ଭୁବନେଶ୍ୱର: ଆଜି ବିଜେପିର ରାଜ୍ୟ କାର୍ଯ୍ୟକାରିଣୀ ବୈଠକ ଜାରି ରହିଛି । ୨୦୨୪ ସାଧାରଣ ନିର୍ବାଚନ ପାଇଁ ଏହି ବୈଠକରେ ରଣନୀତି ପ୍ରସ୍ତୁତ କରୁଛି ଦଳ । ଏନେଇ ପ୍ରତିକ୍ରିୟା ରଖିଛନ୍ତି ବିଜେଡି ବିଧାୟକ ଉମାକାନ୍ତ ସାମନ୍ତରାୟ । ୨୦୧୯ ନିର୍ବାଚନ ପୂର୍ବରୁ ମଧ୍ୟ ୧୨୦ ମିଶନ କଥା କହିଥିଲେ ବିଜେପି ନେତା । କିନ୍ତୁ ୨୦୧୯ରେ କେତେ ସି୍ଟ ପାଇଲେ ବୋଲି ସେ ପ୍ରଶ୍ନ କରିଛନ୍ତି । ତେବେ ୨୦୨୪ ନିର୍ବାଚନରେ ବିଜେଡିର ଆସନ ସଂଖ୍ୟା ଆହୁରି ବଢ଼ିବ ବୋଲି ସେ କହିଛନ୍ତି ।
ରବିବାର ବିଜେପିର ରାଜ୍ୟ କାର୍ଯ୍ୟକାରିଣୀ ବୈଠକ ଆରମ୍ଭ ହୋଇଛି । ଓଡ଼ିଶାରେ ସରକାର ଗଠନ ଏବଂ ଅଧିକ ଲୋକସଭା ସିଟ ଜିତିବା ଲକ୍ଷ୍ୟ ନେଇ ରଣନୀତି ପ୍ରସ୍ତୁତ କରିବା ଉଦ୍ଦେଶ୍ୟରେ ଏହି ବୈଠକ ଆରମ୍ଭ ହୋଇଛି । ୨୦୨୪ ପାଇଁ ଦଳ କିପରି ମଜଭୁତ ହେବ ସେ ନେଇ ବୈଠକରେ ମାନସ ମନ୍ଥନ ହେବ । ବୈଠକରେ କ୍ଷେତ୍ରୀୟ ପ୍ରଭାରୀ ସୁନୀଲ ବଂଶଲ, ରାଜ୍ୟ ପ୍ରଭାରୀ ଡି ପୁରନ୍ଦେଶ୍ୱରୀ, ବିଜେପି ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା, ରାଜ୍ୟ ସଭାପତି ସମୀର ମହାନ୍ତିଙ୍କ ସମେତ ଦଳର ବରିଷ୍ଠ ନେତା ଉପସ୍ଥିତ ରହିଥିଲେ । ତେବେ ବିଜେପିର ଜାତୀୟ କାର୍ଯ୍ୟକାରିଣୀରେ ମୋଦି ଦେଇଥିବା ୨ ସୂତ୍ରୀ ମନ୍ତ୍ର ନେଇ ରାଜ୍ୟ କାର୍ଯ୍ୟକାରିଣୀରେ ନିଷ୍ପତ୍ତି ହେବ ବୋଲି ସୂଚନା ଦେଇଛନ୍ତି ରାଜ୍ୟ ବିଜେପି ସାଧାରଣ ସମ୍ପାଦକ ଗୋଲକ ମହାପାତ୍ର । ରାଜ୍ୟ ସରକାର କେନ୍ଦ୍ରୀୟ ଯୋଜନାକୁ ହାଇଯାକ କରି ନେଉଥିବା କଥା ଲୋକଙ୍କୁ କୁହାଯିବ ବୋଲି ବିଜେପି ସାଧାରଣ ସମ୍ପାଦକ ସୂଚନା ଦେଇଥିଲେ ।
ଏହା ମଧ୍ୟ ପଢ଼ନ୍ତୁ...BJP Executive Meet: ଜାତୀୟ କାର୍ଯ୍ୟକାରିଣୀ 2 ସୁତ୍ରୀକୁ ଫୋକସ
ତେବେ ବିଜେପି କାର୍ଯ୍ୟକାରିଣୀ ବୈଠକ ନେଇ ବିଜେଡି ବିଧାୟକ ଉମାକାନ୍ତ ସାମନ୍ତରାୟ କହିଛନ୍ତି, "୨୦୧୯ରେ ୧୨୦ ମିଶନ କଥା କହିଥିଲେ ବିଜେପି ନେତା । ସେହି ୧୨୦ ମିଶନ କୁଆଡେ ଗଲା ? କେତେ ସିଟ୍ ପାଇଲେ ୨୦୧୯ରେ ? ଆଜି ବି କହୁଛୁ, ୨୦୧୯ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯେତିକି ଆସନ ପାଇଥିଲେ, ୨୦୨୪ରେ ତାଠାରୁ ଅଧିକ ଆସନ ଜିତିବ ବିଜେଡି । ନବୀନ ପଟ୍ଟନାୟକ ପୁଣିଥରେ ମୁଖ୍ୟମନ୍ତ୍ରୀ ହେବେ । କେନ୍ଦ୍ର ବିନା ସ୍ବାର୍ଥରେ କାହାକୁ ପଇସା ଦେଉନାହିଁ । କେନ୍ଦ୍ର ସରକାର ଓଡ଼ିଶାକୁ ସାବତ ପୁଅ ଭଳି ବ୍ୟବହାର କରୁଛନ୍ତି । କୌଣସି ଯୋଜନା ରାଜ୍ୟ ସରକାର ହାଇଯାକ କରିନାହାନ୍ତି ।" ବିଜେପି ନେତା କେବଳ ଭାଷଣ ଦିଅନ୍ତି ଓ ଲୋକଙ୍କୁ ମିଛ କୁହନ୍ତି ବୋଲି କହିଛି ବିଜେଡି ।
ଇଟିଭି ଭାରତ, ଭୁବନେଶ୍ବର
