ଖୋର୍ଦ୍ଧା: ଜଣେ ଡ଼ାକ୍ତରରେ ଚାଲିଛି ରୋଗୀ ସେବା । ତାହା ପୁଣି ତାଙ୍କ ମନଇଚ୍ଛା । ରାତିରେ ତ ଏଠାକୁ ରୋଗୀଙ୍କୁ ଆଣିବା ଅପେକ୍ଷା ନଆଣିବା ଆହୁରି ଭଲ । କାରଣ ରାତିରେ ଆଟେଣ୍ଡାଣ୍ଟଙ୍କ ଦ୍ବାରା ଚାଲେ ସ୍ବାସ୍ଥ୍ୟ ସେବା । ଯାହାକୁ ନେଇ ସ୍ଥାନୀୟ ଅଞ୍ଚଳରେ ବସା ବାନ୍ଧିଛି ତୀବ୍ର ଅସନ୍ତୋଷ ।
1988 ମସିହାରେ ତତ୍କାଳୀନ ମୁଖ୍ୟମନ୍ତ୍ରୀ ଜାନକୀ ବଲ୍ଲଭ ପଟ୍ଟନାୟକ 10 ଶଯ୍ୟା ବିଶିଷ୍ଟ ଏହି ସ୍ବାସ୍ଥ୍ୟ କେନ୍ଦ୍ରକୁ ଉଦଘାଟନ୍ କରିଥିଲେ । କିନ୍ତୁ ବାସ୍ତବିକ ସ୍ଥିତି କିଛି ଅଲଗା । ମାତ୍ର 6ଟି ଶଯ୍ୟା ଥିବାବେଳେ ତାହା ମଧ୍ୟରୁ ଅନେକ ଭାଙ୍ଗି ନଷ୍ଟ । ଯାହାକୁ ନେଇ ରୋଗୀ ଏବଂ ସେମାନଙ୍କ ସମ୍ପର୍କୀୟ ମଧ୍ୟରେ ଦେଖାଦେଇଛି ଅସନ୍ତୋଷ ।
ସେହିପରି ଦୀର୍ଘ 20 ବର୍ଷ ଧରି ବେଗୁନିଆ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରକୁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ପରିଣତ କରିବା ପାଇଁ ଦାବି ହୋଇଆସୁଛି । ଏଥିପାଇଁ ବିଧାନସଭାର ଷ୍ଟାଣ୍ଡିଙ୍ଗ କମିଟି ଟିମ ମଧ୍ୟ ସ୍ବାସ୍ଥ୍ୟ କେନ୍ଦ୍ର ପରିଦର୍ଶନରେ ଆସିବା ସହ ଦାବି ପୂରଣ ପାଇଁ ପ୍ରତିଶ୍ରୁତି ମଧ୍ୟ ଦେଇଥିଲେ । କିନ୍ତୁ ସେ ପ୍ରତିଶ୍ରୁତି କେବଳ ପ୍ରତିଶ୍ରୁତିରେ ରହିଯାଇଥିବା ଅଭିଯୋଗ କରିଛନ୍ତି ଅଞ୍ଚଳବାସୀ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
