ଭୁବନେଶ୍ବର: ପଦ୍ମପୁର ଉପନିର୍ବାଚନ ସରିଯାଇଛି । ଫଳାଫଳ ଘୋଷଣା ବି ହୋଇସାରିଛି । ହେଲେ ବିଜେଡି ଏତେ ବ୍ୟବଧାନରେ ଜିତିବାକୁ ନେଇ ସହଜରେ ହଜମ କରିପାରୁନାହାନ୍ତି ବିରୋଧୀ । ଏନେଇ ଚାଲିଛି ଆତ୍ମଚିନ୍ତନ । କଂଗ୍ରେସ ଭୋଟ ବିଜେଡିକୁ ଯାଇଥିବା ବିରୋଧି ଦଳ ନେତା ଜୟନାରାୟଣ ମିଶ୍ର ବାରମ୍ବାର ଅଭିଯୋଗ କରିଥିବାବେଳେ ଏହାକୁ ଆଜି ସତ ବୋଲି କହିଛନ୍ତି କଂଗ୍ରେସ ବିଧାୟକ ସୁର ରାଉତରାୟ ।
ପଦ୍ମପୁର ଉପନିର୍ବାଚନରେ କଂଗ୍ରେସର ଶୋଚନୀୟ ପରାଜୟ ହୋଇଛି । ତେବେ ଏନେଇ ପ୍ରତିକ୍ରିୟା ରଖିଛନ୍ତି କଂଗ୍ରେସ ବିଧାୟକ ସୁରେଶ ରାଉତରାୟ । ସେ କହିଛନ୍ତି, "ପଦ୍ମପୁରରେ କଂଗ୍ରେସକୁ ହରାଇବା ପାଇଁ ସମ୍ପୂର୍ଣ୍ଣ ଡିଲ୍ ହୋଇଥିଲା । ଦଳର ଅନେକ ନେତା କଂଗ୍ରେସକୁ ହରାଇବାକୁ ସେଠିକି ଯାଇଥିଲେ । ଜିତାଇବାକୁ ତାଙ୍କର ଲକ୍ଷ୍ୟ ନଥିଲା । ଏପରିକି ଉଭୟଙ୍କ ମଧ୍ୟରେ ପଡ଼ୁନଥିବା ନେତା ସେଠି ଏତେ ଘନିଷ୍ଠ ହୋଇଗଲେ ଯେ ଗୋଟିଏ ହୋଟେଲରେ ଗୋଟିଏ ରୁମ୍ରେ ରହିଥିଲେ। ଉପରଠୁ ତଳ ପର୍ଯ୍ୟନ୍ତ ଅନେକ ନେତା ଏହି ଡିଲ୍ରେ ବିକ୍ରି ହୋଇଛନ୍ତି । ଶରତ ପଟ୍ଟନାୟକ ନିରୀହ ଲୋକ । ତେଣୁ ତାଙ୍କୁ ସଖୀ କଣ୍ଡେଇ ପରି ନଚାଉଛନ୍ତି ।" ତେବେ ଆଗକୁ ତ୍ରିମୁଖୀ ନୁହେଁ ଦ୍ବିମୁଖୀ ଲଢେଇ ହେବ କି ପ୍ରଶ୍ନରେ ସୁର କହିଛନ୍ତି, "ଏହା କେତେକାଂଶରେ ସତ୍ୟ । ଜାନକୀ ପଟ୍ଟନାୟକଙ୍କ ପରେ ଯେଉଁମାନେ କଂଗ୍ରେସ ପାଇଁ ନାଁ କମେଇଛନ୍ତି, ସେମାନେ କଂଗ୍ରେସକୁ ଉପଭୋଗ କରିଛନ୍ତି ଆଉ କଂଗ୍ରେସ ଜରିଆରେ ପଇସା ଓ ପାୱାର କମେଇଛନ୍ତି । ଏବଂ ସେମାନେ ହିଁ ଦଳକୁ ହରାଉଛନ୍ତି ।"
ସେହିପରି ବିରୋଧୀ ଦଳ ନେତା ଜୟନାରାୟଣ ମିଶ୍ର ମଧ୍ୟ ପଦ୍ମପୁର ଡିଲ୍ କଥାକୁ ପୁଣି ଦୋହରାଇଛନ୍ତି । ସେ କହିଛନ୍ତି, "ସତ୍ୟକୁ ସମସ୍ତେ ମାନିବେ । ସୁର ଭାଇ ବି ମାନିଛନ୍ତି । କଂଗ୍ରେସ ଓ ବିଜେଡି ଲୋକଙ୍କଠାରୁ ହିଁ ମୁଁ ଶୁଣିଛି ଯେ, ଡିଲ୍ ହୋଇଛି ବୋଲି । ସେମାନେ ବି ସ୍ୱୀକାର କରିଛନ୍ତି । କିନ୍ତୁ ମୋ ପାଖରେ ତାର କୌଣସି ଭିଡିଓ ନାହିଁ । ୨୦୨୪ରେ ବିଜେଡି ଓ କଂଗ୍ରେସ ଡିଲ କାମ ଦେବନି । ପ୍ରତି ନିର୍ବାଚନ ମଣ୍ଡଳୀରେ କାର୍ଯ୍ୟକ୍ରମ କରିବୁ । ଭୋଟରଙ୍କୁ ଆକୃଷ୍ଟ କରିବୁ । କଂଗ୍ରେସ ଦଳର ଭୋଟ କମ୍ । ସେଥିପାଇଁ ଅଣକଂଗ୍ରେସ ଭୋଟକୁ ଏକତ୍ରିତ କରିବାକୁ ଚେଷ୍ଟା କରିବୁ । ୨୦୨୪ରେ ଓଡ଼ିଶାରେ ନିର୍ବାଚନ ବିଜେପି ଓ ବିଜେଡି ଭିତରେ ହବ । କଂଗ୍ରେସ ପ୍ରତିଦ୍ବନ୍ଦିତାରୁ ବାହାରି ଗଲାଣି । ବହୁତ କମ ନିର୍ବାଚନ ମଣ୍ଡଳୀରେ କଂଗ୍ରେସର ଭୋଟ ରହିଛି । ଆମେ ୫୧ ପ୍ରତିଶତ ଭୋଟ୍ ନେବାକୁ ଯୋଜନା ରଖିଛୁ । କଂଗ୍ରେସ ଭୋଟ ବିଜେପି ବା ବିଜେଡି ଆଡ଼କୁ ଯିବ । ବିଜେଡିର ସଂଗଠନ ହେଲା ୩ଟା । ଅର୍ଥବଳ, ବାହୁବଳ ଓ ସରକାରୀ କଳ । ନବୀନ ବିରୋଧୀ କଂଗ୍ରେସକୁ ବହୁତ ଦିନ ଧରି ମ୍ୟାନେଜ କରି ନିର୍ବାଚନ ବୈତରଣୀ ପାର୍ ହେଉଥିଲେ । ଆଜି ଆମେ ଅଛୁ ବିରୋଧୀରେ । ଏଠି ଆମକୁ ମ୍ୟାନେଜ କରିବାର ପ୍ରଶ୍ନ ଉଠୁନି । ସେ କେନ୍ଦ୍ରକୁ ଧରିବାକୁ ଚେଷ୍ଟା କରୁଛନ୍ତି ।"
ଇଟିଭି ଭାରତ, ଭୁବନେଶ୍ବର
