ଖୋର୍ଦ୍ଧା: ବଦଳୁନି ଖୋର୍ଦ୍ଧା ସହରର ଚିତ୍ର । ଏପଟେ ସହର ପାଇଁ ଟେନସନ ସାଜିଛି ବର୍ଦ୍ଧିତ କ୍ୟାବିନ ସଂଖ୍ୟା । ସହରର ପ୍ରମୁଖ ରାସ୍ତା ମୁକୁନ୍ଦପ୍ରସାଦ ଛକ ଠାରୁ ଚଣ୍ଡୀଚୁଆ, ଉପଜିଲ୍ଲାପାଳଙ୍କ କାର୍ଯ୍ୟାଳୟ, ଥାନା, ପୌରପରିଷଦ କାର୍ଯ୍ୟାଳୟର ଚାରିପଟେ କ୍ୟାବିନ ବ୍ୟବସାୟ ଚାଲିଛି । ଏପରିକି ଏହି ସହର ଦେଇ ଦକ୍ଷିଣ ଓଡ଼ିଶା ଠାରୁ ପଶ୍ଚିମ ଓଡିଶା ଯାଏଁ ହଜାର ହଜାର ଯାନବାହନ ଚଳାଚଳ କରୁଥିବା ବେଳେ କ୍ୟାବିନ ପାଇଁ ଟ୍ରାଫିକ ସମସ୍ୟା ସୃଷ୍ଟି ହେଉଛି । ଦିନକୁ ଦିନ କ୍ୟାବିନ ସଂଖ୍ୟା ବଢୁଥିବା ବେଳେ ବ୍ୟବସାୟୀଙ୍କ ଥଇଥାନ ପ୍ରକଳ୍ପ କାଗଜପତ୍ରରେ ସୀମିତ ରହିଛି ।
2003 ମସିହାରେ ଜିଲ୍ଲା ପ୍ରଶାସନ ତରଫରୁ ଏକ ଉଚ୍ଚସ୍ତରୀୟ ବୈଠକରେ ସହରର 540 କ୍ୟାବିନ ବ୍ୟବସାୟୀଙ୍କୁ ସ୍ଥାନୀୟ ହାବେଳି ପଡିଆଠାରେ ଥଇଥାନ ପାଇଁ ଜମି ଚିହ୍ନଟ ହୋଇଥିଲା । ଏପରିକି ଉକ୍ତ ହାବେଳି ପ୍ରକଳ୍ପକୁ ତ୍ବରାନ୍ବିତ କରିବା ପାଇଁ ପୌରପରିଷଦ ପକ୍ଷରୁ ପ୍ରତି ବ୍ୟବସାୟୀ 3 ହଜାର ଟଙ୍କା ଲେଖାଏଁ ମଧ୍ୟ ପୈଠ ହୋଇଥିଲା । ମାତ୍ର ଉକ୍ତ ଥଇଥାନ ପ୍ରକଳ୍ପକୁ ଇତି ମଧ୍ୟରେ 16ବର୍ଷ ବିତିଯାଇଥିଲେ ବି ଆଗେଇନି କାମ । ଏପଟେ ବିଧାୟକ ପ୍ରକଳ୍ପ କାର୍ଯ୍ୟ ତ୍ବରାନ୍ବିତ କରିବେ ବୋଲି ପ୍ରତିଶ୍ରୁତି ଦେଇଛନ୍ତି ।
ବାସ୍ତବରେ ଏହି ପ୍ରକଳ୍ପ କାର୍ଯ୍ୟ ତ୍ବରାନ୍ବିତ ହେବ ନା ପୁର୍ବ ପରି କେବଳ କାଗଜପତ୍ରରେ ସୀମିତ ରହିବ ତାକୁ ନେଇ ଚିନ୍ତାରେ ବ୍ୟବସାୟୀ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
