ଭୁବନେଶ୍ବର: ଅଙ୍ଗଦାନ କରିବାକୁ ନାମ ପଞ୍ଜୀକରଣ କଲେ ସ୍ବର୍ଗତ ଅଭିନେତା ପିଣ୍ଟୁ ନନ୍ଦଙ୍କ ମାଉସୀ । ୭୩ ବର୍ଷରେ ବଞ୍ଚିଥିବା ଅବସ୍ଥାରେ ସ୍ବଇଚ୍ଛାରେ ନିଜ ଅଙ୍ଗଦାନ କରିବାକୁ ନାମ ପଞ୍ଜୀକରଣ କରି ଉଦାହରଣ ସାଜିଲେ ବୃଦ୍ଧା । ଓଡ଼ିଶା-ମୋ ପରିବାର କାର୍ଯ୍ୟାଳୟରେ ନିଜ ନାଁକୁ ପଞ୍ଜୀକୃତ କରିଛନ୍ତି ଶାନ୍ତିଲତା କର ।
ତେବେ ଅଙ୍ଗଦାନକୁ ଦୁନିଆର ସର୍ବଶ୍ରେଷ୍ଠ ଦାନ ଭାବେ ଆଖ୍ୟା ଦିଆଯାଇଛି । ଏହାକୁ ଭଲ ଭାବେ ବୁଝିଛନ୍ତି କେତେକ ସଦ୍ ବ୍ୟକ୍ତି ନିଜ ଇଚ୍ଛାରେ ଅଙ୍ଗ ଦାନ କରି ପୂର୍ଣ୍ଣ ଅର୍ଜନ କରୁଛନ୍ତି । ଏହି ପରି ଭାବେ ପିଣ୍ଟୁ ନନ୍ଦଙ୍କ ମାଉସୀ ତଥା ସାଲେପୁର ଅଞ୍ଚଳର ୭୩ ବର୍ଷିୟା ବୃଦ୍ଧା ଶାନ୍ତିଲତା କର ମଧ୍ୟ ଏହି ମହାମ କର୍ମରେ ନିଜକୁ ଯୋଡ଼ିଛନ୍ତି । ଅଙ୍ଗଦାନ କରିବା ପାଇଁ କିଛି ଦିନ ହେଲା ନାମ ପଞ୍ଜୀକରଣ କରିବାକୁ ମନସ୍ଥ କରିଥିଲେ ।
ଶାନ୍ତିଲତା କରଙ୍କ କହିବାନୁସାରେ, ସେ କୌଣସି ସ୍ଵେଚ୍ଛାସେବୀ ସଂଗଠନକୁ ଭଲ ଭାବେ ଜାଣି ନଥିଲେ । ସେଥିପାଇଁ ତାଙ୍କୁ ସୁଯୋଗ ମିଳି ନଥିଲା । ସେ ମୁଖ୍ୟମନ୍ତ୍ରୀଙ୍କୁ ନିଜ ହୃଦୟରୁ ବହୁତ ସମ୍ମାନ କରନ୍ତି । ସେହି ଉଦ୍ଦେଶ୍ୟରେ ସେ ଓଡ଼ିଶା-ମୋ ପରିବାରର ଅଙ୍ଗଦାନ ପଞ୍ଜୀକରଣ କାର୍ଯ୍ୟକ୍ରମ ବିଷୟରେ ସୂଚନା ପାଇବା ପରେ ସିଧା ସଳଖ ଓଡ଼ିଶା-ମୋ ପରିବାର କାର୍ଯ୍ୟାଳୟକୁ ଆସି ନିଜ ନାମ ପଞ୍ଜୀକରଣ କରାଇଥିଲେ । ତାଙ୍କ ଭଳି ସମସ୍ତ ବ୍ୟକ୍ତି ମଧ୍ୟ ସ୍ଵଇଚ୍ଛାରେ ଅଙ୍ଗଦାନ କରିବାକୁ ଆଗେଇ ଆସନ୍ତୁ ବୋଲି ଶାନ୍ତିଲତା କର କହିଛନ୍ତି ।
ଶାନ୍ତିଲତା କର କହିଛନ୍ତି,"ପ୍ରତିଟି ଜୀବନ ମୂଲ୍ୟବାନ । ଯଦି ଆମେ ମୃତ୍ୟୁ ପରେ ଅଙ୍ଗଦାନ କରି ଅନ୍ୟ କାହାର ଉପକାର କରୁଛନ୍ତି ତେବେ ଏହା ଭଗବାନଙ୍କ ଆଶୀର୍ବାଦ ।" ତାଙ୍କ ପରି ମହିଳା ସମାଜ ପାଇଁ ଏକ ଅନନ୍ୟ ଉଦାହରଣ । ବୃଦ୍ଧାବସ୍ଥା ଯୋଗୁଁ ଠିକ୍ ଭାବେ ଚାଲି ପାରୁ ନଥିଲେ ମଧ୍ୟ ସେ ନିଜ ନାମ ପଞ୍ଜୀକରଣ କରାଇବା ପାଇଁ ବହୁ ଦୂରରୁ ଆସିଥିଲେ । ଏହାସହ ଓଡ଼ିଶା-ମୋ ପରିବାର ଦ୍ଵାରା କରାଯାଉଥିବା ସମସ୍ତ ସେବାକାର୍ଯ୍ୟର ଉଚ୍ଚ ପ୍ରଶଂସା କରିଥିଲେ ।
ଏହା ମଧ୍ୟ ପଢନ୍ତୁ....ମୃତ୍ୟୁ ପରେ ବି ଅମର, ଦୁଇ ଜଣଙ୍କୁ ପୁନର୍ଜନ୍ମ ଦେଲେ ବ୍ରେନ୍ ଡେଡ୍ ଘୋଷିତ ମହିଳା
ଇଟିଭି ଭାରତ, ଭୁବନେଶ୍ବର
