ଆଲୋଭେରା ଜେଲ ବହୁ ପୋଷକ ତତ୍ତ୍ବ ଭରପୂର, ଯାହାକି ଉଭୟ ଚର୍ମ ଓ କେଶ ପାଇଁ ଲାଭଦାୟକ ହୋଇଥାଏ । ଏଥିରେ ଭିଟାମିନ, ମିନେରାଲ, ଏନଜାଇମ ଓ ଆମିନୋ ଏସିଡ ଭଳି ଅନେକ ପୋଷକ ତତ୍ତ୍ବ ରହିଛି । ଏହା ତ୍ବଚାକୁ ମଇଶ୍ଚରାଇଜ କରିବା, ସନବର୍ନ, ବ୍ରଣ ଦୂର କରିବା, ଗ୍ଲୋ ବଢାଇବା, ଡ୍ରାଏନେସରୁ ସୁରକ୍ଷା ଦେବା ଭଳି ବହୁ ଫାଇଦା ଦେଇଥାଏ । ଆଜିକାଲିର ବଢୁଥିବା ପ୍ରଦୂଷଣ ଓ ପରିବର୍ତ୍ତିତ ଜୀବନଶୈଳୀ ଯୋଗୁଁ ତ୍ବଚା ଓ କେଶ ସହିତ ଜଡିତ ବିଭିନ୍ନ ପ୍ରକାର ସମସ୍ୟା ଦେଖାଯାଉଛି । ଏହିସବୁ ସମସ୍ୟାରୁ ମୁକ୍ତି ପାଇଁ ଆଲୋଭେରା ଜେଲ ବ୍ୟବହାର କରିପାରିବେ । ଏହି ଜେଲ ଆଣ୍ଟି-ଅକ୍ସିଡାଣ୍ଟ ଓ ଆଣ୍ଟି-ବ୍ୟାକ୍ଟେରିଆଲ ଗୁଣରେ ଭରପୂର । ଏହା କେବଳ ବ୍ରଣ ଦୂର କରେ ନାହିଁ ବରଂ ରୁପୀ ସମସ୍ୟା କମାଇବାରେ ସାହାଯ୍ୟ କରେ ।
ସାଧାରଣତଃ ଲୋକମାନେ ବଜାରରୁ ଆଲୋଭେରା ଜେଲ କିଣି ବ୍ୟବହାର କରିଥାନ୍ତି । କିନ୍ତୁ ଏଥିରେ କେତେକ କେମିକାଲ ଥାଏ ଯାହା ଆପଣଙ୍କ ତ୍ବଚା ଓ କେଶ ପାଇଁ ହାନିକାରକ ହୋଇପାରେ । ତେଣୁ ଆପଣ ନିଜ ଘରେ ଫ୍ରେସ୍ ଆଲୋଭେରା ଜେଲ ପ୍ରସ୍ତୁତ କରିପାରିବେ । ଜାଣନ୍ତୁ କିପରି
ସାମଗ୍ରୀ:
- ଆଲୋଭେରା ପତ୍ର
- ଭିଟାମିନ ସି ଓ ଭିଟାମିନ ଇ କ୍ୟାପ୍ସୁଲ
- ଗୋଟିଏରୁ ଦୁଇ ଚାମଚ ମହୁ
ଆଲୋଭେରା ଜେଲ କିପରି ପ୍ରସ୍ତୁତ କରିବେ:
- ଆଲୋଭେର ଜେଲ ପ୍ରସ୍ତୁତ କରିବା ପାଇଁ ପ୍ରଥମେ କିଛି ତାଜା ଆଲୋଭେରା ପତ୍ର ନିଅନ୍ତୁ ଏବଂ ଏହାକୁ ଥଣ୍ଡା ପାଣିରେ 10ରୁ 15 ମିନିଟ ଯାଏ ଭିଜାଇ ରଖନ୍ତୁ ।
- ପତ୍ରକୁ ଥଣ୍ଡା ପାଣିରେ ରଖିବା ଦ୍ବାରା ଏଥିରୁ ବାହାରୁଥିବା ହଳଦିଆ ତରଳ ପଦାର୍ଥ ସଫା ହୋଇଯାଏ, ଯାହା ଆଲର୍ଜିର କାରଣ ହୋଇପାରେ ।
- ତେଣୁ କିଛି ସମୟ ପତ୍ରକୁ ପାଣିରେ ଭିଜାଇ ରଖିବା ପରେ ଏକ ଛୁରୀରେ ଏହାର ଚୋପା କାଟନ୍ତୁ । ପତ୍ରରୁ ଆଲୋଭେରା ରସ ବାହାର କରନ୍ତୁ ।
- ଏବେ ଆଲୋଭେରା ରସକୁ ଗ୍ରାଇଣ୍ଡରରେ ପେଷ୍ଟ କରନ୍ତୁ ।
- ଏବେ ଏହି ପେଷ୍ଟକୁ ଏକ ପାତ୍ରକୁ କାଢି ଏଥିରେ ଭିଟାମିନ ସି, ଇ କ୍ୟାପସୁଲ ଓ ମହୁ ମିଶାନ୍ତୁ ।
- ଏବେ ଏହି ପେଷ୍ଟକୁ ଭଲ ଭାବେ ମିଶାନ୍ତୁ । ଏହା ଚିକ୍କଣ ହୋଇଗଲେ ଆପଣଙ୍କ ଜେଲ୍ ପ୍ରସ୍ତୁତ ହୋଇଯିବ ।
ଆଲୋଭେରା ଜେଲକୁ କିପରି ସଂରକ୍ଷିତ ରଖିବେ:
ନିଜ ଘରେ ପ୍ରସ୍ତୁତ କରିଥିବା ତାଜା ଓ କେମିକାଲ ମୁକ୍ତ ଆଲୋଭେରା ଜେଲକୁ ଏକ ଏୟାରଟାଇଟ କଣ୍ଟେନରରେ ଭର୍ତ୍ତି କରି ଫ୍ରିଜରେ ରଖନ୍ତୁ । ଏହି ହୋମମେଡ୍ ଜେଲକୁ ଆପଣ 4ରୁ 5 ଦିନ ଯାଏଁ ବ୍ୟବହାର କରିପାରିବେ । ଏହାକୁ ରେଫ୍ରିଜରେଟରରେ ଲମ୍ବା ସମୟ ପର୍ଯ୍ୟନ୍ତ ସଂରକ୍ଷିତ କରାଯାଇପାରିବ ।
ଏହା ମଧ୍ୟ ପଢନ୍ତୁ: ଦାଗହୀନ ଚମକଦାର ଚେହେରା ଚାହୁଁଛନ୍ତି ? ହଳଦୀରେ ମିଶାଇ ଲଗାନ୍ତୁ ଏହି ଜିନିଷ - TURMERIC FOR SKINCARE ROUTINE
ଏହା ମଧ୍ୟ ପଢନ୍ତୁ: ମାଇଗ୍ରେନ ସମସ୍ୟା ଅଛି କି ? ଏହି ଯୋଗ-ବ୍ୟାୟାମ କଲେ ମିଳେ ଆରାମ - YOGA FOR MIGRAINE
(Disclaimer- ଏଠାରେ ଦିଆଯାଇଥିବା ସମସ୍ତ ସୂଚନା କେବଳ ଆପଣଙ୍କ ଜାଣିବା ପାଇଁ । ଏହା ଉପରେ ବିଚାର କରିବା ପୂର୍ବରୁ କୌଣସି ବିଶେଷଜ୍ଞଙ୍କ ପରାମର୍ଶ ନେବା ଭଲ ।)
