କେନ୍ଦୁଝର: ‘ବନସ୍ତେ ଡାକିଲା ଗଜ, ବରଷକେ ଥରେ ଆସିଛି ରଜ’ । ବର୍ଷକୁ ଥରେ ପାଳନ ହେଉଥିବା ଏହି ଗଣପର୍ବରେ ଛୁଆଠାରୁ ଆରମ୍ଭ କରି ବଡ ପର୍ଯ୍ୟନ୍ତ ସଭିଏଁ ଏକାଠି ହୋଇ ମଜା ନିଅନ୍ତି । ହେଲେ ଆଧୁନିକତାର ଛାପ ଆଗରେ ଏକପ୍ରକାର ଫିକା ପଡିବାରେ ଲାଗିଛି ପ୍ରାଚୀନ ସଂସ୍କୃତି । ଯାହାକୁ ପୁନଃଜୀବିତ କରିବା ପାଇଁ ପ୍ରୟାସ ଆରମ୍ଭ କରିଛି ସହରରେ ଥିବା ରଜ ମହୋତ୍ସବ କମିଟି ।
ମୁଖ୍ୟତଃ କୃଷି ଆରମ୍ଭ ପୂର୍ବରୁ ଏହି ପର୍ବ ପାଳନ ହେଉଥିବାରୁ ପ୍ରତିଟି ଓଡିଆ ମନରେ ଏହି ପର୍ବ ପ୍ରତି ରହିଛି ସ୍ବତନ୍ତ୍ର ଆନ୍ତରିକତା । ତେବେ ରଜ ଅବସରରେ ସଂସ୍ଥା ପକ୍ଷରୁ ଆୟୋଜିତ ରଜ ମହୋତ୍ସବରେ ସାତ ଦିନ ଧରି ଲୋକେ ମଜା ନିଅନ୍ତି ଏହି ପର୍ବର । ମହୋତ୍ସବରେ ରଜ ଗୀତ ସହ ଝୋଟି, ପାରମ୍ପରିକ ନୃତ୍ୟ ଗୀତ ଆଦିର ଆୟୋଜନ କରାଯାଇଥାଏ । ହେଲେ ସବୁଠାରୁ ଆକର୍ଷଣୀୟ ହୋଇଥାଏ ପାରମ୍ପରିକ ଦୋଳିର ଆସର । କାଠ ରାମ ଦୋଳି, କାଠ ଦୋଳି ଆଦି ହେଉଛି ଏସବୁ ମଧ୍ୟରେ ଗୋଟିଏ ଗୋଟିଏ ମୁଖ୍ୟ ଆକର୍ଷଣ ।
ବର୍ତ୍ତମାନ ସମୟରେ ପ୍ରାଚୀନ ସଂସ୍କୃତିକୁ ଯୁବପୀଢି ପାଖରେ ପହଞ୍ଚାଇବାର ସଂସ୍ଥାର ଏହି ପ୍ରୟାସ ଶତ ପ୍ରଶଂସନୀୟ । ସଂସ୍ଥାର ଏହି ଉଦ୍ୟମକୁ ବଡମାନେ ପ୍ରଶଂସା କରିବା ସହ ଛୁଆମାନେ ବେଶ୍ ଉତ୍ସାହର ସହ ଉପଭୋଗ କରିଛନ୍ତି । ଏହାଦ୍ବାରା ରଜ ପର୍ବ ସହ ଜଡିତ ରାଜ୍ୟର ପରମ୍ପରୀକୁ ନିକଟରୁ ଜାଣିବାର ସୁଯୋଗ ପାଇପାରିଛନ୍ତି ବର୍ତ୍ତମାନର ଯୁବପୀଢି ।
ତେବେ ଆଗାମୀ ଦିନମାନଙ୍କରେ ଏପରି ଉଦ୍ୟମ ସମସ୍ତ ଜିଲ୍ଲାରେ ହୋଇ ପାରିଲେ ହୁଏତ ପୁଣି ଜୀବିତ ହୋଇପାରନ୍ତା ଆମର ପ୍ରାଚୀନ ପରମ୍ପରା, କଳା ଓ ସଂସ୍କୃତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
