ଭୁବନେଶ୍ବର: ଡମ୍ପିଂୟାର୍ଡର ଦୁର୍ଗନ୍ଧରେ ଅତିଷ୍ଠ ହୋଇଗଲେଣି ସ୍ମାର୍ଟସିଟି ବାସିନ୍ଦା । ସେପଟେ ଗାଡ଼କଣ ଡମ୍ପିଂୟାର୍ଡ ସ୍ଥାନାନ୍ତର ଦାବିରେ ସୈନିକ ସ୍କୁଲ ନିକଟରେ ଆଜିକୁ ୩୧ ଦିନ ଧରି ଜିଲ୍ଲା ସତ୍ୟାଗ୍ରହ ଜାରି ରଖିଛି ବିଜେପି । ଏହି ସତ୍ୟାଗ୍ରହରେ ଗୁରୁବାର ଦିନ ସାମିଲ ହୋଇଥିଲେ ରାଜ୍ୟ ବିଜେପି ସଭାପତି ମନମୋହନ ସାମଲ । ରାଜ୍ୟ ସରକାର ତଥା ବିଏମସି ପ୍ରଶାସନକୁ ସମାଲୋଚନା କରି ରାଜ୍ୟ ବିଜେପି ସଭାପତି କହିଥିଲେ ଯେ, ଆମେ ମାସେ ହେଲା ଧାରଣାରେ ବସିଲୁ ଏବେ ବି ସରକାରଙ୍କୁ ସମୟ ଦେଉଛୁ । ଆଉ ୪ ମାସ ପରେ ମେ' ମାସରେ ବିଜେପି ସରକାରକୁ ଆସିଲେ ୭୨ ଘଣ୍ଟାରେ ସଫା ହୋଇଯିବ ଗାଡ଼କଣ ଡମ୍ପିଂୟାର୍ଡ । ମାଇକ୍ରୋସ୍କୋପରେ ଦେଖିଲେ ବି ଟିକେ ବି ଅଳିଆ ମିଳିବନି ।
କେନ୍ଦ୍ର ସରକାର ଆବର୍ଜନା ପରିଚାଳନା ପାଇଁ କୋଟି କୋଟି ଟଙ୍କା ଦେଉଥିଲେ ମଧ୍ୟ ରାଜ୍ୟ ସରକାର ବିଫଳ ହୋଇଛନ୍ତି । ରାଜଧାନୀକୁ ଅଳିଆ ପାହାଡ଼ କରି ମାସେ ହେଲା ଦୁର୍ଗନ୍ଧରେ ଅସ୍ତବ୍ୟସ୍ତ ହେଲେଣି ରାଜଧାନୀବାସୀ । ଯେଉଁଥିପାଇଁ ଡେଙ୍ଗୁ ବଢିଲା । ଏ ସରକାର ରାଜଧାନୀକୁ ପରିଷ୍କାର ପରିଚ୍ଛନ୍ନ ରଖିବା ପାଇଁ ଅସମର୍ଥ । ସରକାର ବୋଲି କିଛି ଜିନିଷ ନାହିଁ ଓଡ଼ିଶାରେ । ଏଠି ମୁଖ୍ୟମନ୍ତ୍ରୀ କିମ୍ବା ତାଙ୍କ ମନ୍ତ୍ରୀମାନେ ଦେଖିବାକୁ ମିଳୁନାହାଁନ୍ତି । ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ବିପର୍ଯ୍ୟ ଅବସ୍ଥାରେ । ଲୋକମାନେ ବି ଜାଣି ସାରିଲେଣି ଯେ ଓଡ଼ିଶାରେ ଆଉ ସରକାର ନାହିଁ ।
ଏହା ମଧ୍ୟ ପଢନ୍ତୁ... ଗାଢକଣ ଅଳିଆ ଗଦା ଉଚ୍ଛେଦ ପ୍ରସଙ୍ଗ, ମେୟର ପଚାରିଲେ ଅଳିଆ ନେଇ କୁଆଡେ ଯିବ ବିଏମସି
ଦୀର୍ଘ ୩୧ ଦିନ ଧରି ଆମେ ବସିଲୁଣି ହେଲେ ସରକାର ଜାଣି ପାରୁନାହାନ୍ତି । ଶାସକ ଦଳର କେହି ବି ଆସି ନାହାନ୍ତି । ତେଣୁ ଆଗାମୀ ଦିନରେ ଏହାକୁ ନେଇ ଆମେ ଭୁବନେଶ୍ଵରରେ ଲୋକମାନଙ୍କ ପାଖକୁ ଯିବୁ । ଲୋକମାନେ ବିଚାର କରିବେ । ସେହିପରି ମେୟର କହିଥିଲେ ଆମେ ଏହାର ସମାଧାନ ମାସେ ମଧ୍ୟରେ କରିଦେବୁ । ହେଲେ ଏପର୍ଯ୍ୟନ୍ତ କିଛି ହୋଇନାହିଁ । ଭୁବନେଶ୍ବରକୁ ଗନ୍ଧମୟ କରିବାରେ ରାଜ୍ୟ ସରକାର ସମ୍ପୂର୍ଣ୍ଣ ଦାୟୀ । ଏହି କିନ୍ତୁ ରାଜ୍ୟ ସରକାର ଏଥିପ୍ରତି କର୍ଣ୍ଣପାତ ନକରିବା ବଡ ଦୁର୍ଭାଗ୍ୟର ବିଷୟ । ଏହି ଦୁର୍ଗନ୍ଧମୟ ପରିବେଶ ପାଇଁ ମ୍ୟୁନିସପାଲିଟି ଘେରାଉ କରାଯାଇଥିଲା । ଘେରାଉ ପରେ ବି ମ୍ୟୁନିସପାଲିଟି ଓ କମିଶନଙ୍କ ନିଦ ଭାଙ୍ଗିଲା ନାହିଁ । ଶାସକ ଦଳ ଓ ମେୟର ଲୋକଙ୍କ ଟିକସ ଟଙ୍କାକୁ ମଉଜ ମସ୍ତିରେ ନ ଉଡାଇ ବରଂ ଏ ଅଳିଆ ଗଦାର ସମସ୍ୟାକୁ ସମାଧାନ କରିବା ପାଇଁ ଖର୍ଚ୍ଚ କରନ୍ତୁ ବୋଲି ରାଜ୍ୟ ବିଜେପି ସଭାପତି କହିଛନ୍ତି ।
ଇଟିଭି ଭାରତ, ଭୁବନେଶ୍ବର
