣାରେ ବସିଥିବା ସମୟରେ ଅନ୍ୟ ସଦସ୍ୟମାନେ ସେମାନଙ୍କୁ ବିରୋଧ କରିଥିଲେ । ଫଳରେ ଆଇନ ଶୃଙ୍ଖଳା ପରିସ୍ଥିତି ଉପୁଜିବା ସ୍ଥିତି ଦେଖି ଏସଡିପିଓ ସୁଶିଲ କୁମାର ମିଶ୍ରଙ୍କ ନେତୃତ୍ବରେ ୨ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯାଇଥିଲା ।
ଘଟଣାସ୍ଥଳରେ ବେଗୁନିଆ ତହସିଲଦାର ପୃଥ୍ବୀବଲ୍ଲଭ ମଣ୍ଡଳ ପହଞ୍ଚି ଦୁଇ ପକ୍ଷଙ୍କ ସହ ଆଲୋଚନା କରିଥିଲେ । ତେବେ ନିର୍ବାଚନ ଦାୟିତ୍ବରେ ଥିବା ଅଧିକାରୀଙ୍କ ସହ ତହସିଲଦାର ଆଲୋଚନା କରିବା ପରେ ନିର୍ବାଚନ ସ୍ଥଗିତ ନେଇ ନିର୍ବାଚନ ଅଧିକାରୀ ଲିଖିତ ଭାବେ ସୂଚନା ଦେଇଛନ୍ତି ।
ଇଟିଭି ଭାରତ, ଖୋର୍ଦ୍ଧା
