ଖୋର୍ଦ୍ଧା: ପାଟ୍ରୋଲିଂ ବେଳେ 3 ଗଞ୍ଜେଇ ଚାଲାଣକାରୀ ଗିରଫ । ଖୋର୍ଦ୍ଧା ଅବକାରୀ ବିଭାଗର ମୋବାଇଲ ସ୍କ୍ବାର୍ଡ 3 ଗଞ୍ଜେଇ ଚାଲାଣକାରୀଙ୍କୁ ଗିରଫ କରିବା ସହ 61 କିଲୋଗ୍ରାମର ଗଞ୍ଜେଇ ଜବତ କରିଛି ।
ଭିଡିଓ ସୌଜନ୍ୟ: ପ୍ରତିନିଧି, ଖୋର୍ଦ୍ଧା
ସୂଚନା ଅନୁଯାୟୀ, ବୁଧବାର ଭୋର ସମୟରେ ଖୋର୍ଦ୍ଧା 16ନଂ ଜାତୀୟ ରାଜପଥରେ ଅବକାରୀ ବିଭାଗର ମୋବାଇଲ ସ୍କ୍ବାର୍ଡ ଦ୍ବାରା ପାଟ୍ରୋଲିଂ କରାଯାଉଥିଲା । ଏହି ସମୟରେ ବାଲିଗୁଡାରୁ ଆସୁଥିବା ଏକ କାରକୁ ସନ୍ଦେହରେ ସ୍କ୍ବାର୍ଡ ଅଟକାଇଥିଲେ । ଏହାପରେ ଯାଞ୍ଚ ବେଳେ କାର ମଧ୍ୟରେ ବିପୁଳ ପରିମାଣର ଗଞ୍ଜେଇ ଥିବା ଜଣାପଡିଥିଲା ।
ଏହାପରେ ଅବକାରୀ ବିଭାଗ କାରରେ ଥିବା 3ଜଣଙ୍କୁ ଗିରଫ କରିବା ସହ 61କେଜି ଗଞ୍ଜେଇ ଭର୍ତ୍ତି ବସ୍ତା ଏବଂ ବ୍ୟବହୃତ କାରକୁ ଜବତ କରିଛି । ଗିରଫ ଅଭିଯୁକ୍ତମାନେ ହେଲେ କାର୍ତ୍ତିକ ବେହେରା, ମହେଶ୍ବର ନାୟକ ଏବଂ ତୁଷାର ଲେଙ୍କା । ଏମାନେ ବାଲିଗୁଡାରୁ ଜାରକାକୁ ଗଞ୍ଜେଇ ଚୋରା ଚାଲାଣ କରୁଥିବା ପ୍ରାଥମିକ ତଦନ୍ତରୁ ଜଣାପଡିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
