ଭୁବନେଶ୍ବର: ଦେଶରେ ହୋଇପାରେ ଆଗୁଆ ନିର୍ବାଚନ । ଏନେଇ ଜାତୀୟସ୍ତରରେ ତତ୍ପରତା ପ୍ରକାଶ ପାଇଛି । ସଂସଦର ସ୍ବତନ୍ତ୍ର ଅଧିବେଶନରେ ଗୋଟିଏ ଦେଶ ଗୋଟିଏ ନିର୍ବାଚନ ବିଲ ଆସିପାରେ ବୋଲି ଚର୍ଚ୍ଚା ହେଉଛି । ରାଜ୍ୟ ସରକାର ମଧ୍ୟ ଆଗୁଆ ନିର୍ବାଚନ ନେଇ ଅଣ୍ଟା ଭିଡିଥିବା ନେଇ ଆଲୋଚନା ହେଲାଣି । ଓଡ଼ିଶାରେ ଜିଲ୍ଲାପାଳ ଏବଂ ନିର୍ବାଚନୀ ଅଧିକାରୀମାନଙ୍କ ସହ ଆଲୋଚନା ପାଇଁ ୧୩ ତାରିଖରେ ଓଡିଶା ଗସ୍ତରେ ଆସୁଛନ୍ତି ନିର୍ବାଚନ କମିଶନ ସଦସ୍ୟ । ତେବେ ଏହାକୁ ନେଇ ରାଜନୀତି ମଧ୍ୟ ଜୋର ଧରିଲାଣି । ଶାସକ ଦଳକୁ ଟାର୍ଗେଟ କରୁଛନ୍ତି ବିରୋଧୀ । ବିଜେପି କହିଛି ନବୀନଙ୍କ ଲୋକପ୍ରିୟତା ଦିନକୁ ଦିନ କମିଯାଉଛି । ତେଣୁ ସେ ସରକାରଙ୍କ କାର୍ଯ୍ୟକାଳ ଶେଷ ହେବା ପୂର୍ବରୁ ଜନମତକୁ ନିଜ ଆଡକୁ ନେବାକୁ ଆଗୁଆ ନିର୍ବାଚନ ନେଇ ପ୍ରସ୍ତୁତି କରିପାରନ୍ତି ।
ବରିଷ୍ଠ ବିଜେପି ନେତା ପୃଥ୍ବୀରାଜ ହରିଚନ୍ଦନ କହିଛନ୍ତି, "ଓଡ଼ିଶା ସରକାର ଚାହୁଁଛନ୍ତି ଆଗୁଆ ନିର୍ବାଚନ ହେଉ । କାରଣ ମୁଖ୍ୟମନ୍ତ୍ରୀଙ୍କ ଲୋକପ୍ରିୟତା କମିଗଲାଣି । ୬ ମାସ ଭିତରେ ମୁଖ୍ୟମନ୍ତ୍ରୀଙ୍କ ଲୋକପ୍ରିୟତା ୨୭ ପ୍ରତିଶତ କମିଛି ବୋଲି ବିଭିନ୍ନ ସର୍ବେକ୍ଷଣରୁ ଜଣାପଡ଼ିଛି । ମୁଖ୍ୟମନ୍ତ୍ରୀ ଘରୁ ବାହାରକୁ ବାହାରି ପାରୁନାହାନ୍ତି କି ଲୋକଙ୍କୁ ଭେଟି ପାରୁନାହାନ୍ତି । ଅମଲାତନ୍ତ୍ର ସବୁ ପରିଚାଳନା କରୁଛି । ଏ ସବୁ କଥାକୁ ଓଡ଼ିଶା ଲୋକ ଜାଣିଗଲେଣି । ତେଣୁ ବିଜେଡି ଆଗୁଆ ନିର୍ବାଚନ ପାଇଁ ଜୋରଦାର ଚେଷ୍ଟା କରୁଥିଲା । କିନ୍ତୁ ଆଗୁଆ ନିର୍ବାଚନ ହେବାର ସମ୍ଭାବନା ବହୁତ କମ୍ ।" ବିଜେପି ଆଗୁଆ ନିର୍ବାଚନ ଚାହୁଁଥିବା ନେଇ କଂଗ୍ରେସର ଅଭିଯୋଗ ଉପରେ ସେ କହିଛନ୍ତି, "ଜାତୀୟ ସର୍ବେକ୍ଷଣ ଗୁଡ଼ିକର ଫଳାଫଳ ବୋଧହୁଏ କଂଗ୍ରେସ ନେତାମାନେ ଦେଖିନାହାନ୍ତି । ତଳସ୍ତରରେ ନେତା କି କର୍ମୀ ଆଉ କଂଗ୍ରେସରେ ନାହାନ୍ତି । ବିଭିନ୍ନ ସର୍ବେକ୍ଷଣରେ ମୋଦିଙ୍କ ଲୋକପ୍ରିୟତା ସ୍ପଷ୍ଟ ଭାବେ ଜଣାପଡୁଛି । ତେଣୁ କଂଗ୍ରେସର ମନ୍ତବ୍ୟ ବାହୁଲ୍ୟ ମାତ୍ର ।"
ଏହା ମଧ୍ୟ ପଢ଼ନ୍ତୁ...One Nation One Election: ଆଉ ପାଦେ ଆଗକୁ ବଢିଲା କେନ୍ଦ୍ର, କୋବିନ୍ଦଙ୍କ ନେତୃତ୍ବରେ ଗଠନ ହେଲା କମିଟି
ସେ ଆହୁରି କହିଛନ୍ତି, "କୌଣସି ରାଜନୈତିକ ଦଳ 'ୱାନ୍ ନେସନ୍ ୱାନ୍ ଇଲେକ୍ସନ୍' ନେଇ ରାଜି ନଥିଲେ । ତେଣୁ ସେ ବିଷୟରେ ଚର୍ଚ୍ଚା ଆଲୋଚନା ହେଲାବେଳେ କଂଗ୍ରେସ ବି ବିରୋଧୀ ଦଳ ଭାବେ ପ୍ରସ୍ତୁତ ନଥିଲା । ତେଣୁ ବର୍ତ୍ତମାନ ଏନେଇ ହେଉଥିବା ଚର୍ଚ୍ଚାରେ କୌଣସି ବାସ୍ତବତା ନାହିଁ । କାରଣ ଜାତୀୟ ନିର୍ବାଚନ କମିଶନ ବିଭିନ୍ନ ରାଜନୈତିକ ଦଳଙ୍କ ସହମତି ଅପେକ୍ଷା କରିଥିଲେ । ହେଲେ ବିରୋଧ ଯୋଗୁଁ ଏ କଥା ଆଗକୁ ବଢ଼ିପାରିଲା ନାହିଁ । ଆଗାମୀ ସଂସଦ ଅଧିବେଶନରେ ଅନେକ ଗୁରୁତ୍ବପୂର୍ଣ୍ଣ ବିଲ୍ ଆସିପାରେ । ନିର୍ବାଚନ ନେଇ କୌଣସି ନିଷ୍ପତି ହେବ ବୋଲି ଲାଗୁନାହିଁ ।" ଅନ୍ୟପଟେ 'ୱାନ୍ ନେସନ୍ ୱାନ୍ ଇଲେକ୍ସନ୍' ନେଇ ପ୍ରଧାନମନ୍ତ୍ରୀ ଏକ କମିଟି ଗଠନ କରିଛନ୍ତି । ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇଛି । ପ୍ରମୁଖ ରାଜନୈତିକ ଦଳ ଗୁଡ଼ିକର ମତାମତ ଗ୍ରହଣ କରି ଏହି କମିଟି ଖୁବଶୀଘ୍ର କେନ୍ଦ୍ର ସରକାରଙ୍କୁ ରିପୋର୍ଟ ଦେବ ।
ଇଟିଭି ଭାରତ, ଭୁବନେଶ୍ବର
